Matius 3 - En Taar Weru a nunuwu' é Tontemboan

Si Yohanes Mabaptis

¹ An tutuw itu si Yohanes Mabaptis mai an tana' kapayasan an Yudea wo icuana,

² “Mape'diso mangé ang kamesé-meséaan, ampa'paan eng Kakolanoan i Amang Kasuruan makatawio!”

³ En ulitna si Yohanes anioo si tou si aicuao i nabi Yesaya indior tana'i, “Awéan oka tou mengangko-ngangko' an tana' kapayasan, ‘Tu'tuleno en lalan torona i Casuruan, wo rondoren en lalan langkoian-Na.’ ”

⁴ Si Yohanes mapaké in juba niéma' am buuk i onta owo, em bengkalna niéma' ang kulit i binatang owo. Eng kakanenna komong wo wiluk é lampéran in talun.

⁵ An tutuw itu, keli en tou mai a si Yohanes. Séra a mangé Yerusalem owo, am pakasa in Yudea, wo ka'i am pakasa in sangkum in doyongan Yordan.

⁶ Séra mai mangaku ing kamesé-meséaan éra, wo baptisen i Yohanes séra an doyongan Yordan.

⁷ An tutuw itu ka'i kelian tou Farisi wo Saduki mai a si Yohanes e mekibaptis. Taan aicuanake' ai séra, “Éi kamu tou léwo' kamu meputé wo si ula' rumacu-racung! Paweroten iow réén kamu ro'na icawekar an ukuman si maai sa?

⁸ Aweso taré kamu mengaéma'o mangé pakasa sé loor, tanu tuus kamu imape'diso ang kamesé-meséaan.

⁹ Tioo kamu mawasa ro'na icawekar an ukuman ampa'paan kamu taranak i Abraham. Icuaku mangé ai camu, sé watu anio' ro'na émaan i Amang Kasuruan mamuali taranak i Abraham.

¹⁰ Em pati tinu'tulo an a'mut in tuura en tumongkéi in tuura sé ra'ica mengawéé wua'na loor wo tiya' an api.

¹¹ Baptisenku kamu ang karapi in dano, tanu tuus mape'diso ang kamesé-meséaan. Taan kekawus yaku, awéan si esa tou e maai, eng kawasa-Na lumébé mai wo yaku akar maalike' in sapatu-Na aku ra'ica patus. Baptisen-Na oka kamu ang karapi i Roh Le'nas wo in api.

¹² E ni'u ipataap ang kama-Nao. Weresin-Na oka em papisian im béné' wo umungen-Na em béné' loor am paumungan, taan sé wéné' pesel tunun-Na oka an api si ra'ica mape'de-pe'del.”

Si Yesus nibaptis i Yohanes

¹³ An tutuw itu, si Yesus an sangkum ing Galilea wo mangé an doyongan Yordan. Sia mangé a si Yohanes wosama' Sia ro'na baptisenna.

¹⁴ Wo icua i Yohanes a si Yesus. “Yaku em patus baptisen i Tuang, ra'ica yaku e maptis si Tuang.”

¹⁵ Wo isowat i Yesus ai sia, “Mandéo ico e maptis Yaku. Wo in taniitu niéma'tao eng kasalé'an i Amang Kasuruan.” Kelinga in itu, kiitan i Yohanes en aicua i Yesus.

¹⁶ Kumawusai nibaptis, si Yesus makala'us kumesot an dano wo asi témpo ituke' en langit mawuka' wo kaséréan-Na e Roh i Amang Kasuruan tanuoka mombo tumumpa mai ai Sia.

¹⁷ Wo kalingaan en suara an sorga owo makua, “Si anioo si Toyaang-Ku, si caupus-Ku. Siao e mengaarui in até-Ku.”