Matius 2 - En Taar Weru a nunuwu' é Tontemboan

Sé tou majus a micona owo

¹ Kekawus i Yesus aitou am Betlehem an tana' Yudea an tutuw i colano Herodes makatimboi ing kakawasaan, wo mayo sé tou majus a micona owo mai an Yerusalem.

² Séra memué-muéi, “Am bisa Sia, si colano é tou Yahudi si makatoué' itu? Sinéréo ami si sumesendot-Na a micona wo kami mai eng kumundu en sumiri' Sia.”

³ An tutuw i colano Herodes luminga in abar itu sia mangaya'ka', taniitu ka'i pakasa sé tou an Yerusalem.

⁴ Wo li'usenna waya sé kikiiten é imam wo sé makailek wutul in Torat. Wo wuéienna ai séra. “Am bisa réén en touan oka i Kristus?”

⁵ Wo icua éra ai sia, “Am Betlehem an tana' Yudea, ampa'paan tana'i en aipatic ang kitap i nabi.

⁶ ‘Ico Betlehem an tana' Yehuda, ico ra'io ka'i kota si tumeki-tekic an uner é kota an Yehuda, ampa'paan ai coo maai oka si esa Tou e merénta sé tou-Ku Israel.’ ”

⁷ Wo towan i Herodes ang kerapi maene-enep sé tou majus itu wo wuéienna i mareti-reti ai séra sa kawisa si sumesendot itu kaséréan.

⁸ Kekawus in itu, iru'du'na séra mangé am Betlehem. Icuana, “Mangém wo pangéréno sumama-sama' si Toyaang itu wo sa Sia aipeta'upo miow, yabaro mai a yaku wosama' aku ro'na mangé kumundu en sumiri' Sia.”

⁹ Kelinga in aicua i colano itu, maya'o séra. Sérén éra si sumesendot si sinéré éra a micona itu rumior ai séra akar icateka' wo mento' an dangka' im pakaento'an i Toyaang itu.

¹⁰ An tutuw éra isuméré si sumesendot itu, séra wutu-wutul arui.

¹¹ Wo séra muntep am balé itu, sérén éra si Toyaang itu ang karapi i Maria inang-Na. Wo séra kumundu wo kumuru en sumiri' si Toyaang itu. Wukaan éra en tampa pengaémaan ing kasiyaan wo iwéé éra eng kasiyaan éra tanu raragés ai Sia tanumai mas, kamenyan wo mur.

¹² Kekawus in itu, ampa'paan séra linupuan am pinangipi wosama' ra'ica toro maréng angé a si Herodes, anaé séra maréng an doong éra kumiit an lalan walina.

Em pamalé i Yusuf sumingkir angé a Mesir

¹³ Kewaréng angé é tou majus itu, mapaturu' mai si malaékat i Amang Kasuruan am pangipi i Yusuf wo kumua, “Tumooro, indono si Toyaang itu ang karapi i inang-Na, sumingkiro mangé a Mesir wo mentoo a mangé mbitu akar Aku numuwu' ka'i ai co. Ampa'paan pangérén oka i Herodes si Toyaang itu e maté Sia.”

¹⁴ Wo si Yusuf tumoor, indonna si Toyaang itu ang karapi i inang-Na wo asi wengi ituke' séra sumingkir angé a Mesir.

¹⁵ Wo séra mento' a mangé mbitu akar i colano Herodes maté. Pakasa en itu mamuali wosama' malekep sapa si aicua i Amang Kasuruan a si nabi, “Towan-Ku si Toyaang-Ku a Mesir owo.”

Sé toyaang teké' am Betlehem pinaté

¹⁶ An tutuw kailekano i colano Herodes sapaoka sia niuwako é tou majus, sia mae'bow keli. Wo iru'du'na pira-piraan surarona e mangé maté waya sé toyaang teké' am Betlehem wo in sangkumna, sérao sé toyaang tuama en umur éra ruao ngata'un wo sé ra'ipé' imalekep rua ngata'un, kiit in oras an tutuw sia mamuéi ang karapi i mareti-reti a sé tou majus itu.

¹⁷ Wo in taniitu imalekepo en Taar i Amang Kasuruan si aicua i nabi Yeremia.

¹⁸ “Ang kota Rama kalingaan en amé' wo en sesendu'an, kawendun oka mai. Amé'an i Rahel sé toyaangna. Wo ra'ica kiimna iboren, ampa'paan séra imatéo.”

Si Yusuf wo sé pamaléna maréng sumawel an Israel

¹⁹ An tutuw i Herodes maté, si malaékat i Amang Kasuruan mapaturu' mai am pinangipi i Yusuf a mangé Mesir.

²⁰ Icua i malaékat itu ai sia, “Yusuf, tumooro! Indono si Toyaang itu wo si inang-Na wo maréngo sumawel an tana' Israel. Ampa'paan séra sé mawasa maté si Toyaang itu imatéo.”

²¹ Wo si Yusuf tumoor paalinna si Toyaang wo si inang-Na itu mangé an tana' Israel.

²² Taan kelinga i Yusuf sapaoka si Arkelaus toyaang i Herodes en sumawel si amangna e mamuali kolano an Yudea, si Yusuf maindé'ke' maréng angé. Ampa'paan aisina'u am pinangipi, wo sia mangéke' an sangkum ing Galilea.

²³ Icateka' mangé séra ang Galilea, séra mento' ang kota makangaran Nazaret. Wo in taniitu, en taar sé aicua é nabi andumoro' i Toyaang itu imamualio: Sia tuulen oka “Tou Nazaret.”