Markus 8 - En Taar Weru a nunuwu' é Tontemboan

Si Yesus méé kanen a sé epat ngariwu tou

¹ An tutuw itu awéané' ka'i tou keli sé mali'usai am bitu wo séra ra'io wana kakanen. Wo towan i Yesus sé murit-Na wo kumua,

² “En até-Ku mendam ing kaupusan a sé tou keli anio', ampa'paan séra teluo ngando mengii-ngiit Yaku wo séra ra'io ka'i wana kakanen.

³ Sa séra maarem wo iru'du'-Ku maréng am balé éra, séra mapusing oka an lalan, ampa'paan awéan ka'i sé imai an tayang owo.”

⁴ Wo isowat é murit-Na, “Guru, en tampa anio' lulu in tou. Tumambisa kita ro'na méé kanen ai séra akar imawesu?”

⁵ Wuéien i Yesus ai séra, “Pira réén eng kakeli i roti sé pinaali miow?” Isowat éra, “Pitu.”

⁶ Wo iru'du'-Na sé tou keli itu lumukut an tana'. Kekawus in itu indon-Na sé pitu roti itu wo kumua i makapulu'sama' a si Amang Kasuruan, te'bi-te'biin-Na e roti itu wo iwéé-Na a sé murit-Na en yéké, wo yéké éra e roti itu a sé tou keli.

⁷ Awéan ka'i piraan sera' teké' ai séra, wo kekawus i Yesus kumua i makapulu'sama', iru'du'-Na sé murit-Na e méké in itu a sé tou keli itu.

⁸ Wo séra kuman akar i mawesu. Makakanai, umungen éra e roti sé ilumébé, eng kakelina pitu ngawakul.

⁹ Eng kakeli éra wona' epat ngariwu tou. Wo iru'du' i Yesus séra im baya maréng.

¹⁰ Wo Sia panter sumaké an londéi mewali-wali wo sé murit-Na e mangé an sangkum in Dalmanuta.

Sé tou Farisi mangilek tuus

¹¹ Kekawus in itu, imayo sé tou Farisi a si Yesus wo séra tumo'tolo meindo-indoan roma' ang karapi-Na e mangepé' Sia, pangileken éra esa tuus si an sorga owo.

¹² Kelinga in itu, en até-Na matapé wo kumua, “Kéitu réén sé tou intarépé' anio' mangilek tuus? En ulitna icua-Ku mangé ai camu, sé tou anio' ra'ica kawisa wéan-Ku tuus.”

¹³ Kekawus in itu, itela'u i Yesus séra. Wo Sia ka'i sumaké an londéi e maangé an lewet in lour itu.

En andumoro' i ragi é tou Farisi wo ragi i Herodes

¹⁴ Sé murit i Yesus lumupa imaali i roti. En ai séra wayaoka in esa roti si an londéi.

¹⁵ Wo ita'néi i Yesus ai séra, “Matéi-téiro wo maténga-téngamo andumoro' i ragi é tou Farisi wo ragi i Herodes.”

¹⁶ An tutuw éra luminga en aicua-Na itu, séra memaa-maar i esa wo sé walina sapaoka séra ra'ica wana roti.

¹⁷ Taan kinailekan i Yesus sapa em pemaa-maaren éra, anaé icua-Na, “Kéitu réén kamu memaa-maar andumoro' in da'- ica wana roti? Ra'ipé' réén kailekan wo kaangéan iow? Kamu wutu-wutul keté até.

¹⁸ Kamu awéan weren, ra'ica réén sinéré miow wo kamu awéan lunteng, ra'ica réén pinalinga miow? Ra'- io réén kata'néian iow ka'i pakasa sé niéma'-Ku?

¹⁹ An tutuw-Ku in tume'bi' sé lima roti eng kinan é lima ngariwu tou itu, pira réén wantang tiruw e roti sé tine'bi-te'bi' niumung iow?” Isowat éra, “Sangapulu' rua wantang.”

²⁰ Wuéien i Yesus sumawel, “An tutuw-Ku in tume'bi' sé pitu roti aiwéé eng kanen é epat ngariwu tou itu, pira réén wantang tiruw e roti sé tine'bi-te'bi' niumung iow?” Isowat éra, “Pitu wantang.”

²¹ Wo icua-Na ai séra, “Ra'ipé' réén kailekan iow?”

Si Yesus sumama' si esa tou wola am Betsaida

²² Kekawus in itu, si Yesus wo sé murit-Na icateka'o an doong Betsaida. Wo paalinai é tou si esa tou wola a si Yesus wo séra mekiupus ai Sia, wosama' isuun-Na si tou itu.

²³ Timboian i Yesus eng kama i tou wola itu, wo iwali-Na sia ang kesot in doong. Wo ruraan-Na em beren i tou itu wo iweta'-Na eng kama-Na am beren i tou itu, wo wuéien-Na ai sia, “Awéano en sinérému?”

²⁴ Si tou itu suméré an dior wo kumua, “Sérénku sé tou tanuoka tuu-tuura ing kayu, taan séra pasérénku mawaya-waya'.”

²⁵ Iweta' ka'i sumawel i Yesus eng kama-Na am beren i tou itu wo sia uli-ulit maséréo wo imasama'o, akar kaséréanna waya loor.

²⁶ Wo iru'du' i Yesus si tou itu maréng am baléna wo kumua, “Tioo ko maréng sumawel an doong itu.”

Em pangakun i Petrus sapaoka si Yesus ituo si Mesias

²⁷ Kekawus in itu, si Yesus wo sé murit-Na mangé an doo-roong an sangkum ing Kaisarea Filipi. An uner in lalan, Sia mamuéi a sé murit-Na, “Em pakua é tou, si séi réén Aku?”

²⁸ Isowat éra ai Sia, “Awéan sé makua, si Yohanes Mabaptis, sé walina makua si nabi Elia, sé walina ka'i makua esaan asé nabi.”

²⁹ Wo wuéien-Na ai séra, “Taan sa iciit icamu si séi réén Aku?” Isowat i Petrus, “Si Guruo si Mesias!”

³⁰ Wo pinéro keli i Yesus séra wosama' ra'ica toro ipakua-kua éra a si séike' mangé andumoro' Sia.

Si Yesus kumua ing kumataré andumoro' im papaté-Na wo tambisa eng kumiit Sia

³¹ An tutuw itu, tumo'tolo si Yesus sumusui ai séra sapaoka si Toyaang i Tou musti muléng ing keli kawenduan wo icélong oka é matu-matu'a é tou Yahudi, kikiiten é imam wo sé makailek wutul in Torat, wo Sia patén oka taan asi endo katelu Sia tumou sumawel.

³² Pakasa en anio' aicua-Na in da'ica ipaene-enep. Taan wésoon i Petrus si Yesus an tembir wo Sia romaanna repet.

³³ Wo si Yesus suméléng wo téintengen-Na sé murit-Na, wo romaan-Na repet si Petrus, “Tumayango ko éi sétang! Em pawerotenmu ra'ica sapa em paweroten i Amang Kasuruan, taan sapa em paweroten é tou.”

³⁴ Wo towan i Yesus sé tou keli wo sé murit-Na, icua-Na ai séra, “Sa awéan tou e masalé' kumiit Yaku, sia musti sumangkal in owakna, muléng in salipna wo kumiit Yaku.

³⁵ Ampa'paan si séike' e masalé' lumowir ing katouanna, sia katalaan oka ing katouanna. Taan si séi si katalaan ing katouanna ampa'paan Yaku wo in Abar Kaaruien, kéréanna oka eng katouan akar ing kauré-uré.

³⁶ Sapa en torona si esa tou makéré pakasa sé ang kayo'baan, taan sia katalaan ing katouan akar ing kauré-uré?

³⁷ Ampa'paan, ra'ica wana e ro'na iwééna tanu isawel e makéré ing katouan akar ing kauré-uré.

³⁸ Ampa'paan si séike' mangé e malawi' ampa'paan Yaku wo in sususuien-Ku an dior é tou sé ra'ica le'tek wo keli kamesé-meséaan anio', si Toyaang i Tou ka'i malawi' oka mangaku si tou itu an tutuw-Na maai ang kawasa wangko' i Amang-Na, mewali-wali wo sé malaékat le'nas.”