Roma 2 - En Taar Weru a nunuwu' é Tontemboan

En ukuman i Amang Kasuruan a sé pakasa in tou

¹ Éi poo-poow, kailekan iow sapaoka sé tou mengaéma' ing kaléwo'an ukumen oka i Amang Kasuruan. Anaé, si séi réén kamu akar akimen iow sé tou walina? Kamu in esa ka'i ra'ica icawekar ang kameséaan! Ampa'paan sa kamu maakim sé tou walina taan kamu in esa maéma' ing kameséaan tanu iséra, eng kaangéanna kamu imakimo ka'i in owak iow in esa.

² Kailekanta sa si Amang Kasuruan méé in ukuman a sé tou sé mengaéma' ing kameséaan, em pinusé'-Na itu wutul.

³ Wo kamu é poo-poow, ipatudu miow sé tou walina sapaoka séra patus in ukumen, tioo mawerot kamu ro'na icawekar an ukuman i Amang Kasuruan ampa'paan kamu in esa mengaéma' sé andumoro im pengaémaan éra.

⁴ Si Amang Kasuruan itu en até-Na sama', talesen wo wuta ing kaupusan. Taan tioo paepesen iow im beren em pakasa in itu wo mawerot ra'io sangali mape'dis! Ra'ica réén kailekan iow sapaoka ituru' i Amang Kasuruan eng kasamaan in até-Na itu wosama' kamu mape'dis ang kamesé-meséaan?

⁵ Taan kamu anio' keté ngaas wo ra'ica kiim mape'dis. Ampa'paano in itu, icamuo in esa e méma' in ukuman iow makaute-uter asi endo kaka'puan ing kayo'baan sa. Asi endo itu oka si Amang Kasuruan tumuru' ing kae'bowan-Na wo mukum waya sé tou ang karapi in da'ica mengarapit.

⁶ Suliin-Na oka sé tou, iciit im pinengaéma' éra si esa wo si esa.

⁷ Sé tou le'tek mengaéma' sé loor sé masalé' makéré i rarayo wo in sisiri' wo ing katouan sé ra'ica maka'pu, séra wéan-Na oka ing katouan akar ing kauré-uré.

⁸ Taan sé tou menonou toronake' in owak éra in esa wo ra'ica le'tek mengaéma' in sususuien wutul-Na wo sé asalo mengéma-ngéma' sé léwo', séra icae'bow-Na keli.

⁹ Pakasa in tou sé masalé'ke' mengéma-ngéma' sé léwo' sumangkum oka ing kasusaan wo ing kawenduan; kataré-taré sé tou Yahudi wo ka'i sé tou ra'ica Yahudi.

¹⁰ Taan pakasa in tou sé masalé' mengéma-ngéma' sé loor wéan-Na oka rarayo wo in sisiri' wo ing kaeluran; kataré-taré sé tou Yahudi wo ka'i sé tou ra'ica Yahudi.

¹¹ Ampa'paan pakasa en tou puté waya an dior i Amang Kasuruan.

¹² Sa sé tou ra'ica Yahudi méma' ing kamesé-meséaan taan séra ra'ica makailek in ukum Torat, séra makéré oka ukuman ra'ica iciit in atoran-atoran an ukum Torat. Wo sé tou Yahudi sé makailek in atoran-atoran an ukum Torat wo mengaéma' ing kamesé-meséaan, séra ukumen oka iciit in atoran-atoran an ukum Torat.

¹³ Ampa'paan ra'ica sé tou e malinga in ukum Torat sé wutul an dior i Amang Kasuruan, taan sé tou mengaéma' in atoran-atoran an ukum Torat ituo sé anggapen wutul an dior i Amang Kasuruan.

¹⁴ Sé tou ra'ica Yahudi, séra ra'ica makailek in ukum Torat. Taan sa émaan éra tanu en aiperénta an ukum Torat ampa'paan ing kasalé'an éra in esa, en itu itumuru' sapaoka en até éra makaileko si wisa si ro'na émaan wo si wisa si ra'ica toro émaan, mandé ka'i en ukum Torat itu ra'ipé' kailekan éra.

¹⁵ Anaé, asé peri éra ituo, imééo tuus sapaoka en ukum Torat itu aipatico an até éra. Em pakawerot éra sumangkum mengaséa' in owak in esa, sumangkum ka'i mengawutul in owak in esa, en itu aituru' in até weresi éra.

¹⁶ Tanu siituo e imamuali asi endo kaka'puan ing kayo'baan sa. Asi endo itu si Amang Kasuruan méé kawasa a si Kristus Yesus e makim waya sé icaenep an até é tou wo sé pawero-weroten é tou. Siituo sé ipakuaku iciit in Abar Kaaruien andumoro' i Yesus Kristus.

Sé tou Yahudi makailek in ukum Torat taan ra'ica pengaémaan éra

¹⁷ Taan intarépé' tambisa réén wo icamu in esa? Kamu mangaku tou Yahudi wo mamangén an ukum Torat. Wo ka'i matirayo ampa'paan paweroten iow sapaoka kamu tou ipaupu-upus i Amang Kasuruan.

¹⁸ Paweroten iow ka'i sapaoka kamu makaileko ing kasalé'an i Amang Kasuruan ampa'paan sinusuianno in ukum Torat, akar kamu ro'na numilai si wisa si wutul wo si wisa si ra'ica wutul.

¹⁹ Wo paanggapen iow sapaoka kamu tou maakin sé tou wola wo sendot a sé tou ang kariréimbengan.

²⁰ Paanggapen iow sapaoka kamu guru a sé tou bodok wo guru a sé tou ra'ipé' makailek in sususuien wutul. Ampa'paan paanggapen iow sapaoka kamu makaileko in ukum Torat wo maanggap pandéi wo makaileko in sususuien wutul.

²¹ Sé tou walina pasusuian iow, taan kéitu réén kamu ra'ica masusui in owak iow in esa? Em pasusui iow: “Tioo marombit,” kéitu réén kamu in esa marombit?

²² Em pasusui iow ka'i: “Tioo mengabersina,” kéitu réén kamu in esa mengabersina? Kamu marica a sé im pakasa sé opo-opo', kéitu réén kamu in esa marombit im barang-barang am balé-walé é opo-opo'?

²³ Iparayo miow sapaoka kamu makaileko in ukum Torat. Taan kamu in esa mengaroros i ngaran i Amang Kasuruan ang karapi in da'ica makiit in ukum Torat itu.

²⁴ Ang Kitap Le'nas awéan aipatic in tana'i, “Ampa'pa- ano kamu tou Yahudi, akar e ngaran i Amang Kasuruan paojaten é tou walina.”

En andumoro' in sunat

²⁵ Pakasa sé tou Yahudi sinunato. Sa kamu le'tek mengaéma' in ukum Torat, en sunat itu awéan torona. Taan sa kamu ra'ica mengaéma' in ukum Torat, en sunat iow itu ra'ica wana torona ai camu.

²⁶ Anaé, sa sé tou ra'ica Yahudi mengaéma' in ukum Torat, mandé séra ra'ica sinunat, tantu séra teriman i Amang Kasuruan mamuali tou-Na tanu sé tou sinunato.

²⁷ Wo in taniitu sé tou ra'ica Yahudi mandé séra ra'ica sinunat, taan sa séra mengaéma' in ukum Torat, séra oka en tumuru' ing kameséaan iow tou Yahudi. Ampa'paan kamu, mandé sinunato taan ra'ica mengaéma' in ukum Torat sé aipatico itu.

²⁸ Ampa'paan, sé wutu-wutul patuulen tou Yahudi, ra'ica ampa'paan ketounake' mai mamualio tou Yahudi. Wo sé wutu-wutul patuulen sunat, ra'ica ampa'paan sia itu wutu-wutul sinunato.

²⁹ Taan sé wutu-wutul patuulen tou Yahudi, sé tou imamualio Yahudi an untep in aténa. Wo sé wutu-wutul patuulen sunat, ra'ica ampa'paan sinunato kumiit in atoran sé aipatic an ukum Torat, taan ampa'paan en até éra rinobao i Roh i Amang Kasuruan. Sé tou tanu siitu makéré oka i rarayo asi Amang Kasuruan ra'ica a sé tou owo.