Roma 3 - En Taar Weru a nunuwu' é Tontemboan

Si Amang Kasuruan tatap le'tek a sé tou Yahudi

¹ Sé tou Yahudi wo sé tou ra'ica Yahudi puté waya an dior i Amang Kasuruan. Sa taniitu sapa eng kalébéan é tou Yahudi? Wo sapa eng katoronaan kumiit in atoran sunat?

² Tantu kelian eng katoranaan wo am baya-waya! Kataré-taré, a sé tou Yahudio sé tinokéan in Taar i Amang Kasuruan.

³ Taan tambisa sa an uner éra awéané' sé ra'ica le'tek a si Amang Kasuruan? Anaé, tambisa eng kale'tekkan i Amang Kasuruan asi janji-Na ai séra itu batalen-Na?

⁴ Tantu émaan-Na! Ampa'paan si Amang Kasuruan itu wutul, wo pakasa en tou kotowo. Tanu en aipatic ang Kitap Le'nas andumoro' i Amang Kasuruan in tana'i, “Pakasa sé aicua-Mu wutul. An tutuw Ko in akimen, tantu Ico muntung.”

⁵ An tutuw kita mengaéma' sé ra'ica wutul, em peri wutul i Amang Kasuruan kaséré-séréan. Wo sapa en icuata sa kita icae'bow-Na ampa'paan kita mengaéma' sé ra'ica wutul? Icuata réén Sia marapitke'? En itu pakawerotke' é tou.

⁶ Wo em pakawerot é tou itu suméa'. Ampa'paan, sa si Amang Kasuruan marapitke', tambisa Sia ro'na makim ing kayo'baan anio' sa?

⁷ Wo awéan wona' ka'i tou mengakua in tana'i, “Sa aku mengaéma' in léwo', em peri wutul i Amang Kasuruan kaséré-séréan, anaé Sia irayo wo siriin oka é tou. Sa taniitu, kéitu réén aku akimené' tanu tou ang kamesé-meséaan?”

⁸ Ampa'paan in ituo awéan tou makua, “Mayoo émaanta sé léwo', wosama' eng kaloo-looran kaséré-séréan!” Mémang wutul awéan sé tou mengawuruk i ngaranta sapaoka icitao en icumua in itu. Sé tou tanu siitu patus in ukumen i Amang Kasuruan.

Pakasa en tou iméma'o ing kamesé-meséaan

⁹ Anaé tana'i, kailekanta sapaoka kita tou Yahudi ra'ica wana eng kalébéan sa ipeputé wo sé tou walina. Ampa'paan tarépé' kita tumuduo sé tou Yahudi wo ka'i sé tou ra'ica Yahudi, sapaoka séra im baya kinawasao ing kamesé-meséaan.

¹⁰ Tanu in aipatic ang Kitap Le'nas tana'i, “Ra'ica wana tou e nianggap wutul, mandé esake'.

¹¹ Ra'ica wana tou e makailek si wutul, wo ra'ica wana tou e masalé' makatuus si Amang Kasuruan, mandé esake'.

¹² Pakasa en tou itumayango asi Amang Kasuruan; séra im baya ra'ica wana torona. Ra'ica wana si méngaéma' in loor, mandé esake' tou, ra'ica wana!

¹³ E nunuwu' éra wuruk, tanuoka wou im buruk masengorai ang kubur imawuka'. En lila' éra tampenguwak. E nunuwu' éra tanuoka racung i ula' rumacu-racung.

¹⁴ Em ba'ba' éra wuta i nunuwu' mengakutuk wo mengawa'ba.

¹⁵ Eng kécéi éra tawaya' keli e mangé maté tou.

¹⁶ Am bisa-wisake' en angéan éra, séra maali ing kalicokoan wo mengasusa sé tou.

¹⁷ Ra'io kailekan éra tumambisa menonou meelu-eluran wo sé tou walina,

¹⁸ wo séra ra'io wana kaindé'an a si Amang Kasuruan.”

¹⁹ Taan intarépé' kailekanta sapaoka pakasa sé aipatic an ukum Torat, torona é tou sé menonou pakakawasan in ukum Torat. Wo in taniitu ra'ica wana mandé esake' tou e ro'na méé alasan sapaoka en owakna wutul, anaé pakasa en tou ang kayo'baan meséa' an dior i Amang Kasuruan.

²⁰ Ampa'paan ra'ica wana tou mandé esake' sé nianggap wutul an dior i Amang Kasuruan ampa'paan mengaéma' in ukum Torat. Taan, ampa'paano taré in ukum Torat ituo sé tou makailek ing kamesé-meséaan.

Sé tou nianggap wutul i Amang Kasuruan

²¹ Taan intarépé', aituru'o i Amang Kasuruan tumambisa wosama' sé tou anggapen-Na wutul, taan ra'ica ampa'paan mengaéma' in ukum Torat. En itu tanu in aipatic ang Kitap Torat wo ang kitap-kitap é nabi,

²² sapaoka sé tou ro'na nianggap wutul i Amang Kasuruan, ampa'paan maéman a si Yesus Kristus. Niéma' i Amang Kasuruan in taniitu torona im pakasa é tou maéman a si Yesus Kristus. Ampa'paan pakasa en tou puté waya an dior i Amang Kasuruan.

²³ Pakasa en tou iméma'o ing kamesé-meséaan, akar séra ra'ica makéré im bagéan a rarayo wo in sisiri' i Amang Kasuruan.

²⁴ Taan ampa'paano in upus aitambér i Amang Kasuruan sé tou anggapen-Na wutul an dior-Na ampa'paan eng kamesé-meséaan éra tinu'buso i Kristus Yesus.

²⁵ Sia ayutuso mai i Amang Kasuruan ang kayo'baan wosama' makéré ukuman; maté wo en enda'-Na makatiti-titis. Niéma'-Na in taniitu wosama' em papaté i Yesus itu méma' sé tou ro'na icawekar ang kamesé-meséaan sa séra maéman ai Sia wo séra nianggap wutul i Amang Kasuruan. Si Amang Kasuruan méma' in taniitu en tumuru' sapaoka Sia ra'ica marapit. Ampa'paan indior Sia talesen makaséré sé tou mengéma-ngéma' ing kamesé-meséaan akar séra ra'ica ukumen-Na.

²⁶ Si Yesus maté en sumawel icita ampa'paan ing kamesé-meséaan, siitu en tuusna sapaoka si Amang Kasuruan ra'ica marapit. Wo in taniitu aituru'-Nao sapaoka Sia wutul; wo pakasa é tou maéman a si Yesus, nianggap i Amang Kasuruan wutul an dior-Na.

²⁷ Ampa'paan in ituo ra'ica toro kita rumayo in owak. Kita nianggap wutul i Amang Kasuruan, ra'ica ampa'paan mengaéma' in ukum Torat. Ra'ica! Taan ampa'paan kita maéman a si Yesus Kristus.

²⁸ Anaé tana'i: Sé tou nianggap wutul i Amang Kasuruan ampa'paan séra maéman a si Yesus, ra'ica ampa'paan mengaéma' in ukum Torat.

²⁹ Si Amang Kasuruan itu ra'ica Kasuruan é tou Yahudike', taan Sia itu ka'i Kasuruan é tou walina,

³⁰ ampa'paan Si Amang Kasuruan wayake' in esa. Anggapen-Na wutul sé tou Yahudi wo ka'i sé tou walina ampa'paano im paémanen éra.

³¹ Sa taniitu, ra'io réén wana eng katoronaan en ukum Torat itu ampa'paan kita maémano a si Yesus? Ra'ica taniitu! Taan ampa'paano taré kita maéman, en ukum Torat itu émaanta i mauli-ulit.