Markus 3 - En Taar Weru a nunuwu' é Tontemboan

Si Yesus sumama' in tou asi endo Sabat

¹ Wo si Yesus muntep angé sumawel am balé paapo'an é agama Yahudi. Am bitu awéan si esa tou, eng kamana esa imapalaio.

² Am bitu ka'i awéan piraan tou sé mawere-weren a si Yesus sa Sia sumama' si tou itu an endo Sabat, wosama' séra ro'na méé kaséaan ai Sia.

³ Icua i Yesus a si tou eng kamana esa mapalaio, “Mayo, tumulungo mai an uner!”

⁴ Wo wuéien-Na ai séra, “Si wisa e ro'na émaan asi endo Sabat? Méma' si loor kuma'pa si léwo'? Sumama' in tou kuma'pa maté tou?” Taan séra makapeneske'.

⁵ Téintengen-Na séra im baya sé an li'cir-Na ang karapi in e'bow. Sia matapé ampa'paan séra keté até. Wo icua-Na a si tou itu, “Yuluro mai eng kamamu.” Wo yulurna eng kamana wo asi témpo ituke' imasama'o eng kamana.

⁶ An tutuw ituke', sé tou Farisi kumesot am balé paapo'an. Séra makala'us mangé e mepaar wo sé tou makii-kiit si Herodes en tumambisa maté si Yesus.

Keli en tou kumiit si Yesus

⁷ Si Yesus wo sé murit-Na tumela'u in tampa itu wo mangé an lour Galilea. Sé tou keli makii-kiit Sia, séra ra'ica asaloke' ang Galilea owo, taan ka'i an Yudea owo,

⁸ an Yerusalem owo, an Idumea owo, an lewet in doyongan Yordan, wo an li'cir ing kota Tirus wo in Sidon. Séra mai a si Yesus, ampa'paan liningao éra pakasa sé niéma'-Na.

⁹ An tutuw sérén i Yesus taniitu eng kakeli é tou sé mai ai Sia, wo iru'du'-Na sé murit-Na tumu'tul in londéi en sakéan-Na, wosama' sé tou ra'ica ruméngké' Sia.

¹⁰ Ampa'paan kelio en tou sé sinama'-Na, akar pakasa sé tou sumakit merénké-réngké'an e mai misu' Sia.

¹¹ Susur ka'i sé tou rinasuk i roh léwo' itu suméré si Yesus, séra kumundu an dior-Na wo mangko', “Icoo si Toyaang i Amang Kasuruan!”

¹² Taan séra pinéro repet i Yesus eng kumua sa si séi Sia.

Si Yesus sumisir sé sangapulu' rua tou e mamuali ruru'du'an-Na

¹³ Kekawus in itu si Yesus sumosor an esa tolaina. Towan-Na sé tou sé sinisir-Na wo séra mai ai Sia.

¹⁴ Wo sisiren-Na sangapulu' rua tou sé mewali-wali ang karapi-Na wo yutus-Na eng kumua in Abar Kaaruien.

¹⁵ Wo wéan-Na ka'i séra kawasa e musér sé sétang.

¹⁶ Sé sangapulu' rua tou sé sinisir-Na itu, e ngaran éra: Simon si ningaranan-Na ka'i Petrus,

¹⁷ si Yakobus wo si tuarina Yohanes toyaang i Zebedeus, séra in dua ningaranan-Na ka'i Boanerges eng kaangéanna toyaang in erut,

¹⁸ si Andreas, si Filipus, si Bartolomeus, si Matius, si Tomas, si Yakobus toyaang i Alfeus, si Tadeus, si Simon tou Zelot,

¹⁹ wo si Yudas si kumianat oka si Yesus.

Si Yesus wo si Beelzebul

²⁰ Kekawus in itu, si Yesus muntep an esa walé. Am bitu ka'i keli en tou mai mali'us, akar Sia wo sé murit-Na ra'io wana ka'i témpo eng kuman.

²¹ An tutuw é pamalé-Na luminga Sia am bitu, séra mai e mindo woo Sia, ampa'paan ipakua é tou Sia imanganga'o.

²² Sé makailek wutul in Torat sé imai an Yerusalem owo kumua ka'i, “Sia rinasuko i Beelzebul! Sia musér sé sétang mengapaké ing kawasa i kikiiten é sétang anio'.”

²³ Wo towan i Yesus séra wo numuwu' maké in andéan, “Tumambisa si sétang ro'na musér si sétang?

²⁴ Sa awéan esa kakolanoan meréndé-réndéran, eng kakolanoan itu ra'ica kawisa tumang.

²⁵ Wo sa esa pamalé meréndé-réndéran, em pamalé itu ra'ica kawisa tumang.

²⁶ Taniitu ka'i sa si kikiiten é sétang sumundur sé kakéléna in esa wo meréndé-réndéran, sia itu ra'ica kawisa tumang wo tantu maka'pu.

²⁷ Taan ra'ica wana mandé esake' tou e ro'na muntep am balé i tou enté' e mandét ing kasiyaanna, sa ra'ica wa'kesenna owo si tou enté' itu. Kekawus in itu ro'nao andétenna waya eng kasiyaan sé an untep im balé itu.

²⁸ En ulitna icua-Ku mangé ai camu, pakasa eng kamesé-meséaan wo en ojat sapake' mangé sé ipakua é toya-toyaang i tou ro'napé' kaampungan.

²⁹ Taan si séike' mangé e mengaojat si Roh Le'nas, sia ra'io kaampungan akar ing kauré-uré, ampa'paan sia iméma'o ing kamesé-meséaan akar ing kauré-uré.”

³⁰ Si Yesus kumua in taniitu, ampa'paan ipakua éra sapaoka Sia rinasuk i roh léwo'.

Si inang wo sé mepoow wo si Yesus

³¹ Si inang wo sé mepoow wo si Yesus mai am balé pengasusuian-Na. Ang karoro'an éra i makatulung ang kesot, iru'du' éra tou e mangé tumowa Sia.

³² An tampa itu, kelian tou makalukut lumi'cir si Yesus wo awéan eng kumua ai Sia, “Tuang, si inang wo sé mepoow wo si Tuang ang kesot. Séra rumaméji meta'up wo si Tuang.”

³³ Isowat i Yesus ai séra, “Si séi réén si inang-Ku wo sé mepoow wo Yaku?”

³⁴ Téintengen-Na séra sé makalukut lumi'cir Sia wo kumua ai séra, “Si anioo si inang-Ku wo sé mepoow wo Yaku.

³⁵ Si séike' si mengaéma' ing kasalé'an i Amang Kasuruan, siao si poow tuama wo poow wéwéné wo inang-Ku.”