Roma 5 - En Taar Weru a nunuwu' é Tontemboan

Menonou meeluran wo si Amang Kasuruan

¹ Intarépé' kita nianggapo wutul i Amang Kasuruan ampa'paan im paémanenta. Wo kita meelurano sumawel wo si Amang Kasuruan ampa'paano i Apo'ta Yesus Kristus.

² Wo ampa'paan kita maéman a si Yesus, kita imakéré in upus aitambér i Amang Kasuruan. Wo ampa'paan in upus aitambér ituo kita menonou intarépé'. Wo kita maaru-arui ampa'paan makaanu im paarapen sapaoka kita makéré oka bagéan a rarayo wo in sisiri' asi Amang Kasuruan owo.

³ Wo ra'ica siituke', kita ka'i ro'na maaru-arui an tutuw eng kawenduan sangkumenta. Ampa'paan kailekanta sapaoka eng kawenduan itu méma' icita makatalesen,

⁴ wo eng katalesenan itu méma' icita talesen im paujin, wo talesen im paujin itu méma' icita awéan paarapen.

⁵ Wo em paarapen tanu siitu ra'ica iméma' icita matapé, ampa'paan kailekanta tambisa eng kaupusan i Amang Kasuruan ai cita. Wo aiwéé-Nao e Roh Le'nas matawoi an atéta, wosama' kita ro'na mendam ing kawangko' in upus-Na ai cita.

⁶ An tutuw kita ra'ica toro méma' in sapa-sapa eng kumesot ang kawasa ing kamesé-meséaan, si Kristus imatéo asi témpo si aitantuo i Amang Kasuruan en tumu'bus ing kamesé-meséaanta sé mengaéma' ing kaléwo-léwo'an.

⁷ Ampa'paan torona é tou nianggap wutul, ra'ica wana wona' tou e masalé' maté wo torona é tou loor awéan wona' tou em brani maté.

⁸ Taan si Kristus imatéo torona icita an tutuw kita mengaéma'pé' ing kamesé-meséaan. En itu itumuru'o sapaoka eng kaupusan i Amang Kasuruan ai cita uli-ulit wangko'.

⁹ Lébé-lébépé' ka'i intarépé' an tutuwta nianggapo wutul i Amang Kasuruan ampa'paano in enda' i Kristus, tantu kita lowiren oka asi kae'bowan-Na.

¹⁰ An tutuw kita masunduré' a si Amang Kasuruan, kita niéma'-Nao meeluran wo Sia ampa'paan im papaté i Toyaang-Na. Lébé-lébépé' ka'i intarépé' an tutuw kita meelurano sumawel wo Sia, tantu kita lowiren oka asi endo kaka'puan ing kayo'baan ampa'paan si Kristus itumou sumawel.

¹¹ Wo ra'ica siituke'! Kita ka'i maaru-arui ampa'paan ing kasamaan i Amang Kasuruan si aituru' i Apo'ta Yesus Kristus, akar kita intarépé' menonou meelurano sumawel wo Sia.

Si Adam wo si Kristus

¹² Eng kamesé-meséaan mai ang kayo'baan anio' ampa'paano i esa tou, siao si Adam wo ampa'paan ing kamesé-meséaan ituo akar awéan em papaté. Eng kasiwakana, em papaté itu sangkumen waya é tou, ampa'paan pakasa en tou iméma'o ing kamesé-meséaan.

¹³ Ra'ipé' wana en ukum Torat, eng kamesé-meséaan awéano ang kayo'baan, taan eng kamesé-meséaan niéma' é tou itu ra'ica tinuntut i Amang Kasuruan ampa'paan en ukum Torat ra'ipé' wana.

¹⁴ Mandé in taniitu, pakasa en tou tumo'tolai an jaman i Adam akar an jaman i Musa, kinawasao im papaté. Mandé ka'i sé tou itu ra'ica iméma' ing kamesé-meséaan tanu si niéma' i Adam, séra ka'i kasake' i maté. Si Adam aipeputé wo Sia si maai oka sa, Sia ituo si Kristus.

¹⁵ Taan e niéma' éra in dua ra'ica puté, ampa'paan eng kamang aitambér i Amang Kasuruan en lébé wangko' mai sa ipeputé wo ing kasiwakan ing kameséaan i Adam. Eng kameséaan i esa tou méma' keli en tou imaté, taan eng kamang aitambér i Amang Kasuruan méma' keli en tou malowir. Eng kalowiran itu asalo aitambér-Na wo torona é pakasa sé tou ampa'paano i esa tou Siao si Yesus Kristus.

¹⁶ Wo em buéna ing kamang aitambér i Amang Kasuruan itu ra'ica puté wo ing kasiwakan ing kamesé-meséaan niéma' i Adam. Ampa'paan ing kameséaan i esa tou, akar pakasa en tou meséa'o akar patus makéré ukuman asi Amang Kasuruan. Taan ampa'paan ing kaupusan i Amang Kasuruan akar sé tou maéma' ing kamesé-meséaan ro'na anggapen-Na wutul an dior-Na.

¹⁷ Anaé, ampa'paan ing kamesé-meséaan i esa tou siao si Adam, akar pakasa sé tou patus maté. Taan e niéma' i esa tou Siao si Yesus Kristus, uli-ulit en lébé wangko' mai. Ampa'paano Sia, sé tou tinambéranai i Amang Kasuruan in upus-Na lumepe-lepet wo nianggap-Na wutul an dior-Na. Séra sé maéman a si Yesus Kristus itu, menonou oka akar ing kauré-uré wo kumawasa ing kayo'baan ampa'paano Sia.

¹⁸ Anaé, eng kamesé-meséaan i esa tou eng kasiwakana pakasa en tou meséa' wo patus ukumen. Taniitu ka'i, ampa'paan im paémaan wutul i esa Tou, pakasa en tou nianggap wutul i Amang Kasuruan an dior-Na akar séra makéré ing katouan weru.

¹⁹ Anaé, ampa'paano si esa tou ra'ica le'tek a si Amang Kasuruan, pakasa en tou imamualio tou ang kamesé-meséaan, taniitu ka'i ampa'paano i esa Tou si le'tek a si Amang Kasuruan, pakasa en tou nianggap wutul i Amang Kasuruan an dior-Na.

²⁰ En ukum Torat itu aiwéé mai i Amang Kasuruan a sé tou wo eng kasiwakana eng kamesé-meséaan é tou makaawes eng kakeli ampa'paan séra ra'ica le'tek maéma' in ukum itu. Taan mandé eng kamesé-meséaan makaawes eng kakeli, en upus aitambér i Amang Kasuruan makalepe-lepet eng kakeli.

²¹ Anaé, kita musti maté ampa'paan kita mengaéma' ing kamesé-meséaan. Taan si Amang Kasuruan itumambéro mai in upus-Na ai cita ampa'paano i Yesus Kristus Apo'ta akar kita nianggap wutul i Amang Kasuruan wo makéré ing katouan akar ing kauré-uré.