Roma 4 - En Taar Weru a nunuwu' é Tontemboan

Si Abraham nianggap wutul ampa'paan im paémanenna

¹ Anaé, kita ro'na kumua andumoro' i Abraham si apo'ta tou Yahudi tumambisa réén sia nianggap wutul i Amang Kasuruan?

² Si Abraham nianggap wutul i Amang Kasuruan ra'ica ampa'paan mengaéma' sé loor. Sa sia nianggap wutul i Amang Kasuruan ampa'paan mengaéma' sé loor, sia awéan alasan e rumayo in owakna in esa. Taan sia ra'ica toro rumayo in owakna an dior i Amang Kasuruan.

³ Ang Kitap Le'nas aipatic in tana'i, “Si Abraham maéman a si Amang Kasuruan wo ampa'paan im paémanenna itu, sia niampungan i Amang Kasuruan wo nianggap wutul an dior-Na.”

⁴ En andéanna tana'i: sé tou matawoi tantu makéré laasa. En laasa itu ra'ica aitambér taan en itu patus teriman éra ampa'paan anu éra.

⁵ Taan ubungan é tou wo si Amang Kasuruan ra'ica tanu siitu, sé tou émaan-Na wutul an dior-Na ra'ica ampa'paan in tawoien éra in esa taan ampa'paan im paémanen éra a si Amang Kasuruan si mengaampung sé tou mengaéma' ing kamesé-meséaan.

⁶ En sususuien itu tanu si aicua i colano Daud indior. Aicuana, pakakamangen sé tou nianggap wutul i Amang Kasuruan ampa'paan im paémanenna, ra'ica ampa'paan im pengaémaanna. En aicuana tana'i,

⁷ “Pakakamangen sé tou niampungan eng kaléwo-léwo'anna, wo eng kamesé-meséaanna ra'io pena'né-na'néien i Amang Kasuruan;

⁸ Pakakamangen sé tou eng kamesé-meséaanna ra'io akimen i Casuruan.”

⁹ E nunuwu' kamangen en aicua i Daud itu ra'ica toronake' é tou sinunat, taan ka'i torona é tou ra'ica sinunat. Aicuao ami an dangka', sapaoka si Abraham nianggap wutul i Amang Kasuruan ampa'paan im paémanenna.

¹⁰ Sa taniitu, kawisa réén si Abraham nianggap wutul i Amang Kasuruan? An tutuw sia ra'ipé' sinunat kuma'pa sinunato? Tantu karu' an tutuw sia ra'ipé' sinunat.

¹¹ Anaé, an tutuw i Abraham ra'ipé' sinunat, sia maémano a si Amang Kasuruan. En sunat itu asalo tuus sapaoka si Abraham tinerima i Amang Kasuruan wo nianggap-Na wutul ampa'paan maéman ai Sia. Anaé, si Abraham tinerima i Amang Kasuruan an tutuw sia ra'ipé' sinunat. Ampa'paan in ituo sia mamuali amang im pakasa é tou maéman mandé ka'i sé tou maéman itu ra'ica sinunat. Wo ampa'paano im paémanen éra, séra nianggap wutul i Amang Kasuruan.

¹² Si Abraham ka'i mamuali amang é tou sé sinunato. Sia imamuali amang éra ra'ica ampa'paan séra mengakiit in atoran-atoran sunat, taan ampa'paan séra maéman a si Amang Kasuruan, meputé si Abraham imaémano an tutuw sia ra'ipé' sinunat.

Si Amang Kasuruan jumanji a si Abraham ampa'paan im paémanenna

¹³ Si Amang Kasuruan jumanjio a si Abraham wo a sé tara-taranakna, sapaoka iwéé-Na oka eng kayo'baan anio' mamuali anu éra. Si Amang Kasuruan jumanji tanu siitu ra'ica ampa'paan si Abraham le'tek mengaéma' in ukum Torat, taan ampa'paan sia maéman a si Amang Kasuruan akar sia nianggap-Na wutul.

¹⁴ Ampa'paan sa sé touke' le'tek maéma' in ukum Torat en tumerima in aijanji i Amang Kasuruan, eng kaangéanna em paémanen éra a si Amang Kasuruan ra'ica wana en torona wo en janji itu ka'i ra'- ica mamuali.

¹⁵ En ukum Torat itu makawalike' sé tou in ukumen i Amang Kasuruan, ampa'paan ra'ica kawooan éra méma' in itu. Taan sa woo en ukum Torat ra'ica iwéé i Amang Kasuruan, ra'ica wana tou e mengaéma' ing kameséaan.

¹⁶ Anaé, en janji i Amang Kasuruan itu, iwéé-Na ampa'paan sé tou maéman ai Sia. Itambér-Na en itu ampa'paan ing kaupusan-Na wosama' pakasa sé taranak i Abraham makéré in janji itu. Wo en janji itu ra'ica toronake' é tou Yahudi sé menonou makiit in ukum Torat, taan ka'i torona im pakasa sé tou maéman a si Amang Kasuruan, meputé si Abraham maéman ai Sia. Ampa'paan in ituo si Abraham mamuali amangta im pakasa é tou maéman.

¹⁷ Ampa'paan icua i Amang Kasuruan a si Abraham in tana'i, “Aitantu-Kuo ko mamuali amang é tou keli.” Tanu siituo en janji i Amang Kasuruan a si Abraham. Wo si Abraham maéman a si Amang Kasuruan si tumou sumawel sé tou imatéo wo ka'i si méma' im baya-waya asaloke' i nunuwu'-Na pakasa waya mamuali.

¹⁸ En janji i Amang Kasuruan itu uli-ulit émanen i Abraham, mandé ka'i sia ra'io wana arapan makéré taranak. Ampa'paan in ituo sia mamuali amang é tou keli. Tanu in aipatic ang Kitap Le'nas, “Sé taranakmu mamuali oka keli ulit.”

¹⁹ Asi témpo itu kailekan i Abraham sapaoka sia ra'ica ro'na makéré taranak, ampa'paan sia matu'ao wo en umurna matawio sangaatus ngata'- un. Wo ka'i si Sara penanaanna ra'ica ro'na méé toyaang. Mandé in taniitu, em paémanen i Abraham a si Amang Kasuruan ra'- ica maina'.

²⁰ Si Abraham uli-ulit maéman wo ra'ica marua-rua wasa a si janji i Amang Kasuruan itu. Taan em paémanenna itu makaketerke' taré akar sia rumayo wo sumiri' a si Amang Kasuruan.

²¹ Si Abraham uli-ulit maéman sapaoka ro'na émaan i Amang Kasaruan sapa si aijanji-Nao.

²² Wo ampa'paano im paémanenna itu, sia tinerima i Amang Kasuruan wo nianggap-Na tou wutul.

²³ E nunuwu' anio', “Teriman i Amang Kasuruan wo nianggap-Na tou wutul,” ra'ica aipatic toronake' si Abraham in esa,

²⁴ taan aipatic ka'i torona icita im baya. Kita nianggap wutul i Amang Kasuruan, ampa'paan kita maéman ai Sia si tumou sumawel si Yesus Apo'ta an uner é tou imaté.

²⁵ Sia itu aisarakano a sé tou wo pinaté éra en tumu'bus ing kamesé-meséaanta. Taan Sia tinou sumawel i Amang Kasuruan wosama' kita ro'na makéré ing kaampungan wo kita nianggap wutul i Amang Kasuruan.