Roma 6 - En Taar Weru a nunuwu' é Tontemboan

Menonou meesa wo si Kristus

¹ Sa taniitu, sapapé' en icuata intarépé'? Ro'napé' réén kita mengéma-ngéma' ing kamesé-meséaan wosama' en upus aitambér i Amang Kasuruan mengawe-ngawes ai cita?

² Tantu ra'- ica toro! Ampa'paan kita tanu tou imatéo si ra'io pakakawasan ing kamesé-meséaan. Ampa'paan in ituo, kita ra'io menonou mengéma-ngéma' ing kamesé-meséaan.

³ Tantu kailekan iow sapaoka an tutuw kita nibaptis, kita pineesao wo si Kristus Yesus. Eng kaangéan in itu, kita pineesao ang karapi im papaté-Na.

⁴ Anaé, an tutuw kita nibaptis, kita tanu imaté wo aicubur mewali-wali wo si Kristus, wosama' meputé si Kristus tinou sumawel am papaté-Na ang karapi ing kawasa i Amang Kasuruan, Amang si parayo-rayo wo pasiri-siriin, kita ka'i menonou ang katouan weru.

⁵ Sa kita pineesao wo si Kristus ampa'paan kita tanu icumiito imaté mewali-wali wo Sia, kita ka'i meesa oka ang karapi-Na ampa'paan kita touen oka sumawel i Amang Kasuruan meputé si Kristus.

⁶ Kailekanta, sapaoka em perita uré imatéo mewali-wali wo si Kristus ang kayu salip, wosama' en owakta ra'io pakakawasan ing kamesé-meséaan. Wo in taniitu kita ra'io mamuali ata ing kamesé-meséaan.

⁷ Ampa'paan si séi si matéo, sia itu tantu icawekaro ang kawasa ing kamesé-meséaan.

⁸ Ampa'paan kita imatéo mewali-wali wo si Kristus, émanenta sapaoka kita ka'i menonou oka mewali-wali wo Sia.

⁹ Kailekanta sapaoka si Kristus tinouo sumawel an uner é tou imaté wo em papaté ra'io sangkumen-Na ampa'paan em papaté ra'io kumawasa Sia.

¹⁰ Si Kristus imatéo wayake' i makasa eng kumala ing kawasa ing kamesé-meséaan akar ing kauré-uré. Taan intarépé' Sia itumou sumawel, wo menonou torona i Amang Kasuruan.

¹¹ Taniituo ka'i kamu, maweroto mio' in tana'i: kamu imatéo mewali-wali wo si Kristus Yesus akar kamu icawekar asi kawasa ing kamesé-meséaan wo intarépé' menonou torona i Amang Kasuruan ampa'paano i Kristus Yesus.

¹² Anaé, tioo iwaya en owak iow si ro'na maté itu, kawasané' ing kamesé-meséaan, wosama' kamu ra'ica kumiit ing kasalé'an in owak sé léwo'.

¹³ Wo tioo isarakan iow sé an owak iow mamuali pakakas eng kawasan ing kamesé-meséaan e méma' ing kaléwo-léwo'an. Taan isarakano mio' en owak iow a si Amang Kasuruan ampa'paan kamu ra'io pakakawasaan im papaté wo menonou ang katouan weru. Wo isarakano mio' pakasa sé an owak iow a si Amang Kasuruan em pakén torona méma' in sususuien wutul-Na.

¹⁴ Anaé, kamu ra'io toro pakakawasané' ing kamesé-meséaan, ampa'paan kamu ra'io menonou makiit in ukum Torat, taan kamu menonou asi upus aitambér i Amang Kasuruan.

Si ata e mengaéma' im butul

¹⁵ Anaé, sapa en icuata? Ro'napé' réén kita mengéma-ngéma' ing kamesé-meséaan ampa'paan kita ra'io pakakawasan in ukum Torat wo ampa'paan kita intarépé' menonouo an upus aitambér i Amang Kasuruan? Tantu ra'ica!

¹⁶ Tantu kailekan iow, sa kamu imééo in owak a si esa tou e méma' ing kasalé'anna, kamu mamualio ata i tou itu. Taniituo ka'i sa kamu kumiit ing kasalé'an ing kamesé-meséaan, kamu mamualio ata ing kamesé-meséaan, eng kasiwakanna kamu tumerima im papaté. Sa kamu le'tek a si Amang Kasuruan, kamu mamuali ata-Na wo nianggap-Na wutul an dior-Na.

¹⁷ Anaé, makapulu'sama' a si Amang Kasuruan! Ampa'paan indior kamu ata ing kamesé-meséaan, taan intarépé' kamu icumiito ang karapi in lekep en até an sususuien sé aisusuio ai camu.

¹⁸ Kamu ka'i aiwekaro ang kawasa ing kamesé-meséaan wo intarépé' kamu mamualio ata sé mengaéma' im butul.

¹⁹ Em pakawerot iow tanu tou ra'ica rior makailek, anaé aku maké in andéan ata, wosama' kamu rior makailek sapa em peangé-angénku. Indior kamu sumarakano waya ing katouan iow mamuali ata ing kasamekan wo ing kaléwo-léwo'an akar kamu mengéma-ngéma' in léwo'. Taniituo ka'i intarépé', musti isarakan iow waya eng katouan iow mamuali ata mengaéma' im butul akar makawali icamu ang katouan le'nas.

²⁰ An tutuw iow atapé' ing kamesé-meséaan, kamu ra'ica mawerot mengéma-ngéma' im butul.

²¹ An tutuw itu sapa em buéna kinéréan iow? Tantu ra'ica wana! Kamu intarépé' malawi' mawerot in itu. Ampa'paan pakasa en itu asalo makawali am papaté.

²² Taan intarépé' kamu aicawekaro ang kamesé-meséaan wo imamualio ata i Amang Kasuruan. Akar kamu makéré im buéna i menonou le'nas torona i Amang Kasuruan wo eng kasiwakana kamu makéré oka ing katouan akar ing kauré-uré.

²³ Ampa'paan em buéna i mengéma-ngéma' ing kamesé-meséaan, makéré oka ukuman icatané a si Amang Kasuruan akar ing kauré-uré. Taan eng kamang aitambér i Amang Kasuruan, siituo eng katouan akar ing kauré-uré. Wo eng kamang aitambér-Na itu tinerimata ampa'paan si Kristus Yesus, Apo'ta.