Markus 1 - En Taar Weru a nunuwu' é Tontemboan

Si Yohanes Mabaptis

¹ Si anioo en to'tolan in Abar Kaaruien andumoro' i Yesus Kristus, Toyaang i Amang Kasuruan.

² En Abar Kaaruien anio' aito'tol tanu in aipatic ang kitap i nabi Yesaya: “Séréno! Airu'du'-Ku mai si utusan-Ku rumiorai ai Co, sia oka en tumu'tul in lalan wayaan-Mu.

³ Sia mengangko-ngangko' oka an tana' kapayasan, ‘Tu'tuleno en lalan torona i Casuruan, wo rondoren en lalan langkoian-Na.’ ”

⁴ Wo si Yohanes Mabaptis mai an tana' kapayasan wo icuana, “Mape'diso mangé ang kamesé-meséaan wo iwééo mio' en owak iow im baptisen wosama' eng kamesé-meséaan iow ampungan oka.”

⁵ Wo sé tou am pakasa in sangkum in Yudea wo pakasa in tou an Yerusalem mai a si Yohanes. Séra mangaku ing kamesé-meséaan éra wo séra baptisen i Yohanes an doyongan Yordan.

⁶ Si Yohanes mepaké in juba si niéma' am buuk i onta wo em bengkalna ang kulit i binatang owo. Eng kakanenna komong wo wiluk é lampéran in talun.

⁷ Wo ipakua-Na in tana'i, “Kekawus yaku, maai oka ka'i si esa tou eng kawasa-Na lumébémai wo yaku. Kumuru wo muka'ke' in tali sapatu-Na, yaku ra'ica patus.

⁸ Baptisenku kamu in dano, taan baptisen-Na oka kamu i Roh Le'nas.”

Si Yesus nibaptis i Yohanes

⁹ An tutuw itu, si Yesus mai a Nazaret owo an sangkum ing Galilea, wo Sia baptisen i Yohanes an doyongan Yordan.

¹⁰ Kekesotai i Yesus an dano, makala'us sérén-Na mangé en langit mawuka' wo e Roh i Amang Kasuruan si tanuoka mombo, tumumpa mai ai Sia.

¹¹ Wo kalingaano en suara an sorga owo, “Icoo si Toyaang-Ku si caupus-Ku, e méma' in até-Ku arui.”

Si Yesus pinangepé'an i kikiiten é sétang

¹² Kekawusai in itu, iwali i Roh Le'nas si Yesus an tana' kapayasan.

¹³ Eng kauré-Na an tana' kapayasan epat ngapulu' ngando wo pinangepé'an i kikiiten é sétang. Wo Sia mento' mewali-wali wo sé binatang sé ra'ica papiaran wo ka'i paselewiran é malaékat.

Si Yesus kumua in Abar Kaaruien ang Galilea

¹⁴ Kekawus i Yohanes Mabaptis tinangka', si Yesus mai ang Galilea wo kumua in Abar Kaaruien i Amang Kasuruan.

¹⁵ Wo icua-Na, “En témpona imalekepo, eng Kakolanoan i Amang Kasuruan makatawio. Anaé, mape'diso wo émanenno mangé en Abar Kaaruien i Amang Kasuruan.”

Si Yesus tumowa sé murit-Na kataré

¹⁶ Asi makasa si Yesus mawaya-waya' an tembir in lour Galilea wo sérén-Na sé rua metuari, e ngaran éra Simon wo Andreas. Séra ang karoro'an malombo' in lolombo', ampa'paan en tawoien éra mengatangka' sera'.

¹⁷ Wo icua i Yesus ai séra, “Mayo, kumiito mai Yaku! Émaan-Ku oka kamu mengaéré tou eng kumiit Yaku.”

¹⁸ Wo makala'us itela'u éra en lolombo' itu wo kumiit si Yesus.

¹⁹ Kumawus in itu, si Yesus lumala'us im bawayaan-Na wo sérén-Na si Yakobus wo si Yohanes kapetuarina, séra toya-toyaang i Zebedeus. Séra ang karoro'an i mawutul in lolombo' an londéi.

²⁰ Wo makala'us towan i Yesus séra in dua wo itela'u éra si amang éra Zebedeus an londéi ang karapi é tou sé pate'tekkanna. Kekawus in itu séra kumiit Sia.

Si Yesus musér si sétang asi esa tou ang Kapernaum

²¹ Si Yesus wo sé tou makiit Sia icateka' mangé ang Kapernaum. Asi endo Sabat, si Yesus muntep am balé paapo'an é agama Yahudi wo Sia sumusui am bitu.

²² Séra mangaya-ngaya'ka' luminga in sususuien-Na, ampa'paan Sia mengasusui wuta ing kawasa, ra'ica tanu sé makailek wutul in Torat.

²³ Asi témpo itu, am balé paapo'an é agama Yahudi itu awéan esa tou si rinasuk i roh léwo'. Si tou itu maangko',

²⁴ “Yesus tou Nazaret! Sapa en urusan-Mu wo icami? Mai-Mu réén patén kami? Kailekanku si séi-Ko, Icoo si Le'nas asi Amang Kasuruan owo.”

²⁵ Wo sia réndéren i Yesus, “Menes, kumesot ai sia ko!”

²⁶ Wo si tou itu ipego'go-go'go' i roh léwo', wo ang karapi i maangko' repet si roh léwo' itu kumesot asi tou itu.

²⁷ Pakasa sé tou am bitu mangaya'ka', akar séra mengkuanan, “Sapa en anio'? En anio' sususuien weru! E nuwu'-Na wuta ing kawasa, akar sé roh léwo' ka'i kumiit im perénta-Na.”

²⁸ Wo en abar andumoro' si Yesus makala'us icaserar am pakasa in tampa ang Galilea.

Si Yesus sumama' si inang émpo i Petrus wo sé tou walina

²⁹ Kekesot i Yesus am balé paapo'an é agama Yahudi itu, wo Sia mangé mewali-wali wo si Yakobus wo si Yohanes am balé i Simon wo si Andreas.

³⁰ Asi témpo itu, si inang émpo i Simon makatekel, ampa'paan in sakit paso'. Wo makala'us icua éra a si Yesus sapa- oka sia sumakit.

³¹ Wo si Yesus mangé rumuru a si wéwéné itu, timboien-Na eng kamana, ilukut-Na wo icatalao en sakit paso'na wo selewiranna séra.

³² Tutuw matawio im bengi, keuntep ako i yéndo wo iwali éra mai waya sé tou sumakit wo sé tou rinasuk i sétang a si Yesus.

³³ Pakasa sé tou ang kota itu imali'uso mai an dior im balé itu.

³⁴ Wo keli en tou sinama' i Yesus a sé membam-balinaan en sakit wo ka'i Sia musér sé sétang. Ra'ica iwéé-Na sé sétang itu rumoma', ampa'paan katuusan éra si séi Sia.

Si Yesus kumua in Abar Kaaruien ang kota-kota walina

³⁵ Asi woondona mai, an tutuw i rapapé', si Yesus tumoor wo kumesot am balé. Sia mangé an tampa lulu in tou wo sumombayang am bitu.

³⁶ Taan si Simon wo sé kara-karapina mangé mangéré Sia.

³⁷ An tutuw peta'up éra Sia, wo icua éra, “Guru, pakasa sé tou maéré-éré si Guru.”

³⁸ Sowat i Yesus, “Én, mayoo kita mangé an tampa walina ang kota-kota an sangkum am bia'i, wosama' Aku ro'na kumua in Abar Kaaruien, ampa'paan in ituo Aku mai.”

³⁹ Anaé, si Yesus mangé am pakasa in tampa ang Galilea. Sia kumua in Abar Kaaruien am balé-walé paapo'an éra wo musér sé sétang.

Si Yesus sumama' si tou kusta

⁴⁰ Awéan esa tou kusta mai a si Yesus. Si tou itu kumundu an dior-Na wo mekiupus, icuana “Sa woo icasalé' i Tuang, si Tuang ro'na sumama' yaku.”

⁴¹ Wo mai eng kaupusan i Yesus a si tou itu. Yulur i Yesus eng kama-Na e misu' si tou itu wo kumua, “Icasalé'-Ku, masama'o ko!”

⁴² Asi témpo ituke', eng kusta i tou itu icatalao wo sia masama'.

⁴³ Kekawus in itu makala'us ru'du'-Na si tou itu mangé, wo lupuan-Na i repet,

⁴⁴ “Ta'néieno mangé, tioo icuamu a si séike' mangé sapa e mamuali ai co. Taan mangé ipapaturu' owo en owakmu a si imam. Wo mééo mio' raragés binatang pinokol si aiperénta i Musa, tanu tuus ai séra sa ko imasama'o.”

⁴⁵ Taan mangéke' taré ipenisi-nisil i tou itu am bisa-wisa sapa e imamuali ai sia, akar si Yesus ra'io toro ka'i mapaturu-turu' in owak an untep ing kota. Sia asalo oka maento' an tampa-tampa lulu in tou ang kesot ing kota. Mandé ka'i in taniitu, sé tou am bisa-wisa menga-ngaike' a si Yesus.