Matius 27 - En Taar Weru a nunuwu' é Tontemboan

Si Yesus an dior i Pilatus

¹ Matawio i mando pakasa sé kikiiten é imam wo sé matu'a é tou Yahudi mali'us e meesa an léwo' e maté si Yesus.

² Wa'kesen éra Sia wo iwali éra mangé en isarakan a si Pilatus, si gubernur am bitu.

Si Yudas maté rumantong in owak

³ An tutuw ing kailekano i Yudas Iskariot, si tou isumarakan si Yesus sapaoka si Yesus pinusé'o in ukumen patén, maneselo sia. Wo iwaréngna sumawel sé telu ngapulu' roit pérak a sé kikiiten é imam wo a sé matu'a é tou Yahudi.

⁴ Icua i Yudas, “Yaku méma'o ing kamesé-meséaan ampa'paan aisarakankuo am papaté si Tou ra'ica wana kamesé-meséaan.” Taan icua éra, “En itu urusanmu in esa ra'ica urusan ami!”

⁵ Wo iwangkil i Yudas en doit pérak itu am Balé Le'nas. Wo itela'una en tampa itu wo sia mangé rumantong in owak.

⁶ Wo pitongen é kikiiten é imam en doit pérak itu wo icua éra, “En doit anio' ra'ica toro yuntep am pawetaan i raragés am Balé Le'nas ampa'paan en doit anio' roit in enda'.”

⁷ Kumawusai séra menuwu', en doit itu aiteles éra tana' a si tou maéma' im bela- ngang kuré'. Wo en tana' itu émaan éra pengakuburan é tou ra'- ica Yahudi sé imaté an sangkum éra.

⁸ Ampa'paano in itu, akar intarépé' en tana' itu patuulen é tou Tana' in Enda'.

⁹ Wo in taniitu, imalekepo sapa en aicua i nabi Yeremia, tana'i, ‘Tinerima éra sé telu ngapulu' roit pérak, siituo em bééna i esa Tou iciit in aitantuo é tou Israel.

¹⁰ Wo pakén éra en doit itu tumeles tana' asi tou maéma' im belangang kuré'. Telesen éra en tana' itu meputé si aicua i Amang Kasuruan a yaku.’

Si Yesus an dior i Pilatus

¹¹ Wo iwali éra si Yesus ipeta'up wo si Pilatus. Wo wuéienna a si Yesus, “Ulit réén Ico si Colano é tou Yahudi?” Isowat-Na, “Si amango in esa eng kumua in itu.”

¹² Taan pakasa sé patudu é kikiiten é imam wo sé matu'a é tou Yahudi a si Yesus, ra'ica wana en sinowat-Na.

¹³ Wo icua i Pilatus a si Yesus. “Lininga-Muo waya kelian sé patudu éra ai Co?”

¹⁴ Taan si Yesus makapeneske', Sia ra'ica imasowa-sowat akar si gubernur mangaya-ngaya'ka'.

Si Yesus makéré in ukuman patén

¹⁵ Susur in endo wangko' Paska, imamualio kanaramen i gubernur mengawekar esa tou si pakabuin kiit ing kasalé'an é tou Yahudi.

¹⁶ Wo asi témpo itu, an untep im bui awéan si esa tou makangaran Yesus Barabas, ra'io icakua eng kaléwo'na.

¹⁷ Wo an tutuw é tou Yahudi mali'uso mai am balé i Pilatus, wo wuéienna ai séra, “Si séi en icasalé' miow iwekarku? Si Yesus Barabas kuma'pa si Yesus si patuulen Kristus?”

¹⁸ Sia mamuéi in taniitu, ampa'paan kailekanna sapaoka aisarakan é kikiiten é tou Yahudi si Yesus ampa'paan séra mangana-nganat ai Sia.

¹⁹ Ang karoro'an i Pilatus makalukut am paakiman wo mai en taar si aicirim i penanaanna ai sia, “Tioo ko marambét am perkara i Tou wutul itu, ampa'paan Siao akar aku kawengi mangipi léwo'.”

²⁰ Taan émaan é kikiiten é imam wo sé matu'a é tou Yahudi wosama' sé tou keli meesa mangilek a si Pilatus wosama' iwekarna si Barabas wo si Yesus ukumen patén.

²¹ Wo wuéien i Pilatus a sé tou keli, “Asé rua tou itu, si séi en icasalé' miow iwekarku?” Isowat éra, “Si Barabas!”

²² Wo wuéien sumawel i Pilatus ai séra, “Sa taniitu, sapa e musti émaanku a si Yesus, si patuulen Kristus?” Séra im baya mangko', “Isalipo Sia!”

²³ Wuéien ka'i i Pilatus ai séra, “Sapa réén eng kaléwo-léwo'an niéma'-Na akar Sia isalip?” Taan makarepetke' taré séra maangko', “Isalipo Sia!”

²⁴ Kailekano i Pilatus sapaoka pakasa e niéma'na ra'ica wana torona wo ka'i sé tou tumo'tolo maéma' ing kalicokoan, wo sia mindo rano, mu'as ing kamana an dior é tou keli wo icuana, “Ra'- ica wana eng kameséaanku andumoro' im papaté i Tou anio', en itu urusan iow in esa.”

²⁵ Wo isowat é tou keli itu, “Mandéo icami wo sé toyaang ami e mamuléng andumoro' im papaté i Tou anio'.”

²⁶ Kelinga in itu, wo iwekarna si Barabas torona éra, taan peréntanna sé pengawal sumambok si Yesus wo isarakanna e mangé isalip.

Si Yesus paséro-séro'

²⁷ Kumawus in itu, si Yesus iwali é suraro i Pilatus an istana i gubernur. Wo towan éra waya sé suraro mali'us lumi'cir si Yesus.

²⁸ Wukaan éra eng karai-Na wo Sia karaian éra in juba pares.

²⁹ Wo émaan éra esa mahkota am panga-pangana rintek tutunéan wo ipaké éra an do'kos i Yesus, wo wéan éra kéndo' esa weka' ang kama kakan-Na. Wo séra kumundu an dior-Na en suméro' Sia, “Siri' a si colano é tou Yahudi!”

³⁰ Ruraan éra Sia, wo indon éra em beka' ai Sia wo ipangkur éra an do'kos-Na.

³¹ Kumawusai séra menéro-néro' Sia wo wukaan éra en juba pares si pakakaraien-Na wo karaian éra sumawel ing karai-Na kataré. Wo iwali éra mangé Sia ang kesot ing kota e mangé isalip.

Si Yesus aisalip

³² An tutuw éra imawaya' kumesot in Yerusalem, ipesungkul éra si esa tou Kirene makangaran Simon. Wo leséén é suraro sia muléng in salip i Yesus.

³³ Wo icateka'o mangé séra an esa tampa makangaran Golgota, eng kaangéanna ‘Tampa Ru'i in Do'kos.’

³⁴ Am bitu Sia wéan éra elepen anggor kinemu in aperu. An tutuw kananaman-Nao en anggor itu, ra'ica kiim-Na melep.

³⁵ Kekawus éra sumalip Sia, wéténgen éra eng karai-Na ang kerapi in lumotréi.

³⁶ Wo séra lumukut am bitu en tuméir Sia.

³⁷ An dangka' in do'kos-Na awéan papang pinatican in tana'i, ‘Si anioo si Yesus, Kolano é tou Yahudi,’ ampa'paano in itu Sia niukum.

³⁸ Isalip éra ka'i rua tou léwo' si esa ang kakan i Yesus wo si esa ang ka'biri-Na.

³⁹ Sé tou malangkoi am bitu maojat Sia wo menguré-ngurésé in do'kos.

⁴⁰ Icua éra ai Sia, “Éi! Icua-Mu kiné Ko ro'na tumongkar im Balé Le'nas wo wangunen-Mu sumawel asi telu ngandoke'. Sa uli-ulit Ko Toyaang i Amang Kasuruan, tumumpao mai asi salip itu wo lowireno en owak-Mu in esa.”

⁴¹ Taniitu ka'i sé kikiiten é imam, sé makailek wutul in Torat wo sé matu'a é tou Yahudi maséro' Sia. Icua éra,

⁴² “Tou walina ro'na lowiren-Na taan en owak-Na in esa ra'ica kalowiran-Na! Sa Sia Kolano é tou Israel, tantu Sia tumumpao mai asi salip itu, wo in taniitu ro'na percayan ami Sia.

⁴³ Sia maéman a si Amang Kasuruan, wo isumangkumo icumua sa Sia itu Toyaang i Amang Kasuruan. Anaé, intarépé' mandéo Sia lowiren i Amang Kasuruan, sa icasalé'-Na.”

⁴⁴ Taniitu ka'i sé rua tou léwo' sé aisalip mewali-wali wo Sia, séra maséro' tanu siitu ai Sia.

Si Yesus maté

⁴⁵ Tumo'tol asi jam duabelas, pakasa in sangkum in tampa itu mariréimbeng akar asi jam tiga im bawaando.

⁴⁶ Jam tiga wona' im bawaando, si Yesus mangko' repet, “Eli, Eli lama sabakhtani?” eng kaangéanna, “Amang Kasuruan-Ku, Amang Kasuruan-Ku, kéitu aitela'u-Mu Aku?”

⁴⁷ Kelinga in itu, piraan tou sé makatulung am bitu kumua, “Lingan iow, Sia matowa si Elia.”

⁴⁸ Wo awéan esa tou ai séra mario-riorai mindo im bungang karang si bungang meputé wo ing kapés, ramesenna in anggor esem wo itopokna an tempok i rondora in saraw wo iwééna mangé am ba'ba' i Yesus en se'sepen-Na.

⁴⁹ Taan icua é tou walina, “Tioo! Séréntapé' séi si makailek si Elia maai en lumowir Sia.”

⁵⁰ Wo si Yesus mangko' repet, kekawus in itu isarakan-Nao e mu'kur-Na.

⁵¹ Sérén, eng kaéng pengakawu' si aiwérén am Balé Le'nas mawirang maperua tumo'tol an dangka' akar an darem. Wo awéan ka'i pangéro' repet akar en tolaina wawatuan maweté'.

⁵² Eng kubu-kubur mawuka' wo kelian tou le'nas sé imatéo tinou sumawel.

⁵³ An tutuw i Yesus itumou sumawel, séra kumesot ang kubur wo mangé muntep an Yerusalem si patuulen kota le'nas, wo mapaturu' in owak éra a sé tou keli.

⁵⁴ Si kikiiten é suraro wo sé surarona sé makatéir si Yesus, séra maindé' keli an tutuw i makaséré im pangéro' repet wo pakasa sé mamuali. Wo icua éra, “Si Tou anio', uli-ulit Toyaang i Amang Kasuruan!”

⁵⁵ Wo am bitu ka'i kelian wéwéné sé makaséré an tayang, sérao sé wéwéné makii-kiit si Yesus tumo'tolke' mai ang Galilea owo e sumelewir Sia.

⁵⁶ An uner éra awéan si Maria Magdalena, Maria inang i Yakobus wo si Yusuf, wo ka'i penanaan i Zebedeus.

E mayat i Yesus aicubur

⁵⁷ Matawio im bengi, mai si esa tou siya' makangaran i Yusuf tou Arimatea. Sia ka'i imamualio murit i Yesus.

⁵⁸ Sia mangé meta'up wo si Pilatus wo pangilekenna e mayat i Yesus. Wo iru'du' i Pilatus wosama' e mayat i Yesus iwéé ai sia.

⁵⁹ Wo indon i Yusuf e mayat i Yesus saputenna ing kaéng lénen kulo' weresi.

⁶⁰ Wo mangéna icubur e mayat i Yesus am bo'bok si aiwu'bu' asi tolaina wawatuan. Eng kubur itu anu i Yusuf wo pakaémaané'. Wo wiléina esa watu wangker em pénet ing kubur itu, wo tela'una en tampa itu.

⁶¹ Taan si Maria Magdalena wo si Maria walina mento' am bitu makalukut an dior ing kubur itu.

Eng kubur i Yesus pakatéiran

⁶² Mando mai, asi endo Sabat, sé kikiiten é imam wo sé tou Farisi mangé meta'up a si Pilatus,

⁶³ icua éra, “Tuang gubernur, kinata'néian amio, an tutuw si mengasélé'kow itu menonou, sumangkumo icua-Na in tana'i, ‘Kekawus in telu ngando Aku imaté, Yaku tumou oka sumawel.’

⁶⁴ Ampa'paano in itu, pekiupusen ami, ru'du'o mangé suraro en tuméir ing kubur i Yesus akar asi endo katelu. Sa ra'ica téiran, e mayat-Na ro'nake' mai rombiten é murit-Na wo ipakua-kua éra oka a sé tou sapaoka si Yesus itumou sumawel an uner é tou imatéo. Eng kasiwakana, lébé keli ka'i en tou sé sumélé'kow oka, wo an tutuw-Na imenonou.”

⁶⁵ Wo icua i Pilatus ai séra, “Wééku oka sé suraro anio' ai camu. Mangéo wo téiran sumama-sama' eng kubur itu.”

⁶⁶ Wo séra mewali-wali wo sé suraro mangé ang kubur itu. Wéan éra ségél em batu aipénet ing kubur itu, wo ipapatéir éra a sé suraro.