Matius 15 - En Taar Weru a nunuwu' é Tontemboan

Em perénta i Amang Kasuruan wo ing kanaramen é tou Yahudi

¹ Awéan piraan tou Farisi wo sé makailek wutul in Torat an Yerusalem owo. Séra mai a si Yesus wo mamuéi,

² “Kéitu réén sé murit i Tuang ra'ica makiit ing kanaramen é apo-apo'ta? Séra kuman ra'ica mu'as ing kama.”

³ Taan icua i Yesus, “Kéitu réén kamu ka'i ra'ica makiit im perénta i Amang Kasuruan asaloke' makiit ing kanaramen é apo-apo' miow?

⁴ Ampa'paan aitaar i Amang Kasuruan: ‘Siriino mangé si amang wo si inangmu’, wo ‘Si séike' mangé eng kumutuk si amang kuma'pa si inangna, sia musti ukumen patén.’

⁵ Taan em pakua miow: Si séike' e makua a sé matu'ana, ‘Sapa e musti wééku a si amang wo a si inang, aiwéékuo a si Amang Kasuruan,’

⁶ ra'io sangali pandungenna eng kaperluan i amangna kuma'pai i nangna. Wo in taniitu, en taar i Amang Kasuruan ra'io pengakiiten iow, em pengakiiten iow asaloke' ing kanaramen iow.

⁷ Éi camu tou punek! Wutulo sapa en aicua i Yesaya andumoro' icamu,

⁸ ‘Em ba'ba' é bangsa anio' marayo-rayo Yaku, taan en até éra tayang a Yaku.

⁹ Ra'ica wana en torona séra maapo' a Yaku, ampa'paan en sususuien ipasusui éra a sé tou asaloke' makiit im perénta sé niéma' é tou.’ ”

¹⁰ Wo towan i Yesus sé tou keli wo kumua ai séra,

¹¹ “Lingan wo wéan rékén sumama-sama' en icua-Ku anio'! Sapa e muntep am ba'ba' é tou, siitu ra'ica iméma' sé tou manajis, taan sapa eng kumesot am ba'ba' é tou, siitu e méma' sé tou manajis.”

¹² Wo mai sé murit-Na e mamuéi ai Sia, “Kailekan réén i Guru, sapaoka e nunuwu' i Guru itu sumakito in até é tou Farisi?”

¹³ Isowat i Yesus, “Pakasa en tinanem sé ra'ica ayusew i Amang-Ku an sorga kémbuten oka akar in a'mu-a'mutna.

¹⁴ Wayao mio' sé tou itu. Séra tou wola sé maakin sé tou wola. Sa sé tou wola maakin sé tou wola, séra in dua tantu lumepok oka an lo'beng.”

¹⁵ Wo icua i Petrus a si Yesus, “Icua mai ai cami sapa eng kaa- ngéan in andéan itu.”

¹⁶ Wo isowat i Yesus, “Ra'ipé' réén kaangéan iow en itu?

¹⁷ Ra'ica réén kailekan iow sapaoka pakasa sé imuntep am ba'ba' tumumpa am poot wo itiya' ang kakus?

¹⁸ Taan sapa en icumesot am ba'ba', en itu an até owo wo siituo e numajis in tou.

¹⁹ Ampa'paan an até owo lumembo mai waya em bewerot léwo', mengapaté tou, mengasina, mengacabul, mengarombit, mengasairi in towo wo mengaojat.

²⁰ Sé ituo waya sé numajis in tou. Taan sa tou kuman wo ra'ica mu'as ing kama ra'ica iméma' sé tou manajis.”

Em paémanen i wéwéné Kanaan

²¹ Si Yesus kumesot am bitu wo sumingkir an sangkum in Tirus wo in Sidon.

²² Wo mai si esa wéwéné Kanaan si an sangkum itu owo wo kumua, “Icaupusai aku é Tuang, taranak i Daud, ampa'paan si toyaangku wéwéné rinasuk i sétang wo wenduo keli.”

²³ Taan si wéwéné itu wutu-wutul ra'ica niengkutan i Yesus. Wo sé murit-Na mai wo mangilek ai Sia, “Ru'du'o sia mangé, ampa'paan pengii-ngiitenna kita ang karapi imengangko-ngangko'.”

²⁴ Isowat i Yesus, “Yaku ayutus asaloke' a sé domba sé icatala asé tou Israel.”

²⁵ Taan si wéwéné itu rumuruke' taré mangé wo kumundu en sumiri' Sia wo kumua, “Tuang, tawangenai aku.”

²⁶ Taan isowat i Yesus, “Ra'ica patus mindo i roti si aitu'tul a sé toyaang wo iwéé a si asu.”

²⁷ Icua i wéwéné itu, “Wutul é Tuang, taan si asu itu icuman ing kakanen tela'u sé rumongkor an darem i méja i tuangna.”

²⁸ Wo icua i Yesus ai sia. “Éi inang, wangko' em paémanenmu. Mamualio ai co tanu ing kasalé'anmu.” Asi témpo ituke', si toyaangna itu imasama'o.

Si Yesus sumama' sé tou keli

²⁹ Kekawus in itu, si Yesus tumela'uo in tampa itu wo maya' an tembira in lour Galilea. Wo séra sumosor an tolaina wo lumukut am bitu.

³⁰ An tutuw itu keli en tou meréro-rérot maai ai Sia. Iwali éra mai sé tou késo', sé tou wola, sé tou kénto', sé tou wowo' wo keli ka'i en sakit walina, wo iweta' éra an dior i Yesus. Wo séra im baya sinama'-Na.

³¹ Sé tou keli itu ka'i mangaya-ngaya'ka' isuméré sé tou wowo' maroma'o, sé tou kénto' masama'o, sé tou késo' mawaya'o, sé tou wola maséréo, wo irayo éra si Amang Kasuruan é Israel.

Si Yesus méé kanen a sé epat ngariwu tou

³² Wo towan i Yesus sé murit-Na wo kumua, “En até-Ku mendam ing kaupusan a sé tou keli anio'. Ampa'paan teluo ngando séra mengii-ngiit Yaku wo séra ra'io wana kakanen. Ra'ica kiim-Ku rumu'du' séra maréng ang karapi i maarem, oréoka séra awéan e mapusing an lalan.”

³³ Icua é murit-Na ai Sia, “Guru, en tampa anio' lulu in tou, tumambisa kita makéré roti iwéé a sé tou keli anio'.”

³⁴ Icua i Yesus ai séra, “Pira réén eng kakeli i roti miow?” Isowat éra, “Pitu wo awéané' ka'i piraan sera' teké'.”

³⁵ Wo iru'du' i Yesus sé tou keli itu lumukut an tana'.

³⁶ Kekawus in itu indon-Na sé pitu roti wo sé sera' itu wo kumua makapulu'sama' wo te'bi-te'biin-Na wo yéké-Na a sé murit-Na wo yéké ka'i é murit-Na a sé tou keli.

³⁷ Séra im baya kuman akar imawesu. Wo umungen é murit i Yesus sé roti i matela'u itu eng kakelina mawuta am pitu wantang.

³⁸ Sé icumiit kuman epat ngariwu tuama, ra'ica icauntep sé wéwéné wo sé toyaang.

³⁹ Wo iru'du' i Yesus sé tou keli itu maréng. Wo Sia sumaké an londéi wo mangé an sangkum i Magadan.