Matius 11 - En Taar Weru a nunuwu' é Tontemboan

Si Yesus kumua in andumoro' i Yohanes Mabaptis

¹ Kumawusai si Yesus masusui a sé sangapulu' rua murit-Na, wo itela'u-Na en tampa itu e maangé sumusui wo kumua in Abar Kaaruien ang kota-kota sé an sangkum ing Galilea.

² An tutuw itu, si Yohanes Mabaptis an untep im bui. Wo kali- ngaanna waya andumoro' sé niéma' i Yesus Kristus,

³ wo iru'du'na sé muritna mangé mamuéi a si Yesus, “Amang, si Amang réén si tou aijanjio i Amang Kasuruan si maai itu? Kuma'pa tou walina e musti entoon ami maai?”

⁴ Wo isowat i Yesus ai séra, “Maréngo mangé kamu a si Yohanes Mabaptis wo icuao mio' ai sia sapa sé liningao wo sé sinéréo miow:

⁵ Si tou wola maséréo, si tou késo' mawaya'o, si tou sumakit kusta masama'o, si tou wengel malingao, si tou imatéo tinou sumawel, wo en Abar Kaaruien i Amang Kasuruan ipakua-kuao a sé tou lengéi.

⁶ Wo pakakamangen sé tou sé ra'ica icumélong Yaku.”

⁷ An tutuw é murit i Yohanes mangém, tumo'tolo sisil i Yesus a sé tou keli in andumoro' i Yohanes, “Sapa réén en torona kamu maangé a si Yohanes an tana' kapayasan? Mangé réén suméré in saraw si pengéro-ngéro' in deges?

⁸ Sapa en torona miow maangé? Mangé réén suméré si tou mekarai in loor? Si tou mekarai in loor itu, em paento'anna am balé i colano.

⁹ Anaé, sapa en torona miow maangé? Mangé réén sumére si nabi? En itu wutul, taan icua-Ku mangé ai camu, sa si Yohanes itu lumébémai wo si nabi.

¹⁰ Ampa'paan andumoro' isia awéan en aipatic: ‘Séréno! Airu'du'-Ku mai si utusan-Ku rumiorai ai Co, sia oka en tumu'tul in lalan wayaan-Mu.’

¹¹ En ulitna icua-Ku mangé ai camu, an uner é tou si aitou é wéwéné ra'ica wana en lumébémai eng kawangko' wo si Yohanes Mabaptis. Taan sé tou ipawawa-wawa' ang Kakolanoan in Sorga, lumébémai eng kawangko' wo si Yohanes Mabaptis.

¹² Tumo'tol i Yohanes Mabaptis imai akar intarépé', keli en tou wutu-wutul rumaméji kumua in andumoro' ing Kakolanoan in Sorga wo sé tou wutu-wutul rumaméji muntep ang Kakolanoan in Sorga.

¹³ Ampa'paan pakasa nabi wo ing kitap-kitap i Musa icumuao i nunuwu' i Amang Kasuruan andumoro' sé mamuali akar si Yohanes maai.

¹⁴ Aicuao é nabi indior sa si Elia maai oka sumawel ang kayo'baan anio'. Wo sa icasalé' iow mercaya en aicua é nabi itu, si Yohanes ituo si Elia si maai oka.

¹⁵ Si séi si makalunteng, aweso taré sia luminga sumama-sama'!

¹⁶ Ang karapi in sapa yandé-Ku sé tou menonou intarépé'? Séra ayandé tanu sé toyaang makalukut am pasar wo maangko' a sé kara-karapi éra,

¹⁷ ‘Pasengon ami em peloit torona miow, taan ra'ica kiim iow maéngké. Pakantar ami eng kakantaren mala'lu, taan ra'ica kiim iow maamé'.’

¹⁸ An tutuw i Yohanes imai, sia ra'ica mengakan wo ra'ica mengaelep, wo ipakua éra, ‘Sia rinasuk i sétang!’

¹⁹ Wo mai si Toyaang i Tou, Sia makan wo maelep, wo pakua é tou, ‘Séréno, Sia tampenganen wo tampengelepen. Sia ka'i mekarapi wo sé matagi im pajak wo sé tou iméma' ing kamesé-meséaan.’ Taan eng kapinteran asi Amang Kasuruan owo kaséréan oka a sé tou sé mengaéma' in sususuien wutul itu.”

Si Yesus tumegor in depet sé tou ang kota-kota sé ra'ica mape'dis

²⁰ Wo tumo'tolo si Yesus tumegor in depet sé tou ang kota-kota sé ra'ica mape'dis, mandé ka'i am bitu Sia makakeli-keli maéma' ing kakaya'kaan.

²¹ “Icawangkuro mio' kamu sé tou ang kota Khorazim! Wo icawangkuro ka'i kamu sé tou ang kota Betsaida! Ampa'paan niéma'-Kuo eng kakaya'kaan an uner iow taan ra'ica pinercaya miow wo ra'ica mape'dis. Sa sé kakaya'kaan itu niéma'-Ku an Tirus wo an Sidon indior, tantu séra imape'diso wo kumarai ing karai tanu tuus mala'lu wo mu'bur in awu an do'kos éra tanu tuus séra manesel mengéma-ngéma' ing kamesé-meséaan.

²² Taan icua-Ku mangé ai camu, a si endo kaka'puan ing kayo'baan, en ukuman iow lébé uter wo in ukuman é tou ang kota Tirus wo en Sidon.

²³ Wo kamu sé tou ang Kapernaum, weroten iow réén sapaoka kamu angkaien oka akar an sorga? Ra'ica! Taan taré, itiya'-Na oka kamu a naraka! Sa eng kakaya'kaan si imamualio an uner iow itu niéma'-Ku an Sodom, tantu eng kota itu awéané' akar intarépé'.

²⁴ Taan icua-Ku mangé ai camu: Asi endo kaka'puan ing kayo'baan, en ukuman iow lébé uterai wo in ukuman é tou an Sodom itu.”

Mayoo a Yaku

²⁵ An tutuw itu si Yesus sumombayang, “O Amang Kasuruan si makakawasa in langit wo ing kayo'baan! Yaku kumua i makapulu'sama' ampa'paan ra'ica aituru' i Amang pakasa sé andumoro' in itu a sé tou sé mengapaké ing kapinteran wo a sé tou pandéi, taan aituru' i Amang a sé tou en aténa tanu toyaangé' teké'.

²⁶ O Amang, siituo e iméma' in até i Amang arui.”

²⁷ Wo icua i Yesus, “Pakasa aisarakano i Amang-Ku a Yaku. Ra'ica wana mandé esake' tou e makatuus si Toyaang, aluar si Amang in esa. Wo ka'i ra'ica wana mandé esake' tou e makatuus si Amang, aluar si Toyaang wo sé tou si papatuus-Ku oka a si Amang.

²⁸ Mayoo a Yaku, kamu im baya sé mala'léo wo kepé wo sé uter em pamuléngen, wéan-Ku oka kamu kaaruian.

²⁹ Wuléngeno em pamuléngen si aiwuléng-Ku am palukamu wo mekisusuio mai a Yaku, ampa'paan Aku sama' wo ko'kos en até. Wo in taniitu kamu mendam oka ing kaeluran.

³⁰ Ampa'paan em pamuléngen si aiwuléng-Ku itu ra'ica uter wo em pamuléngen-Ku ka'i porak.”