Markus 5 - En Taar Weru a nunuwu' é Tontemboan

Si Yesus musér sé roh léwo' asi esa tou ang Gerasa

¹ Kekawus in itu, si Yesus wo sé murit-Na icateka'o an lewet angé in lour Galilea, an sangkum é tou Gerasa.

² Ketumpa mio' i Yesus an londéi wo mai ai Sia si esa tou si rinasuk i roh léwo' si ang kubur owo.

³ Sia maento' ang kubur wo ra'ica wana mandé esake' tou e makawoo ma'kes isia mandé maké ranté, ampa'paan sia keter keli.

⁴ Ampa'paan makakeli-kelio eng kama wo eng kécéina parantén, taan e ranté parembusennake'. Anaé, ra'- ica wana esa tou e makawoo tumang sia.

⁵ Endo wo em bengi sia mawaya-waya' am pakuburan wo an tola-tolaina, ang karoro'anna i mengangko-ngangko' en owakna peméla-pemélaanna im batu.

⁶ An tutuw sérénna si Yesus an tayang, sia tuméron angé a si Yesus wo kumundu an dior-Na.

⁷ Kumawus in itu, si tou itu mangko' repet, “Sapa en urusan-Mu wo yaku éi Yesus, Toyaang i Amang Kasuruan Si Rumangka-rangka'? Pekiupusenku ai Co ang karapi i ngaran i Amang Kasuruan, tioo okoien-Mu aku!”

⁸ Aicuana in taniitu ampa'paan aicua owo i Yesus a si tou itu, “Éi roh léwo'! Kumesot ko asi tou itu.”

⁹ Wo wuéien i Yesus a si tou itu, “Sapa réén e ngaranmu?” Isowatna, “E ngaranku Legion, ampa'paan kami kelian.”

¹⁰ Pekiupusen i tou itu a si Yesus wosama' sé roh léwo' itu ra'ica toro yusér eng kumesot an sangkum itu.

¹¹ Asi témpo itu, keli ulit sé wawi ang karoro'an i maéré-éré kanen an tolaina.

¹² Wo sé roh itu mekiupus a si Yesus, “Ru'du'o mangé kami méra a sé wawi itu wo iwayao mio' kami muntep ai séra.”

¹³ Wo énan i Yesus em pinekiupus éra. Wo pakasa sé roh léwo' itu kumesot asi tou itu wo muntep a sé wawi itu, eng kakeli éra rua ngariwu wona'. Sé reru' é wawi itu lumo'tic ang kepal muntep an lour wo maté imalesem am bitu.

¹⁴ Kumawus in itu, sé matéir sé wawi itu tumincas wo isisil éra ang kota wo an doo-roong sapa e mamuali. Wo sé tou kumesot, e mai asi tampa itu en suméré sapa e mamuali am bitu.

¹⁵ Séra mai a si Yesus wo sérén éra si tou rinasuk i roh léwo' si Legion makalukut am bitu. Si tou itu imasama'o wo kumaraio. Keséré éra isia, séra maindé'.

¹⁶ Sé tou isuméréo in esa si Yesus musér sé roh léwo' itu, isisil éra ka'i a sé tou sé makaaié' am bitu andumoro' sapa e imamuali a si tou rinasuk itu wo andumoro' sé wawi itu.

¹⁷ Wo sé tou maento' an sangkum in tampa itu wutu-wutul mekiupus a si Yesus wosama' tela'u-Na en tampa éra.

¹⁸ An tutuw i Yesus sumaké sumawel an londéi, si tou rinasuk i sétang tarépé' mekiupus wosama' sia ro'na kumiit a si Yesus.

¹⁹ Taan ra'ica niénan i Yesus wo icua-Na a si tou itu, “Aweso taré, ko maréngo mangé am balému wo isisilo mangé a sé tou an doongmu sapa waya e niéma' i Casuruan ai co wo icuao mangé tambisa eng kaupusan-Na ai co.”

²⁰ Kekawus in itu, si tou itu maréng wo tumo'tolo makua an sangkum in doo-roong si pengatuulen sangapulu' kota. Ipakuana waya e niéma' i Yesus ai sia, wo séra im baya mangaya-ngaya'ka'.

Si toyaang i Yairus tinou sumawel wo si esa wéwéné sinama' i Yesus

²¹ Si Yesus wo sé murit-Na sumaké an londéi wo maréng angé sumawel an lewet in lour Galilea. An tembir in lour itu, sé tou keli mai lumi'cir Sia.

²² Wo mai ka'i si esa tou kapala im balé paapo'an é agama Yahudi e ngaranna Yairus. An tutuwna suméré si Yesus, sia kumundu an dior ing kécéi-Na.

²³ Wo sia uli-ulit mekiupus a si Yesus, icuana, “Si toyaangku wéwéné wéta' sumakit repet wo tawio maté. Mayoo am baléku é Tuang wo maro ing kama ai sia, wosama' sia ro'na masama' wo menonou.”

²⁴ Wo si Yesus mangé ang karapina. Keli en tou mengii-ngiit Sia wo meréngké-réngké'an an duru-Na.

²⁵ Am bitu ka'i awéan si esa wéwéné si sangapulu' rua ngata'uno wenduo in sakit pengeso-ngesotan in enda'.

²⁶ Sia menguri-ngurio mangé mapasama' a sé dokter wo pakasa eng kasiyaanna aiwangkérnao waya wo pakasa e niéma'na itu ra'ica wana torona taan en sakitna makaaweske' taré.

²⁷ Sia lumingao in abar andumoro' si Yesus. Anaé, mandé ka'i keli tou, sia sumolisip an uner é tou keli wo rumuru an somoi i Yesus wo misu' in juba-Na.

²⁸ Sia méma' in taniitu ampa'paan an untep in aténa icumua, “Mandé asaloke' misu' in juba-Na, tantu aku masama' oka!”

²⁹ An tutuw ituke' mentoo en enda' mengeso-ngesot ai sia. Wo pendamenna en owakna imasama'o.

³⁰ Asi témpo ituke' kailekan i Yesus sapaoka awéan kawasa icumesot an owak-Na. Wo Sia maréng in somoi a sé tou keli itu wo mamuéi, “Si séi réén e misu' in juba-Ku?”

³¹ Isowat é murit-Na, “Sinéréo i Guru keli sé tou meréngké-réngké'an an duru i Guru, kéitu réén si Guru mamuéi, ‘Si séi réén e misu' Yaku?’ ”

³² Wo téintengen-Na sé tou an li'cir-Na e maéré-éré si séi e misu' in juba-Na.

³³ Si wéwéné itu maindé'o keli akar ing gume'ger, ampa'paan kailekanna isiao e imisu' in juba i Yesus wo masama'. Ampa'paano in itu sia kumundu an dior i Yesus, wo isisilna waya sé imamuali ai sia.

³⁴ Wo icua i Yesus a si wéwéné itu, “Éi toyaang-Ku, ampa'paan ko maéman a Yaku, asi oras anio' ko masama'o. Mangém ang karapi in elur, en sakitmu wutu-wutul masama'o!”

³⁵ An tutuw i Yesus maroma'pé', mai sé tou am balé i Yairus owo. Wo icua éra a si Yairus, “Si toyaang i tuang imatéo. Anaé, nomoo sumusa si Guru.”

³⁶ Taan ra'ica pinandung i Yesus sapa en aicua éra. Wo icua-Na a si Yairus, “Tioo maindé', taan maémano mangé.”

³⁷ Wo ra'ica kiim i Yesus keli en tou eng kumiit Sia, Sia asalo imakawali si Petrus, si Yakobus, wo si Yohanes si tuari i Yakobus.

³⁸ Icateka' mangé séra am balé i Yairus, sérén i Yesus sé tou rega keli wo maamé' masesendu'an oka.

³⁹ Keuntep i Yesus wo Sia mamuéi a sé tou itu, “Kéitu réén kamu rega keli wo mengamé-ngamé'? Si toyaang itu ra'ica imaté, sia asaloke' tumekel!”

⁴⁰ Taan aicé'ké' érake' taré Sia. Wo iru'du'-Na pakasa sé tou kumesot am bitu, wo iwali-Na si amang wo si inang i toyaang itu wo sé murit-Na sé imewali-wali wo Sia muntep ang kamar i toyaang itu.

⁴¹ Wo timboian-Na eng kama i toyaang itu, wo icua-Na, “Talita kum” eng kaangéanna “Éi toyaang wéwéné, icua-Ku ai co, tumooro!”

⁴² Asi témpo ituke', si toyaang itu makala'us tumulung wo maya'. En umurna sangapulu' ruao ngata'un. Pakasa sé tou sé makaséré ing kamamualian itu mangaya-ngaya'ka'.

⁴³ Wo wutu-wutul pinéro i Yesus séra, wosama' ra'ica isisil éra eng kamamualian itu a sé tou walina. Kekawus in itu ru'du'-Na séra e méé kanen a si toyaang itu.