Markus 10 - En Taar Weru a nunuwu' é Tontemboan

En andumoro' in céré

¹ Asi tampa itu oka wo si Yesus mangé an sangkum in Yudea wo an sangkum in lewet in doyongan Yordan, wo keli ka'i en tou mai mali'us an li'cir-Na. Wo tanu ka'i ing kanaramen-Na mengasusui ai séra.

² Wo mai sé tou Farisi e mangepé' a si Yesus. Wuéien éra ai Sia, “Ro'na réén si tuama icumawéngo cuméré si penanaanna?”

³ Isowat-Na ai séra, “Sapa réén en aiperénta i Musa ai camu?”

⁴ Isowat éra, “Winéan i Musa kaloasan sé tuama mabacéré wo si penanaanna e méma' surat céré.”

⁵ Wo icua i Yesus ai séra, “Ampa'paano ing kaketéan in até miow akar ipatic i Musa em perénta anio' ai camu.

⁶ Taan asi kataré-taré si Amang Kasuruan méma' ing kayo'baan anio', niéma'-Na tuama wo wéwéné.

⁷ Ampa'paan in itu si tuama tumela'u oka si amangna wo si inangna wo meesa ang karapi i penanaanna,

⁸ akar séra in dua meesao. Anaé, séra ra'io ka'i rua taan esa.

⁹ Ampa'paan in itu, sapa sé pineesao i Amang Kasuruan, ra'io toro petanén é tou.”

¹⁰ An tutuw éra am baléo, sé murit itu mamuéi ka'i a si Yesus andumoro' in itu.

¹¹ Wo icua-Na ai séra, “Si séike' en cuméré si penanaanna wo kumawéng si wéwéné walina, sia mabersinao.

¹² Sa si wéwéné kinawéngo cuméré si penanaanna wo kawéngené' ka'i i tuama walina, sia mabersinao.”

Si Yesus kumamang sé toyaang

¹³ Wo paalinai é tou a si Yesus sé toyaang teké' wosama' Sia maro ing kama ai séra. Taan sé tou itu aicae'bowke' é murit-Na.

¹⁴ Keséré in itu, icae'bow i Yesus séra wo icua-Na, “Iwayao mio' sé toyaang itu mai a Yaku. Tioo pekala-pekalaan séra, ampa'paan sé tou tanu sé ituo e makaanu ing Kakolanoan i Amang Kasuruan.

¹⁵ En ulitna icua-Ku mangé ai camu, si séi si ra'ica sumungkul ing Kakolanoan i Amang Kasuruan tanu sé toyaang teké' anio', sia ra'ica kawisa muntep ang Kakolanoan-Na.”

¹⁶ Wo ke'kepen-Na sé toyaang itu wo ang karoro'an in itu iparo-Na eng kama-Na an dangka' éra wo kamangen-Na séra.

Si Tou siya' uter muntep ang Kakolanoan i Amang Kasuruan

¹⁷ An tutuw i Yesus lumala'us im bawayaan-Na, menéro-néronai si esa tou e meta'up wo Sia. Wo sia kumundu an dior-Na, sia mamuéi, “Guru sama', sapa e musti émaanku e makéré ing katouan akar ing kauré-uré?”

¹⁸ Isowat i Yesus, “Kéitu réén ko kumua Yaku sama'? Ra'ica wana mandé esake' tou en sama', wayake' si Amang Kasuruan.

¹⁹ Tantu kailekanmu em perénta-perénta i Amang Kasuruan anio': Tioo mengapaté tou, tioo mengaéma' in sina, tioo mengarombit, tioo mengasairi in towo, tioo mengauwak in tou, siriin angé si amang wo si inangmu.”

²⁰ Wo icua i tou itu ai Sia, “Guru, pakasa em perénta itu niéma'kuo waya an tutuwku i wo'basé'.”

²¹ Taan téintengen i Yesus sia ang karapi ing kaupusan wo icua-Na, “Awéané' esa si ra'ipé' niéma'mu. Mangé iwangkéro waya eng kasiyaanmu, wo iwééo mio' a sé tou lengéi, wo in taniitu kéréanmu oka eng kasiyaan an sorga. Kumawus in itu, mayoo wo kumi- ito mai Yaku.”

²² Kelinga in aicua itu, sia matapé wo mangé ang karapi im bendu, ampa'paan keli eng kasiyaanna.

²³ Wo téintengen i Yesus sé murit an li'cir-Na wo kumua ai séra, “Susa keli si tou siya' muntep ang Kakolanoan i Amang Kasuruan.”

²⁴ Sé murit-Na mangaya'ka' iluminga sé aicua-Na itu. Taan icua ka'i i Yesus, “Toya-toyaang-Ku, susa keli muntep ang Kakolanoan i Amang Kasuruan.

²⁵ Lébé taporak si esa unta muntep am bo'so im biwilit, wopé'taré si esa tou siya' muntep ang Kakolanoan i Amang Kasuruan.”

²⁶ Séra lébé mangaya'ka' wo kumua a si esa wo sé walina, “Sa taniitu, si séi réén si ro'na lowiren?”

²⁷ Téintengen i Yesus séra wo icua-Na, “Si tou ra'ica makawoo lumowir in owak in esa. Taan si Amang Kasuruan ro'na lumowir pakasa sé tou ampa'paan em baya-waya ro'na émaan-Na.”

En laasa kumiit si Yesus

²⁸ Wo icua i Petrus a si Yesus, “Kami anio' itumela'uo im baya-waya wo kumiit si Guru!”

²⁹ Isowat i Yesus, “En ulitna icua-Ku mangé ai camu, si séike' mangé en tumela'u im baléna, kuma'pa sé kapetuarina tuama kuma'pa wéwéné kuma'pa poowna wéwéné, kuma'pa si inangna kuma'pa si amangna, kuma'pa sé toyaangna kuma'pa in umana ampa'paan Yaku wo ampa'paan makua in Abar Kaaruien,

³⁰ si tou itu, an jaman anio'ke' makéré oka sumawel sangaatus lumepet: walé, kapetuari tuama kuma'pa wéwéné, inang, toyaang wo uma, mandé ka'i meta'up in okoi, wo an jaman mengangai kéréanna oka eng katouan akar ing kauré-uré.

³¹ Taan keli en tou sé kumataré-taré mamuali oka tou sumomo-somoi, wo sé tou sumomo-somoi mamuali oka tou kumataré-taré.”

Si Yesus kumua ing katelu andumoro' im papaté-Na

³² Si Yesus wo sé murit-Na ang karoro'an imawaya' maangé an Yerusalem wo si Yesus mawaya' an dior. Sé murit-Na ra'io maka- até in sama' wo ka'i sé tou makiit an somoi-Na mendam in indé'. Towan i Yesus ka'i sé sangapulu' rua murit-Na wo ito'tol-Na ing kumua ai séra sapa e mamuali oka an owak-Na,

³³ “Intarépé' kita maangé an Yerusalem wo si Toyaang i Tou isarakan oka a sé kikiiten é imam wo a sé makailek wutul in Torat, wo wéan oka éra ukuman im patén Sia. Isarakan éra oka Sia a sé bangsa ra'ica Yahudi,

³⁴ wo Sia para'i-ra'ien oka, ruraan, samboken wo patén, taan kekawus in telu ngando Sia tumou oka sumawel.”

Em pinangilek i Yakobus wo si Yohanes

³⁵ Kekawus in itu si Yakobus wo si Yohanes, toyaang i Zebedeus, rumuru mangé a si Yesus wo kumua, “Guru, sa woo ro'na, énanai i Guru em pangileken ami.”

³⁶ Wuéien i Yesus ai séra, “Sapa réén em pangileken iow a Yaku?”

³⁷ Wo isowat éra, “Tana'i, é Guru. Sa si Guru imamualio Kolano si Makakawasa, pangileken ami a si Guru énanai kami in dua en lumukut am palukutan si parayo-rayo wo pasiri-siriin, si esa ang kakan wo si esa ang ka'biri.”

³⁸ Icua i Yesus ai séra, “Ra'ica kailekan iow sapa em pinangilek iow. Makawoo réén kamu melep asi paelepan si musti elepen-Ku kuma'pa baptisen tanu im baptisan si musti teriman-Ku?”

³⁹ Isowat éra, “Kawooan ami é Guru!” Isowat i Yesus ai séra, “Wutul, kamu melep oka a si paelepan si musti elepen-Ku wo baptisen ang karapi im baptisan si musti teriman-Ku.

⁴⁰ Taan andumoro' si séi en lumukut ang kakan wo ang ka'biri-Ku, Yaku ra'ica wana hak en tumantu in itu. En tampa itu tinu'tulo i Amang Kasuruan a sé tou sé aitantu-Nao.”

⁴¹ An tutuw é sangapulu' murit i Yesus luminga im pinangilek i Yakobus wo i Yohanes, wo séra mae'bow.

⁴² Wo towan i Yesus séra im baya wo icua-Na, “Kailekan iow sa sé kikiiten é bangsa sé ra'ica makatuus si Amang Kasuruan maperénta sé tou éra kumiit ing kasalé'an éra. Wo sé kikiiten pasiri-siriin ka'i mengaokoi a sé tou éra kiit ing kasalé'an éra.

⁴³ Taan kamu ra'ica toro mengataniitu! Si séike' e masalé' mamuali tou wangko' an uner iow, aweso taré' sia sumelewir icamu.

⁴⁴ Wo si séike' e masalé' mamuali tou kumataré-taré an uner iow, sia musti mamuali ata en sumelewir icamu.

⁴⁵ Ampa'paan si Toyaang i Tou ka'i maai ang kayo'baan anio', ra'ica maai en selewiran é tou taan mai en sumelewir sé tou wo méé in owak-Na in esa en tumu'bus ing kamesé-meséaan é tou keli.”

Si Yesus sumama' si Bartimeus tou wola

⁴⁶ Si Yesus wo sé murit-Na icateka'o ang kota Yerikho. An tutuw éra maya' kumesot ang kota itu, keli en tou makiit iséra. An tutuw éra i mawaya', awéan esa tou wola si makalukut wo mangile-ngilek an tembir in lalan. E ngaran i tou itu Bartimeus, toyaang i Timeus.

⁴⁷ An tutuwna iluminga si Yesus tou Nazaret lumangkoi, sia mangko', “Yesus, taranak i Daud! Icaupusai aku!”

⁴⁸ Wo romaan é tou keli sia, “Éi, menes ko am bitu!” Taan sia makataangko'ke' taré, “Éi taranak i Daud, icaupusai aku!”

⁴⁹ Kekawus in itu si Yesus mento' wo kumua, “Towano mai sia!” Ampa'paan in ituo towan éra si tou wola itu wo kumua ai sia, “Kete-keteren en atému, tumulungo mai, patowan i Yesus ko.”

⁵⁰ Si Bartimeus muka' in jubana wo iwangkilna, wo sia mario-rior tumulung wo mangé a si Yesus.

⁵¹ Wo wuéien i Yesus ai sia, “Sapa réén en casalé'mu émaan-Ku ai co?” Isowat i Bartimeus, “Guru, Icasalé'ku sa woo ro'na aku suméré.”

⁵² Wo icua Yesus ai sia, “Ampa'paan ko maéman a Yaku, intarépé' ko ro'nao suméré.” Asi témpo ituke', si Bartimeus ro'nao suméré, wo sia kumiit si Yesus.