Markus 6 - En Taar Weru a nunuwu' é Tontemboan

Si Yesus aicélong a Nazaret

¹ Kekawus in itu si Yesus tumela'u in tampa itu wo maréng angé an doong-Na Nazaret wo sé murit-Na kumiit Sia.

² Asi endo Sabat tumo'tolo Sia masusui am balé paapo'- an é agama Yahudi. Asi témpo itu keli en tou mai luminga Sia, séra mangaya-ngaya'ka' wo kumua “Am bisa réén eng kinéréan-Na waya in anio'? Kapinteran sapa si aiwéé ai Sia? Tumambisa ro'na émaan-Na en tuu-tuus kakaya'kaan taniitu?

³ Ra'ica réén Sia bas ing kayu, toyaang i Maria, mepoow wo si Yakobus, si Yoses, wo si Yudas wo si Simon? Wo ra'ica réén sé poo-poow-Na wéwéné mewali-wali wo icita am bia'i?” Wo icélong éra Sia.

⁴ Wo icua i Yesus ai séra, “Am bisa-wisa si esa nabi pengasiriin é tou. Taan sa an doongna in esa wo a sé poo-poowna wo ampamaléna, sia ra'ica pengasiriin.”

⁵ Ampa'paano in itu ra'ica niéma'-Na eng kakaya'kaan am bitu mandé esake', taan asaloke' imaro ing kama-Na a sé piraan tou sumakit wo sumama' iséra.

^6a Si Yesus mangaya-ngaya'ka' ampa'paan séra ra'ica maéman.

Si Yesus imutus sé sangapulu' rua ruru'du'an-Na

^6b Kekawus in itu si Yesus mangé sumusui an doo-roong mentawian am bitu.

⁷ Towan-Na sé sangapulu' rua murit-Na wo yutus-Na séra mangé marua-rua tou en sumusui a sé tou a mangé mbitu. Wéan-Na ka'i kawasa séra e musér sé roh léwo'.

⁸ Itaar-Na ka'i ai séra wosama' ra'ica toro maali sapa-sapa am bawayaan. Séra ra'ica toro maali walun kakanen, pawalunan, kuma'pa roit an untep im bengkal aluar im beka'.

⁹ Séra ro'na maké in selop, taan tioo ka'i maali karai ipasawel.

¹⁰ Wo icua-Na ka'i ai séra, “Sa an esa roong awéan tou tumerima icamu muntep am balé éra, mentoo mio' am bitu akar kamu kumesot asi roong itu.

¹¹ Taan sa asi esa tampa ra'ica kiim é tou tumerima wo ra'ica kiim luminga icamu, tela'uo mio' en tampa itu. Wo itangkaro' mio' en awu ang kécéi iow, tanu tata'néi ai séra.”

¹² Kekawus in itu, mangéo cua éra a sé pakasa in tou wosama' séra mape'dis.

¹³ Wo keli ka'i sétang sé ayusér éra, wo kisun éra in solo sé tou sumakit wo sumama' iséra.

Si Yohanes Mabaptis pinaté

¹⁴ Si colano Herodes luminga ka'i in abar andumoro' i Yesus, ampa'paan am bisa-wisa e ngaran-Na kinatuusano. Wo awéan tou mengakua, “Siao si Yohanes Mabaptis si tumouo sumawel an uner é tou imaté, ampa'paan in ituo Sia awéan kawasa maéma' sé kakaya'kaan itu.”

¹⁵ Sé walina makua, “Sia itu nabi Elia!” Wo sé walina ka'i makua, “Sia itu esa nabi si meputé wo sé nabi indior.”

¹⁶ An tutuw i Herodes luminga em pasisil é tou wo cuana, “Ra'ica, sia itu si Yohanes Mabaptis si pinokolkuo en do'kosna, wo itumouo sumawel.”

¹⁷ Icua i Herodes in taniitu, ampa'paan siao e rumu'du' sé tou tumangka' si Yohanes, ipapawa'kesna wo yuntep am bui. Niéma' i Herodes en itu ampa'paan si Herodias penanaan i Filipus tuarina niindona mamuali penanaanna.

¹⁸ Ampa'paan asi témpo itu si Herodes peroma-romaan i Yohanes in tana'i, “Ra'ica loor ko mindo si penanaan i tuarimu.”

¹⁹ Anaé, si Herodias menii-niim in léwo' a si Yohanes wo mawasa e maté sia, taan ra'ica kinaémaanna em pawasanna itu.

²⁰ Ampa'paan si Yohanes pengasiriin i Herodes wo kailekanna si Yohanes itu tou wutul wo le'nas. Anaé, sia linoindong i Herodes, taan susurna in luminga si Yohanes manuwu' sia ra'io makaaté in sama' mandé ka'i sia mendam in arui mengalinga si Yohanes manuwu'.

²¹ Sumiwak ako si Herodias makéré témpo loor. Asi témpo itu tumena in endo tuma'néi ing ketou i Herodes, wo si Herodes méma' im pésta wangker. Enotenna sé tou wangko' an istana, sé kikiiten é suraro wo sé tou pasiri-siriin ang Galilea.

²² Ang karoro'an imapésta, muntepai si mangala'un i Herodias wo mengéngké-ngéngké, em pakaéngkéna itu mengaarui keli in até i Herodes wo sé sakéina. Kumawusai i maéngké, sia towan i Herodes, wo icuana, “Pangilekeno mai sapake' en casalé'mu, iwééku oka ai co!”

²³ Wo si Herodes sumumpa ai sia, “Sapake' em pangilekenmu wééku oka ai co, mandé ka'i pangilekenmu sangaperua ing kakolanoanku!”

²⁴ Wo si mangala'un itu mangé mamuéi a si inangna, “Sapa réén e musti pangilekenku?” Isowat i inangna, “Pangilekeno en do'kos i Yohanes Mabaptis!”

²⁵ Wo sia mario-rior muntep meta'up wo si Herodes e mangilek, “Si casalé'ku intarépé' iwééo mai a yaku en do'kos i Yohanes Mabaptis am bawo im baki!”

²⁶ Kelinga in itu, en até i Herodes wendu keli, taan ampa'paan in sumpana an dior é saké-sakéina, sia ra'io toro kumélong im pinangilek i mangala'un itu.

²⁷ Anaé, makala'us peréntanna si esa tou maponés e mangé mokol in do'kos i Yohanes. Wo mangé pokolenna en do'kos i Yohanes an untep im bui.

²⁸ Wo paalinai i tou itu en do'kos i Yohanes si aitulir am bawo im baki wo iwééna a si mangala'un itu. Kekawus in itu iwéé i mangala'un itu a si inangna.

²⁹ An tutuw pinalinga é murit i Yohanes andumoro' in itu, mai indon éra e mayatna, wo icubur éra.

Si Yesus méé kanen a sé lima ngariwu tou

³⁰ Kekawus in itu, sé murit ayutus i Yesus maréng sumawel e mali'us mewali-wali wo Sia. Wo icua éra ai Sia pakasa sé tinawoio wo sé aisusuio éra.

³¹ Wo icua-Na ai séra, “Mayo angénta an tampa lulu in tou en tumané mangé wosama' kita ro'na mena' toyo'!” Ampa'paan taniitu eng kakeli é tou sé maai wo mawaréng, akar séra ra'io wana témpo eng kuman.

³² Wo séra sumaké an londéi e maangé an tampa lulu in tou en tumané mangé am bitu.

³³ Taan an tutuw é murit-Na maangém, keli en tou makaséré iséra wo kinailekano é tou em paangéan éra. Anaé, sé tou an doo-roong am bitu kumesot. Wo séra kumiit in lalan katanaan, séra en dior angé icateka' am paangéan i Yesus wo sé murit-Na.

³⁴ An tutuw éra sumuwa' mangé, sérén i Yesus taniitu eng kakeli é tou imali'us, wo mai eng kaupusan in até-Na ai séra, ampa'paan séra tanuoka sé domba ra'io wana gembala. Wo tumo'tolo Sia sumusui ing keli sususuien ai séra.

³⁵ An tutuw imatawio im bengi, mai sé murit i Yesus wo kumua ai Sia, “En tampa anio' lulu in tou wo matawio im bengi.

³⁶ Ru'du'o séra mangé an doo-roong si tawi am bia'i, wosama' séra ro'na tumeles kakanen eng kanen éra.”

³⁷ Taan isowat i Yesus ai séra, “Kamuo e musti méé kanen ai séra!” Sowat éra ai Sia, “Musti réén kami e mangé tumeles roti makawééna in dua ngaatus dinar em béé kanen éra?”

³⁸ Taan icua i Yesus ai séra, “Pira réén eng kakeli i roti ai camu? Mangéo ti'tiren!” Pakati'tiren éra mako wo icua éra, “Lima e roti wo rua en sera'.”

³⁹ Wo iru'du'-Na sé tou keli lumukut sanga-sangareru' am bawo in dukut.

⁴⁰ Wo sé tou itu lumukut sanga-sangareru', awéan sé sangaatus wo awéan ka'i sé lima ngapulu' tou.

⁴¹ Kekawus in itu indon i Yesus sé lima roti wo rua sera' itu. Sia kumanat angé an langit wo kumua i makapulu'sama' a si Amang Kasuruan. Wo te'bi-te'biin-Na e roti itu wo iwéé-Na a sé murit-Na, wosama' yéké éra a sé tou itu. Taniitu ka'i mai sé rua sera' itu, yéké-Na waya ai séra.

⁴² Wo séra im baya kuman akar i mawesu.

⁴³ Makakanai séra, umungen é tou pakasa e roti wo en sera' sé matela'u, eng kakelina sangapulu' rua wantang tiruw.

⁴⁴ Sé icumiit kuman i roti itu lima ngariwu tuama.

Si Yesus mawaya' am bawo in dano

⁴⁵ Kekawus in itu, makala'us iru'du' i Yesus sé murit-Na sumaké an londéi e rumior angé an lewet in lour an doong Betsaida. Ang karoro'an in itu ru'du'-Na sé tou keli itu maréng.

⁴⁶ Kekawus i metalicur wo sé tou keli, si Yesus mangé an esa tolaina en sumombayang.

⁴⁷ An tutuw i mawengio, en londéi si pakasakéan é murit-Na an unero in lour, ang karoro'an in itu si Yesus oka in esa e makaento' ang katanaan

⁴⁸ Wo sérén-Na sé murit-Na ra'io makawoo madayung ampa'paan masu'suk in deges. Wona' jam tiga matawi i mando, si Yesus mai ai séra mawaya' am bawo in dano, wo em basa-Na lumangkoi woo iséra.

⁴⁹ An tutuw éra suméré Sia mawaya' am bawo in dano, paweroten éra sapaoka Sia mu'kur léwo', wo séra mengangko-ngangko',

⁵⁰ ampa'paan séra im baya isuméréo Sia wo séra ka'i mangaya-ngaya'ka'. Taan makala'us icua-Na ai séra, “Meneso! Si anioo Aku, tioo maindé'!”

⁵¹ Kekawus in itu si Yesus sumaké an londéi éra, wo mentengo ka'i en deges itu. Séra mangaya-ngaya'ka'.

⁵² Mandé ka'i sinéréo éra si Yesus méé kanen a sé keli tou, taan ra'ipé' kailekan éra eng kawasa i Yesus, ampa'paan séra ketépé' en até.

Si Yesus sumama' sé tou sumakit ang Genesaret

⁵³ Icateka'o mangé an lewet in lour, si Yesus wo sé murit-Na sumuwa' ang Genesaret.

⁵⁴ An tutuw éra tumumpa mio' an londéi, si Yesus makala'us kinatuusan é tou am bitu.

⁵⁵ Wo sé tou am bitu tuméron angé am pakasa in sangkum in itu eng kumua si Yesus imayo. Wo tumo'tolo wuléngen éra mai ai Sia sé tou sumakit am bawo in tepé. Sa lingan éra si Yesus asi esa tampa, iwali éra mangé sé tou sumakit am bitu.

⁵⁶ Am bisake' en angéan i Yesus, an doo-roong kuma'pa ang kota-kota, mangé iweta' éra sé tou sumakit am pasar wo mekiupus ai Sia, sa woo ro'na séra mandé asaloke' misu' in tempok in juba-Na. Pakasa sé tou sé misu' Sia masama'.