Matius 16 - En Taar Weru a nunuwu' é Tontemboan

Sé tou Farisi wo Saduki mangilek tuus

¹ Wo mai sé piraan tou Farisi wo Saduki e mangepé' si Yesus. Pangileken éra wosama' ipapaturu'-Na ai séra esa tuus an sorga owo.

² Taan isowat i Yesus, “Asi wawaando kaséréan an langit awéan sendang i wolai, icua miow, ‘Makéré oka réén popas,’

³ wo asi mamoondo, sa en langit mariréimbengo, icua miow, ‘muran oka réén.’ En tuus sé kaséréan an langit ro'na kakailekan iow en itu mamuali, taan en tuu-tuus in jaman ra'ica kailekan iow.

⁴ Sé tou léwo' wo ra'ica le'tek anio' mangilek esa tuus. Sé tou tanu icamu ra'ica turu'an-Ku in esa tuus aluar in tuus si mamuali a si nabi Yunus.” Wo itela'u i Yesus séra wo mangé.

En andumoro' i ragi é tou Farisi wo Saduki

⁵ An tutuw é murit i Yesus lumewet in lour Galilea, séra ilumupake' maali roti.

⁶ Icua i Yesus ai séra, “Matéi-téiro wo maténga-téngamo andumoro' i ragi é tou Farisi wo Saduki.”

⁷ Kelinga in itu, séra memero-merot wo mengkung-kuanan a si esa wo sé walina, “En itu aicua-Na, ampa'paan kita ra'ica imaali roti.”

⁸ An tutuw kinailekan i Yesus sapa em pemaa-maaren éra, wo icua-Na, “Kéitu réén ipapaar iow andumoro' in da'ica wana roti? Éi camu sé tou ra'ipé' talos maéman!

⁹ Ra'ipé' réén kaangéan iow? Wo ra'io réén kata'néian iow andumoro' in lima roti sé kinan é lima ngariwu tou itu wo pira wantang e roti imatela'u sé niumung iow?

¹⁰ Kuma'pa andumoro' sé pitu roti kinan é epat ngariwu tou itu wo pira wantang e roti matela'u sé niumung iow?

¹¹ Tambisa réén akar ra'ica kaangéan iow sapaoka sé pengua-ngua-Ku ai camu ra'ica andumoro' i roti? Maténga-téngamo mangé andumoro' i ragi é tou Farisi wo Saduki!”

¹² An tutuw itu kaangéano éra sapaoka em peangé-angén i Yesus ra'ica maténga-téngam andumoro' i ragi roti itu, taan maténga-téngam andumoro' in sususuien é tou Farisi wo Saduki.

Pinangaku i Petrus sapaoka si Yesus ituo si Mesias

¹³ Kekawus i Yesus icateka' an sangkum ing Kaisarea Filipi, wuéien-Na a sé murit-Na, “Pakua é tou, si séi réén si Toyaang i Tou itu?”

¹⁴ Isowat éra, “Awéan sé makua si Yohanes Mabaptis, sé walina makua: Si Elia wo sé walina ka'i makua: Si Yeremia kuma'pa esaan angé asé nabi.”

¹⁵ Wo wuéien i Yesus ai séra, “Taan sapa en icua miow, si séi réén Aku anio'?”

¹⁶ Isowat i Simon Petrus, “Si Guruo si Mesias itu, si Toyaang i Amang Kasuruan si menonou!”

¹⁷ Icua i Yesus ai sia, “Pakakamangen ko é Simon toyaang i Yunus ampa'paan ra'ica sé tou en icumua in itu ai co, taan si Amang-Ku an sorga.

¹⁸ Icua-Ku ka'i ai co: Ico si Petrus wo am bawo im batu karang anio' tooran-Ku oka sé jamaat-Ku wo ra'ica kawisa kawasan im papaté.

¹⁹ Wéé-Ku oka ai co eng kukusi' ing Kakolanoan in Sorga. Sapa sé aiwa'kesmu ang kayo'baan anio' icawa'kes oka ka'i an sorga wo sapa sé iwekarmu ang kayo'baan anio' icawekar oka ka'i an sorga.”

²⁰ Wo péronen i Yesus sé murit-Na wosama' tioo ipakua-kua éra a si séike' mangé sapaoka Sia Mesias.

Si Yesus kumua ing kataré in andumoro' im papaté-Na

²¹ Tumo'tolai asi témpo itu, ipengua-ngua i Yesus a sé murit-Na sapaoka Sia musti maangé an Yerusalem, wo mamuléng oka ing keli kawenduan asé matu-matu'a é tou Yahudi, sé kikiiten é imam, sé makailek wutul in Torat owo, wo patén éra taan a si endo katelu Sia tumou sumawel.

²² Taan si Yesus winéso' i Petrus an tembir wo romaanna si Yesus, “Guru, si Guru ra'ica toro rumoma' tanu siitu! Sa woo ro'na itaya-tayang angé i Amang Kasuruan en itu! En itu ra'ica toro mamuali a si Guru.”

²³ Wo si Yesus suméléng wo kumua a si Petrus, “Tumayango ko é sétang! Icoo si esaan watu masangkil Yaku, ampa'paan ico ra'ica mawerot in sapa em paweroten i Amang Kasuruan, taan sapa em paweroten é tou.”

²⁴ Wo icua i Yesus a sé murit-Na, “Si séike' e masalé' kumiit Yaku, sia musti sumangkal in owakna, muléng in salipna wo kumiit Yaku.

²⁵ Ampa'paan si séi e masalé' lumowir ing katouanna, sia katalaan oka ing katouanna, taan si séi si katalaan ing katouanna ampa'paan Yaku, kéréanna oka eng katouan akar ing kauré-uré.

²⁶ Sapa en torona si esa tou makéré waya sé ang kayo'baan, taan katalaan ing katouan akar ing kauré-uré? Sapa réén e ro'na iwééna tanu sawel ing katouanna?

²⁷ Ampa'paan si Toyaang i Tou maai oka mewali-wali wo sé malaékat-Na ang kawasa wangko' i Amang-Na. An tutuw itu suliin-Na oka sé tou kiit im pinengaéma' éra.

²⁸ En ulitna icua-Ku mangé ai camu, an unér é tou sé lumili am bia'i, awéan sé ra'ipé' maté sa ra'ipé' isuméré si Toyaang i Tou maai tanu Kolano ang Kakolanoan-Na.”