Matius 17 - En Taar Weru a nunuwu' é Tontemboan

Si Yesus iparayo-rayo wo pasiri-siriin am puruk ing kuntung

¹ Wo kelangkoi angé in enem ngando, iwali i Yesus si Petrus wo sé rua metuari si Yakobus wo si Yohanes sumosor am puruk in esa kuntung rangka'. Am bitu waya iséra in telu ang karapi i Yesus.

² Wo sérén éra si Yesus imawalinao. Eng gio-Na matélang meputé wo in sendot i yéndo, wo eng karai-Na imakulo' masélap tanu in sendot.

³ Wo kaséréan éra si Musa wo si Elia memaa-maar ang karapi i Yesus.

⁴ Wo icua i Petrus a si Yesus, “Tuang, arui keli kami an tampa anio'. Sa icasalé' i Tuang, itoorku oka telu ténda am bia. Si esa torona i Tuang, si esa si Musa wo si esa ka'i si Elia.”

⁵ Ang karoro'ané' i Petrus maroma', tumarépé'anke' tumumpa mai eng kambung matélang wo lumoindong iséra. Wo ang kambung itu kalingaan awéan suara e makua, “Si anioo si Toyaang-Ku, si caupus-Ku, Sia mengaarui in até-Ku. Lingano mangé Sia.”

⁶ Kelinga é telu murit i Yesus in suara itu, maindé'o séra akar icaruinsum an tana'.

⁷ Wo séra timboian i Yesus wo kumua, “Tumulungo, tioo maindé'!”

⁸ An tutuw éra kumanat angé, ra'io wana tou walina eng kaséréan éra am bitu, waya oka si Yesus in esa.

⁹ An tutuw éra maperos ing kuntung, icua i Yesus ai séra, “Ra'ipé' toro icua miow a sé tou walina sapa en sinéré miow tarépé'! Icua oka miow en itu sa si Toyaang i Tou tumouo sumawel an uner é tou imaté.”

¹⁰ Wo wuéien é murit-Na ai Sia, “Sa taniitu, kéitu réén ipakua é makailek wutul in Torat sa si Elia owo e musti rumiorai wo si Mesias?”

¹¹ Isowat i Yesus ai séra, “Ulit en itu, si Elia e musti rumiorai en tumu'tul wo melur im baya-waya torona im paaian i Mesias.

¹² Taan icua-Ku ai camu, si Elia imayo, taan sia kiit katuusan é tou wo pinara'i-ra'i éra kiit ing kasalé'an éra. Taniituo ka'i en émaan éra oka a si Toyaang i Tou.”

¹³ Kelinga é murit-Na in aicua i Yesus, kaangéano éra sapaoka si Elia si pakua i Yesus itu, tumuru' si Yohanes Mabaptis.

Si Yesus sumama' in sakit i esa toyaang tuama

¹⁴ An tutuw i Yesus wo sé telu murit-Na meroso ing kuntung wo maréng sumawel an tampa é tou keli itu makali'us, awéan si esa tuama rumuru mai a si Yesus wo kumundu en sumiri' an dior-Na.

¹⁵ Wo icuana a si Yesus, “Tuang, icaupusai si toyaangku! Sia sumakit ayan wo wenduo keli. Sa tumou en sakitna, sia tatap mawalintuang an api kuma'pa an dano.

¹⁶ Sia aiwalikuo a sé murit i Tuang, taan ra'ica kawooan éra en sumama' isia.”

¹⁷ Wo icua i Yesus, “Éi camu tou léwo' wo tou ra'ica maéman! Akar kawisa réén Aku musti mewali-wali wo icamu? Wo akar kawisa Aku musti talesen ai camu? Paalino mai si toyaang itu!”

¹⁸ Wo peréntan i Yesus ang karapi in depet si sétang itu wo sia kumesot asi toyaang itu. Wo asi témpo ituke', si toyaang itu makala'us masama'.

¹⁹ Kumawus in itu, sé murit i Yesus sumusut ai Sia. An tutuw waya oka séra wo si Yesus en am bitu, wo wuéien éra, “Guru, kéitu réén ra'ica kawooan ami musér si sétang itu?”

²⁰ Wo isowat i Yesus ai séra, “Kamu ra'ica makawoo musér si sétang itu ampa'paan kamu ra'ica mauli-ulit maéman. En ulitna icua-Ku mangé ai camu, sa kamu uli-ulit maéman, mandé em paémanen iow waya ka'i in sangatekic puté im batuna tumeki-tekic, kamu ro'na rumu'du' si kuntung anio', ‘Icaérao mangé!’, tantu eng kuntung itu icaéra oka. Anaé, pakasa ro'na émaan iow, sa kamu uli-ulit maéman. [

²¹ Taan musti kailekan iow ka'i, si sétang tanu siitu ra'ica kawooan iow musér sa kamu ra'ica sumombayang wo muasa.]”

Si Yesus kumua ing karua andumoro' im papaté-Na

²² An tutuw i Yesus wo sé murit-Na makali'us ang Galilea, icua-Na ai séra, “Maai oka en témpona si Toyaang i Tou isarakan ang kakawasaan é tou léwo'.

²³ Wo Sia patén éra oka, taan asi endo katelu Sia touen oka sumawel.” An tutuw lingan éra en aicua-Na, en até éra mawendu keli.

Si Yesus mér im pajak im Balé Le'nas

²⁴ An tutuw i Yesus wo sé murit-Na icateka'o ang Kapernaum, wo mai sé matagi im pajak im Balé Le'nas mamuéi a si Petrus, “Si Gurumu mengawér im pajak im Balé Le'nas rua dirham kuma'pa ra'ica?”

²⁵ Wo isowat i Petrus ai séra, “Én, Sia mengawér.” Wo an tutuw i Petrus muntep am balé, sia rinioran i Yesus mamuéi “Simon, sa iciit ico, si séi e musti mengawér im pajak a sé kolano sé makatimboi ing kakawasaan ang kayo'baan anio'? Sé toyaang éra kuma'pa sé tou walina?”

²⁶ Wo isowat i Petrus, “Tantu sé tou walina.” Icua i Yesus ai sia, “Wutul en itu. Anaé sé toyaang éra in esa ra'ica musti mawér im pajak.

²⁷ Taniitu ka'i wo icita, kita ro'nake' ra'ica mér im pajak im Balé Le'nas. Taan, wosama' kita ra'ica mamuali watu pasangkilan é tou matagi im pajak im Balé Le'nas, aweso taré ko mangéo mesi sera' an lour, si sera' kataré pinesimu, indonmu wo wukaan em ba'ba'na wo kaséréanmu oka roit epat dirham. Indono mio' en doit itu wo mangéo iwéé a sé tou matagi im pajak em bér im pajakta in dua.”