Markus 16 - En Taar Weru a nunuwu' é Tontemboan

Si Yesus tumou sumawel

¹ Kelangkoi angé in endo Sabat, si Maria tou Magdala, si Maria inang i Yakobus, wo si Salome, mangé tumeles nanamur émaan solo eng kisu a mayat i Yesus.

² Wo asi endo kataré asi duminggu itu imamoondopé' keli, séra mangé ang kubur.

³ An uner in lalan séra membuéian, “Éi, em batu aipénet ing kubur wangker keli. Wo si séi réén e mangé miléi im batu en untepanta?”

⁴ Taan an tutuw éra makatawio mangé ing kubur, sérén éra em batu wangker imiléio an tampana.

⁵ An tutuw éra muntep angé ang kubur, séra mangaya'ka' ampa'paan sérén éra ang kakan in tinekelan i mayat i Yesus awéan esa mangalitou mekarai ing kulo' makalukut.

⁶ Wo icua i mangalitou itu ai séra, “Kamu ra'ica toro maindé'! Kailekanku sapaoka kamu maéré-éré si Yesus, si tou Nazaret si aisalip éra itu. Sia tinouo sumawel wo ra'io ka'i am bia'i. Sérén iow! Si tampa anio' en tinekelan i mayat-Na.

⁷ Anaé intarépé', mangéo icua a sé murit-Na wo a si Petrus, tana'i, ‘Si Yesus itumouo sumawel wo Sia irumioro mangé ang Galilea. A mangé mbitu sérén iow oka Sia, tanu si sumangkumo aicua-Na ai camu.’ ”

⁸ Kekawus ako in itu, séra makala'us kumesot ang kubur itu wo tumincas ampa'paan maindé'o keli wo mangaya-ngaya'ka'. Wo séra ra'ica kumua in sapa-sapa a sé tou ampa'paan séra maindé'o. [Wo icua éra ang karapi in da'ica lambot pakasa en taar itu a si Petrus wo sé kara-karapina. Kumawus itu, ampa'paan in taar i Yesus in esa a sé murit-murit-Na, wo mangé icua éra waya en taar-Na itu am pakasa ing kayo'baan tumo'tol a micona akar an tempok ako. En abar itu le'nas wo ra'ica kawisa maka'pu, siituo en abar andumoro' ing kalowiran akar ing kauré-uré.]

Si Yesus mapaturu' in owak-Na

⁹ Asi endo kataré an duminggu itu i mamoondo keli tutuw i Yesus tumou sumawel, kataré-taré Sia mangé mapaturu' in owak-Na a si Maria tou Magdala. Si Yesus sumangkumo musér sé pitu sétang kumesot ai sia.

¹⁰ Wo mangé icuana a sé tou makiit si Yesus sé mala'lu-la'lupé' wo mengamé-ngamé'.

¹¹ An tutuw éra iluminga en aicua i Maria sapaoka si Yesus itumouo sumawel wo sinérénao, ra'ica percayan éra.

¹² Kekawus in itu, si Yesus mapaturu' in owak-Na a sé rua murit-Na. Séra in dua ang karoro'an i mawaya' maangé asi esa roong. Asi témpo itu ra'ica katuusan éra si Yesus, ampa'paan Sia kaséréan walina ra'io puté indior.

¹³ Wo séra in dua maréng angé sumawel a sé kara-karapi éra walina wo icua éra sapaoka séra imeta'upo wo si Yesus, taan sé kara-karapi éra ka'i ra'ica mercaya.

¹⁴ Ang kasiwakanna, si Yesus mapaturu' in owak-Na a sé sangapulu' esa murit-Na. An tutuw itu séra ang karoro'an i makan. Wo romaan-Na séra ampa'paan ing kaketéan in até éra wo ra'ica mercaya a sé tou sé isuméréo Sia itumou sumawel.

¹⁵ Wo icua-Na ai séra, “Mangém kamu am pakasa ing kayo'baan, wo icuao mangé en Abar Kaaruien-Na a sé im pakasa in tou.

¹⁶ Si séi e maéman a Yaku wo baptisen, sia malowir oka. Taan si séi si ra'- ica maéman a Yaku, makéré oka in ukuman.

¹⁷ Sia'io en tuusna sé tou maéman a Yaku: Séra musér oka sé sétang maké i ngaran-Ku, rumoma' oka maké i nunuwu' walina si ra'ipé' sumangkum ako kailekan éra.

¹⁸ Mandé séra tumimboi si ula' rumacu-racung wo melep racung séra ra'ica masapa-sapa. Séra maro ing kama a sé tou sumakit wo sé tou itu masama'.”

Si Yesus icaangkai angé an sorga

¹⁹ Makanuwu' mako si Apo' Yesus a sé murit-Na, Sia icaangkai angé an sorga wo lumukut ang kakan i Amang Kasuruan.

²⁰ Kumawus ako in itu, sé murit i Yesus mangé am bisa-wisa wo mangé kumua in Abar Kaaruien andumoro' i Yesus Kristus, wo si Casuruan tumawoi mewali-wali wo tumawang iséra akar ro'na méma' in tuu-tuus kakaya'kaan, en tumuru' sapaoka en taar aicua éra itu ulit.