Roma 14 - En Taar Weru a nunuwu' é Tontemboan

Tioo mengawéé ing kaséaan a sé poo-poow esa paémanen

¹ Terimano mangé' si tou ra'ipé' keter em paémanenna wo tioo meindo-indoan roma' wo isia andumoro' in sapa em paémanenna.

² Awéan tou mapercaya sapaoka pakasa eng kakanen ro'na kanenna. Taan si tou ra'ipé' keter em paémanen, pawerotenna sapaoka si ro'na kanenna wayake' in lala-lalaina sé ro'na pengaséndéén.

³ Si tou ro'na kuman pakasa ing kakanen tioo mengaséro' si tou kuman in séndéénke'. Taniitu ka'i si tou kuman in séndéénke', tioo mawéé kaséaan a si tou mengakan pakasa ing kakanen, ampa'paan si tou itu tinerimao i Amang Kasuruan.

⁴ Si séi réén kamu akar kamu mengawéé kaséaan a sé tou maselewir sé tou walina? Wayake' si tuangna en awéan hak en tumantu si maselewir itu wutul kuma'pa meséa'. Wo si maselewir itu ra'ica icalepok ampa'paan si Casuruan makakawasa tumawang sia.

⁵ Wo awéan tou maanggap sapaoka si esa endo en lébé pentingai wo sé endo walina, taan sé walina maanggap sapaoka pakasa en endo puté waya. Iwayao mangé si esa wo si esa tou musé' in itu iciit im paémanenna.

⁶ Si tou maanggap si esa endo en lébé pentingai wo sé endo walina, niéma'na en itu e rumayo wo sumiri' si Casuruan. Wo si tou ro'na kuman pakasa ing kakanen, niéma'na en itu e rumayo wo sumiri' si Casuruan, ampa'paan an tutuw ra'ipé' icuman, sia mééo i makapulu'sama' a si Amang Kasuruan. Wo si tou kuman in séndéénke', niéma'na en itu e rumayo wo sumiri' si Casuruan wo sia ka'i kumua i makapulu'sama' a si Amang Kasuruan.

⁷ Ampa'paan ra'ica wana esaan tou' an unerta i menonou asaloke' in owakna in esa, wo ra'ica wana esa tou ka'i e maté asaloke' in owakna in esa.

⁸ Sa kita menonou, kita menonou torona i Casuruan. Wo sa kita maté, kita maté torona i Casuruan. Anaé, menonou kuma'pa maté, kita anu i Casuruan.

⁹ Si Kristus imatéo wo itumou sumawel, wosama' Sia mamuali Kasuruan é pakasa in tou sé menonoué' wo sé imatéo.

¹⁰ Anaé, tioo kamu mengawéé ing kaséaan a sé poo-poow an esa paémanen. Wo tioo kamu maséro' a sé poo-poow an esa paémanen. Ampa'paan kita im baya mai tumulung oka an dior i Amang Kasuruan en akimen asi endo kaka'puan ing kayo'baan.

¹¹ Ang Kitap Le'nas awéan aipatic in tana'i, “Yaku si Amang Kasuruan, Yaku wutu-wutul menonou, wo pakasa en tou maai oka kumundu rumayo wo sumiri' an dior-Ku, wo pakasa en tou mangaku oka sapaoka Yakuo si Amang Kasuruan.”

¹² Anaé, kita si esa wo si esa musti méé panowaten a si Amang Kasuruan andumoro' im pakasa sé niéma'tao.

Tioo mengasélé'kow sé poo-poow esa paémanen

¹³ Ampa'paano in itu tioo kita membém-béané' ing kaséaan si esa wo si esa. Taan aweso taré kamu rumaméjio ra'ica mengaéma' in andumoro' sé ro'na tumawér sé poo-poow an esa paémanen katawéran wo icasélé'kow.

¹⁴ Ampa'paan aku meesao ang karapi i Apo' Yesus, anaé kailekanku wo percayanku keli sapaoka ra'ica wana kakanen si ra'ica toro kanen; taan sa awéan e maanggap sapaoka awéan kakanen si ra'ica toro kanen, eng kakanen itu najis ai siake'.

¹⁵ Wo sa eng kakanen si paanggapen i poow iow an esa paémanen itu ra'ica toro kanen, wo kanen iow an diorna, en itu niéma'o miow sia sumakit en até. Eng kaangéanna, kamu ra'io menonou kumiit ing kaupusan. Anaé, tioo kamu maéma' im paémanen i poow iow an esa paémanen icasélé'kow ampa'paano ing kakanen iow, ampa'paan si Kristus matéo torona ka'i sia.

¹⁶ Ampa'paano in itu tioo iwaya miow sé loor ai camu itu, méma'ké' taré sé tou walina muruk i ngaran iow.

¹⁷ Ampa'paan sa si Amang Kasuruan mamuali kolano ang katouanta, eng kumataré-taré ra'ica andumoro' ing kakanen kuma'pa in elepen, taan andumoro' tumambisa mamuali tou nianggap wutul i Amang Kasuruan, menonou meelu-eluran wo sé kakélé tou, wo maaru-arui ampa'paan i Roh Le'nas.

¹⁸ Anaé, si séi mengaselewir a si Kristus tanu siitu, sia maruio in até i Amang Kasuruan wo ka'i pasiri-siriin é tou walina.

¹⁹ Ampa'paano in itu mayoo kita rumaméji mengaéma' andumoro' ing kaeluran wo membém-béan angé ing kaketeran im paémanen si esa wo si esa.

²⁰ Wo tioo kamu mengaléwo' sapa sé tinawoio i Amang Kasuruan ampa'paanke' ing kakanen! Pakasa eng kakanen ro'na kanen iow, taan sa eng kinan iow itu méma'ke' sé poo-poow iow an esa paémanen icasélé'kow, en tuusna itu kamu meséa'o.

²¹ Aweso taré kamu tioo mengakan in sama'na, kuma'pa mengaelep anggor, kuma'pa mengaéma' sapake' mangé sa en itu méma' si poow an esa paémanen meséa'.

²² Sa percayan iow em pengaémaan iow itu ra'ica meséa', émaano mangé en itu an diorke' i Amang Kasuruan wo torona in owak iow in esa. Pakakamangen sé tou ra'ica mendam i meséa' an tutuw sia méma' sapa si anggapenna wutul.

²³ Taan si tou marua-ruapé' wasa asi kakanen wo kuman ing kakanen itu, sia meséa'o an dior i Amang Kasuruan, ampa'paan ra'ica niéma'na kumiit im paémanenna. Sapake' mangé e niéma' i tou wo ra'ica kumiit im paémanenna, eng kaangéanna iméma'o ing kamesé-meséaan.