Matius 25 - En Taar Weru a nunuwu' é Tontemboan

En andéan andumoro' sé mangala'un pandéi wo sé mangala'un bodok

¹ “Eng Kakolanoan in Sorga meputé wo in andéan anio': awéan sangapulu' mangala'un mindo in sosoloan mangé sumungkul si tuama kumawéng.

² Sé mangala'un itu, lima sé bodok wo lima sé pandéi.

³ Sé lima mangala'un bodok maali-ali in sosoloan taan ra'ica tumu'tul in solo.

⁴ Wo sé lima mangala'un pandéi maali-ali in sosoloan wo tumu'tulo ka'i in solo am botel éra.

⁵ Taan ampa'paan si tuama kumawéng itu uré-uréanai, sé sangapulu' mangala'un itu makili'o keli akar séra kinakili'ano.

⁶ Ang katoorao im bengi, kalingaan éra awéan tou maangko' in tana'i, ‘Si tuama kumawéng maayo! Mayo sungkulenta sia!’.

⁷ Kelinga éra in itu, wo séra im baya tumooro wo tu'tulen éra en sosoloan wosama' loor en embungna.

⁸ Taan icua é mangala'un bodok itu a sé mangala'un pandéi, ‘Pekiupusen ami sa woo ro'na wéténganai solo kami mandé wayake' im pira, ampa'paan en sosoloan ami mape'delo.’

⁹ Taan aisowatke' é mangala'un pandéi in tana'i, ‘Ra'ica, oréoka en solo ra'ica maawes pakén ami wo pakén iow. Aweso taré kamu mangé tumeles a si tou mawangkér in solo.’

¹⁰ Wo sé mangala'un bodok itu mangé en tumeles solo. Taan ang karoro'an éra imangé tumeles solo, si tuama kumawéng icateka'o mai. Wo sé mangala'un pandéi tumu'tulo wo muntep mewali-wali wo si tuama kumawéng itu am pésta kawéngan, wo em papalen kusiin.

¹¹ An tutuw é mangala'un bodok maréngai, wo séra mangko', ‘Tuang! Tuang! Wukaanai em papalen.’

¹² Taan aisowatke' i tuama kumawéng itu, ‘Ra'ica katuusanku kamu.’ ”

¹³ “Ampa'paano in itu kamu matéi-téiro mangé, ampa'paan ra'- ica kailekan iow en endo wo en orasna si Toyaang i Tou maai sumawel.”

En andéan andumoro' in talenta

¹⁴ “Eng Kakolanoan in Sorga meputé wo si andéan anio': awéan si esa tou maya' manangkéi. An tutuwna ra'ipé' imangé, li'usenna sé atana wo itokéna ai séra eng kasiyaanna.

¹⁵ Si esa tinokéanna lima talenta, wo si esa tinokéanna rua talenta wo si esa ka'i tinokéanna in esa talenta iciit ing kawooan éra in esa, wo sia maya' manangkéi.

¹⁶ Si ata tinokéan in lima talenta makala'us mangé e mangkér, wo en untungna lima talenta.

¹⁷ Taniitu ka'i si ata tinokéana rua talenta. Sia ka'i mangé mangkér, wo en untungna ka'i rua talenta.

¹⁸ Taan si ata tinokéan in esa talenta, sia ka'i mangé wo en doit itu asaloke' aica'ilna an untep in tana' wo yenepna am bitu.

¹⁹ Uré-uréan si tuang éra itu ra'ica imawaré-waréng. Wo kewaréngna mai wo sia merékénano wo sé atana andumoro' in doit si aitokéna ai séra.

²⁰ Wo mai si ata tinokéan lima talenta wo isarakanna a si tuangna sangapulu' talenta. Wo icuana a si tuangna, ‘Tuang, yaku tinokéan i tuang lima talenta, sérén i tuang en untungku lima talenta.’

²¹ Wo icua i tuangna, ‘Wutu-wutul loor e niéma'mu itu. Ico ata loor wo le'tek a yaku. Ampa'paan ko ro'na tinokéan andumoro' sé teké', tokéanku oka ka'i ko andumoro' sé tawoien wangker. Muntepo mai ko wo mayo maaru-arui ang karapiku!’

²² Kumawus in itu, muntepai si ata tinokéan rua talenta, icuana, ‘Tuang, yaku tinokéan i tuang rua talenta. Sérénai, en untungku ka'i rua talenta.’

²³ Wo icua i tuangna, ‘Loor ulit e niéma'mu itu. Ico ata loor wo le'tek a yaku. Ampa'paan ko ro'na tinokéan andumoro' in tawoien teké', tokéanku oka ka'i ko andumoro' sé tawoien wangker. Muntepo mai ko wo mayo maaru-arui ang karapiku!’

²⁴ Wo mai ka'i si ata tinokéan in esa talenta, icuana, ‘Tuang, kailekanku si tuang tou bengis. Si tuang maupu' an uma si ra'ica winurasan i tuang in lulumbo wo mengaindo im buéna an uma si ra'ica niusewan i tuang.

²⁵ En caindé'ku oréoka en doit i tuang icatala, anaé en doit itu ayenepku an untep in tana'. Nio', indono sumawel en doit i tuang.’

²⁶ Wo icua i tuangna, ‘Éi, ata léwo' wo ra'ica kiim tumawoi. Kailekanmuo sa aku mengaupu' an uma si ra'ica winurasanku in lulumbo wo mengaindo im buéna an uma si ra'ica niusewanku.

²⁷ Sa taniitu, aweso taré woo en doitku itu ayéma'mu am bank wosama' kewaréngku mai ro'na indonku en doit itu ang karapio i rénténa.’

²⁸ Wo icua i tuang itu a sé ata walina, ‘Indono en doit itu ai sia wo iwééo mio' a si ata si makaanu in sangapulu' talenta.

²⁹ Anaé, sé tou ro'na patokéan in sapake' mangé, séra wéan oka lébé keli mai. Taan sé tou ra'ica toro patokéan in sapake' mangé, sapake' sé ai séra pakaindo-indon oka.

³⁰ Wo si ata ra'ica iméma' in sapa-sapa, iwangkilo mangé sia an tampa riréimbeng. A mangé mbitu oka sia maamé' wo mengare-ngare'ket im baang.’ ”

Sé tou akimen asi endo kaka'puan ing kayo'baan

³¹ “Sa si Toyaang i Tou maai ang karapi i rarayo wo in sisiri'-Na mewali-wali wo sé malaékat-Na, Sia lumukut oka am palukutan pasiri-siriin.

³² Wo pakasa im bangsa li'usen oka an dior-Na, wo petanén-Na séra mamuali rua ngaumung, meputé wo si gembala itumané sé domba an uner é mémbé'.

³³ Sé domba iweta'-Na oka ang kakan-Na wo sé mémbé' ang ka'biri-Na.

³⁴ Wo si Toyaang i Tou si tanu Kolano itu kumua oka a sé tou ang kakan-Na, ‘Mayo sumusuto mai kamu sé kinamango i Amang-Ku! Muntepo mai ang Kakolanoan si aitu'tulo ai camu tumo'tolai eng kayo'baan anio' niéma'.

³⁵ Ampa'paan an tutuw-Ku i maarem, winéan iow kanen Aku, an tutuw-Ku maré'om, winéan iow elepen Aku. An tutuw-Ku tanu sakéi an doong iow, tinowa miow Aku tumuli am balé miow.

³⁶ An tutuw-Ku ra'ica mekarai, winéan iow karai Aku, an tutuw-Ku sumakit, pakatéiran iow Aku. An tutuw-Ku an untep im bui, pengasérén iow Aku.’

³⁷ Wo sé tou nianggap wutul i Amang Kasuruan, kumua oka in tana'i, ‘Tuang, kawisa réén sinéré ami si Tuang maarem wo winéan ami kanen, kuma'pa si Tuang maré'om wo winéan ami elepen?

³⁸ Wo kawisa ka'i kami isuméré si Tuang tanu sakéi wo tinowa ami tumuli am balé ami? Kuma'pa sinéré ami si Tuang ra'ica mekarai wo winéan ami karai?

³⁹ Wo kawisa sinéré ami si Tuang sumakit kuma'pa an untep im bui wo mai ami sérén?’

⁴⁰ Wo isowat oka i Colano ai séra in tana'i, ‘En ulitna icua-Ku ai camu, pakasa sé niéma' miow a si esaan asé poow-Ku si pawawa-wawa', niéma'o miow en itu torona-Ku.’

⁴¹ Wo icua-Na oka ka'i a sé tou ang ka'biri-Na, ‘Kamu itu sé tou kinutuko. Tumayango mangé kamu an dior-Ku wo mangé muntep an api ra'ica mape'de-pe'del akar ing kauré-uré an tampa si aitu'tulo torona i kikiiten é sétang wo sé makiit sia.

⁴² Ampa'paan an tutuw-Ku i maarem, ra'ica winéan iow kanen Aku. An tutuw-Ku i maré'om, ra'ica winéan iow elepen Aku.

⁴³ An tutuw-Ku ka'i tanu sakéi an doong iow, ra'ica tinowa miow Aku tumuli am balé miow. An tutuw-Ku ra'ica mekarai, ra'ica winéan iow karai Aku. An tutuw-Ku sumakit kuma'pa an untep im bui, ra'ica mai sinéré miow Aku.’

⁴⁴ Wo isowat éra oka ai Sia in tana'i, ‘Kawisao réén sérén ami si Tuang maarem kuma'pa maré'om kuma'pa tanu sakéi an doong ami kuma'pa ra'ica mekarai kuma'pa sumakit kuma'pa an untep im bui wo ra'ica mai ami sérén?’

⁴⁵ Isowat-Na oka ai séra in tana'i, ‘En ulitna icua-Ku mangé ai camu, an tutuw iow ra'ica itumawang esaan asé poo-poow-Ku si ipawawa-wawa', en itu meputé kamu ra'ica itumawang Yaku.

⁴⁶ Sé tou léwo' anio' ukumen oka an tampa in okoien akar ing kauré-uré, taan sé tou nianggap wutul i Amang Kasuruan makéré oka ing katouan akar ing kauré-uré.’ ”