Matius 28 - En Taar Weru a nunuwu' é Tontemboan

Si Yesus tumou sumawel

¹ Kelangkoi angé in endo Sabat, an tutuw imatawio mando asi endo kataré in duminggu itu, si Maria Magdalena wo si Maria walina mangé suméré ing kubur i Yesus.

² Wo tumarépé'- anke'mai awéan pangéro' repet. Ampa'paan awéan esa malaékat i Casuruan tumumpa an sorga owo mai miléi im batu aipénet ing kubur itu wo sia lumukut am bawo im batu itu.

³ En amona masendot tanuoka télang ing kilat, wo eng karaina kulo' tanuoka in salju.

⁴ Sé suraro makatéir am bitu gume'ger in indé' akar séra tanuoka sé tou imatéo.

⁵ Icua i malaékat a sé wéwéné itu, “Tioo kamu maindé'! Kailekanku kamu maéré-éré si Yesus si aisalip itu.

⁶ Sia ra'io am bia'i, Sia itumouo sumawel tanu sé sumangkumo aicua-Na. Mayo, séréno mai en tinekelan i mayat-Na.

⁷ Anaé, mario-rioro mangé kamu eng kumua a sé murit-Na sapaoka Sia itumouo sumawel an uner é tou é matéo. Wo Sia irumioro mangé ai camu ang Galilea. A mangé mbitu oka kaséréan iow Sia. Ta'néieno waya sé aicuaku anio' ulit!”

⁸ Wo makala'us itela'u éra eng kubur itu ang karapi in indé' wo uli-ulit arui. Séra repet matéron mangé kumua waya in itu a sé murit i Yesus.

⁹ Tumarépé'anke'mai si Yesus ipeta'upo éra wo kumua, ‘Siri' ai camu’. Wo susuten éra Sia, keresen éra eng kécéi-Na wo kumuru en sumiri' Sia.

¹⁰ Wo icua-Na ai séra, “Tioo maindé'. Mangéo icua miow a sé poo-poow-Ku, wosama' séra mangé ang Galilea. A mangé mbitu oka sérén éra Aku.”

Katowo-towoan é Mahkamah Agama

¹¹ Ang karoro'an é wéwéné itu mawaya' maangé a sé murit i Yesus, piraan suraro sé makatéir ing kubur-Na maréng an Yerusalem. Wo icua é suraro a sé kikiiten é imam pakasa e imamuali.

¹² Sé kikiiten é imam wo sé matu'a é tou Yahudi mali'us mepaar, em pinepusé' éra e méé roit keli a sé suraro itu,

¹³ wo icua éra a sé suraro itu, “Musti icua miow a sé tou in tana'i, ‘Sé murit i Yesus mai ang katoora im bengi e rumombit i mayat-Na an tutuw ami kinakili'an.’

¹⁴ Wo sa kalingaan i gubernur en anio', icami oka e numuwu' ai sia wosama' kamu ra'ica ukumen.”

¹⁵ Wo indon é suraro itu en doit wo émaan éra tanu si airu'du' ai séra. Wo akar intarépé' ipasisil é tou Yahudi sapaoka e mayat i Yesus rinombit é murit-Na.

Si Yesus mutus sé murit-Na

¹⁶ Sé sangapulu' esa murit i Yesus mangé ang Galilea asi esa tolaina tanu si airu'du' i Yesus en angéan éra.

¹⁷ Icateka' mangé am bitu, kaséréan érao si Yesus wo séra kumundu en sumiri' Sia, taan awéané' piraan tou sé ra'ipé' talos mercaya.

¹⁸ Susuten i Yesus séra wo icua-Na “Tinerima-Kuo waya eng kawasa an sorga wo ang kayo'baan.

¹⁹ Ampa'paano in itu, mangém am pakasa im bangsa, wo émaano mangé séra mamuali murit-Ku. Baptiseno mangé séra ang karapi ngaran i Amang, i Toyaang wo i Roh Le'nas.

²⁰ Wo susuiano mangé séra wosama' émaan éra waya sé aiperénta-Ku ai camu. Pena'né-na'néieno mangé, Yaku kasake' ang karapi miow akar ing kaka'puan ing kayo'baan.”