Markus 2 - En Taar Weru a nunuwu' é Tontemboan

Si Yesus sumama' si tou késo'

¹ An tutuw lumangkoio piraan ngando, si Yesus maréng sumawel ang Kapernaum. Wo icaseraro en abar sapaoka Sia am balé.

² Ampa'paan in ituo kumeli-keli tou mali'us akar ra'io ka'i wana tampa am bitu, akar an dior im papalen imawutao é tou. Wo si Yesus kumua in Taar i Amang Kasuruan ai séra.

³ Ang karoro'an in itu iwali mai é tou a si Yesus si esa tou késo' si winuléng é epat tou.

⁴ Taan ampa'paan keli sé tou am bitu, akar ra'ica icawali éra mangé si tou itu a si Yesus. Anaé, wukaan éra en atep an dangka' mangé im pakatulungan-Na, wo itumpa éra mio' si tou késo' itu si pakatekel an tepé.

⁵ An tutuw suméré e niéma' é tou itu, kinailekano i Yesus séra maéman ai Sia. Wo icua-Na a si tou késo' itu, “Éi toyaang-Ku, eng kamesé-meséaanmu niampungano.”

⁶ Taan am bitu ka'i awéan piraan tou sé makailek wutul in Torat sé makalukut memerot-merot an untep in até.

⁷ “Kéitu réén si Tou anio' numuwu' tanu siitu? Sia maojato si Amang Kasuruan. Si séi réén e ro'na méé kaampungan ing kamesé-meséaan é tou aluar si Amang Kasuruan?”

⁸ Taan makala'us kailekan-Na en an untep in até éra sapa em pemero-meroten éra. Wo icua-Na, “Kéitu réén kamu mawerot tanu siitu an untep in até?

⁹ Si wisa en lébé taporak icua-Ku a si tou késo' anio', ‘Eng kamesé-meséaanmu niampungano’, kuma'pa ‘Tumooro, angkaieno en tepému wo maya'o’?

¹⁰ Taan icua-Ku in taniitu, wosama' kailekan iow sapaoka ang kayo'baan, si Toyaang i Tou awéan kawasa e méé kaampungan ang kamesé-meséaan.” Wo icua i Yesus a si tou késo' itu,

¹¹ “Icua-Ku ai co, tumooro, angkaieno en tepému wo maréngo mangé am balému.”

¹² Si tou itu tumoor wo makala'us angkaienna en tepé wo an dior é tou keli sia kumesot am bitu. Wo séra im baya mangaya-ngaya'ka'. Séra rumayo si Amang Kasuruan wo kumua, “Eng kamamualian tanu sia'i ra'ipé' kawisa sérénta.”

Si Yesus tumowa si Lewi kumiit Sia

¹³ Si Yesus maréng angé ka'i sumawel an tembir in lour Galilea. Wo mai ai Sia sé tou keli wo susuian-Na séra.

¹⁴ An tutuw Sia lumangkoi am bitu sérén-Na si Lewi, toyaang i Alfius makalukut an tampa é tou mawér im pajak. Wo icua i Yesus ai sia, “Kumiito mai Yaku.” Kelinga in itu, si Lewi tumulung wo kumiit si Yesus.

¹⁵ Kekawus in itu si Yesus kuman am balé i Lewi. Am bitu kelian sé matagi im pajak wo sé tou iméma' ing kamesé-meséaan mekiit icuman mewali-wali wo si Yesus wo sé murit-Na, ampa'paan kelian tou sé makii-kiit Sia.

¹⁶ An tutuw itu, awéan ka'i sé makailek wutul in Torat ang golongan Farisi isuméré si Yesus makan mewali-wali wo sé matagi im pajak wo sé tou iméma' ing kamesé-meséaan. Wo wuéien éra a sé murit i Yesus, “Kéitu Sia makan mewali-wali wo sé matagi im pajak wo sé tou iméma' ing kamesé-meséaan?”

¹⁷ Lininga i Yesus en itu wo icua-Na, “Ra'ica sé tou makaowak sama' e maperlu dokter, taan sé tou sumakit. Yaku mai ra'ica en tumowa sé tou wutul, taan sé tou iméma' ing kamesé-meséaan.”

En andumoro' i mapuasa

¹⁸ Asi makasa, sé murit i Yohanes wo sé tou Farisi ang karoro'- an i mapuasa. An tutuw itu mai a si Yesus sé piraan tou wo icua éra, “Sé murit i Yohanes wo sé murit é tou Farisi mapuasa, taan kéitu réén sé murit i Tuang ra'ica?”

¹⁹ Wo isowat i Yesus ai séra, “Ro'na réén sé kara-karapi i pengantén tuama muasa ang karoro'an i pengantén itu mewali-walipé' wo iséra? Ang kauré i pengantén itu mewali-walipé' wo iséra, séra ra'ica muasa.

²⁰ Taan mai oka en témpona si pengantén tuama indon é tou walina an uner éra, wo asi témpo ituo séra muasa.

²¹ Ra'ica wana esa tou en tumampal ing kaéng weru ang karai matu'a. Ampa'paan sa eng kaéng weru itu sumusut, ro'na kumésé' ing karai matu'a wo makawangkero eng késé'na.

²² Taniitu ka'i ra'ica wana tou e mumpun in anggor weru an tampa matu'a si niéma' ang kulit binatang owo. Ampa'paan en anggor weru itu ro'na méma' in tampa matu'a itu makenta', akar en anggor itu icatiya', taniitu ka'i en tampana maléwo'. Anaé, en anggor weru musti ipumpun ka'i an tampa weru.”

Sé murit maupu' ing gandum asi endo Sabat

²³ Asi makasa, an tutuw in endo Sabat, si Yesus mawaya' lumangkoi im pangumaan ing gandum. Ang karoro'an imawaya' am bitu, sé murit-Na maupu' im batuna ing gandum.

²⁴ Wo icua é tou Farisi a si Yesus, “Séréno! Kéitu réén séra maéma' si ra'ica toro émaan asi endo Sabat?”

²⁵ Wo isowat i Yesus ai séra, “Ra'ipé' réén binaca miow sapa e niéma' i Daud, an tutuw sia wo sé tou makii-kiit sia maaremo wo ra'io wana kakanen?

²⁶ Sia muntep an Ténda Pengaapo'an a si Amang Kasuruan wo kuman i roti si ayumper a si Amang Kasuruan si ra'ica toro kanen aluar sé imam. Iwééna ka'i mangé e roti itu a sé makii-kiit isia. En itu imamuali an tutuw i Abyatar si imam wangko'.”

²⁷ Wo icua ka'i i Yesus ai séra, “En endo Sabat niéma' i Amang Kasuruan mamuali kamang ai cita in tou, ra'ica niéma' wosama' sé tou asaloke' mengii-ngiit in atoran in endo Sabat.

²⁸ Ampa'paan in ituo, si Toyaang i Tou awéan kawasa en tumu'tul im baya-waya icauntep in atoran in endo Sabat.”