Lukas 21 - En Taar Weru a nunuwu' é Tontemboan

En andumoro' i raragés i wéwéné balu lengéi

¹ An tutuw i Yesus am Balé Le'nas, peméa-méan-Na rékén sé tou siya' mengapumpun in doit am piti papumpunan in doit raragés.

² Winéan-Na rékén ka'i si esa wéwéné balu lengéi an tutuw sia mumpun rua roit logam am piti itu. En doit itu em bééna si tumeki-tekic.

³ Wo icua i Yesus, “En ulitna icua-Ku mangé ai camu, si aiwéé i wéwéné balu lengéi anio' eng kumeli mai wo sé aiwéé é pakasa é tou itu.

⁴ Ampa'paan séra im baya iméé i raragés ang kasiyaan éra. Taan si balu lengéi anio' iméé i raragés ang kalengéianna. Wo ra'ica siituke', aiwéénao waya sé ai sia mandé sia lengéi.”

Em Balé Le'nas pakatongka-tongkaren oka

⁵ Awéan piraan murit i Yesus memaa-maar andumoro' im Balé Le'nas, icua éra, “Em Balé Le'nas itu loor keli, ampa'paan winangun maké im batu-watu loor wo pinerongan ka'i im barang-barang sé airagéso é tou a si Amang Kasuruan.” Wo icua i Yesus ai séra,

⁶ “Maai oka en endona, sapa en sinéré miow itu pakatongka-tongkaren oka, akar ra'io wana watu e meliunsunan am bawo im batu walina mandé esake'.”

En to'tolan ing kawenduan

⁷ Wo wuéien é murit i Yesus ai Sia, “Icua i Guru em Balé Le'nas itu pakatongka-tongkaren oka, kawisa réén en itu mamuali? Wo sapa réén en tuusna sa en itu tawio mamuali?”

⁸ Isowat i Yesus, “Matéi-téiro mangé kamu, wosama' kamu ra'- ica sélé'kow é tou. Ampa'paan kelian sé tou e maai sa wo mangaku sapaoka séra itu Yaku. Icua éra in tana'i, ‘Yakuo si Kristus!’ Wo icua éra ka'i, ‘En endo kaka'puan ing kayo'baan makatawio!’ Taan tioo percayan iow séra.

⁹ Wo sa kamu luminga in abar andumoro' im perang wo andumoro' sé tou mengasundur sé pemerénta, tioo kamu maindé'. Ampa'paan pakasa en itu musti mamuali owo, taan en itu ra'ipé' an témpona ing kaka'puan ing kayo'baan.”

¹⁰ Wo icua ka'i i Yesus, “Wo e mamuali oka ka'i, si esa bangsa mensunduran oka wo sé bangsa walina, si esa kakolanoan mensunduran wo sé kakolanoan walina.

¹¹ Wo awéan oka ka'i eng kamamualian en tana' mangéro' repet, am bisa-wisa awéan oka kaareman wo am bisa-wisa ka'i awéan sakit mengalawé. Wo mamuali oka ka'i an langit andumoro' sé kala'meren wo kalinteren oka mai.

¹² Taan ra'ipé' mamuali waya en itu, kamu tangkaan owo wo okoien oka é tou. Wo isarakan éra oka kamu am balé-walé paapo'an é agama Yahudi en akimen wo yuntep am bui wo iwali éra oka ka'i a sé kolano wo a sé makakawasa ampa'paan kamu makiit Yaku.

¹³ Ang karoro'an iow paakimen, asi oras ituo en témpo miow masairi andumoro' in Abar Kaaruien i Amang Kasuruan.

¹⁴ Ampa'paano in itu, ketereno mangé en até miow wo tioo maindé-indé' andumoro' in sapa si musti icua miow e méla in owak.

¹⁵ Ampa'paan, émaan-Ku oka kamu pinter manuwu' wosama' kamu ra'ica kasunduran wo ra'ica ro'na icélong é kaséké' miow.

¹⁶ Kamu ka'i isarakan oka é matu'a miow, é poo-poow iow, é pamalé miow wo é kara-karapi miow a sé kaséké' miow wo piraan tou ai camu patén éra oka.

¹⁷ Wo ka'i pakasa sé tou masuut oka icamu ampa'paan makiit Yaku.

¹⁸ Mandé in taniitu, tioo kamu maindé', ampa'paan mandé esake' em buuk an do'kos iow ra'ica wana e rumongkor.

¹⁹ Sa kamu wutu-wutul le'tek maéman a Yaku kamu makéré oka ing katouan akar ing kauré-uré.”

En Yerusalem tongkaren oka

²⁰ Icua ka'i i Yesus, “Sa sérén iow en Yerusalem lini'ciro é suraro, musti kailekan iow sapaoka eng kota itu tawio matongkar.

²¹ Asi témpo itu sé tou an Yudea musti tumincas angé ang kuntu-kuntung. Wo sé tou an untep ing kota musti sumingkir asi kota itu. Wo sé tou ang kesot ing kota tioo meunte-untep ang kota itu.

²² Ampa'paan asé endo ituo en orasna i Amang Kasuruan méé ukuman, wosama' pakasa sé aipatic ang Kitap Le'nas lekepen.

²³ Wo si kala'meren asi témpo itu, sé wéwéné maowa-owak wo sé pasusuané' é toyaang makatoué', uli-ulit mawendu oka keli, ampa'paan am pakasa in tana' anio' sumangkum oka ing kawenduan wangko' wo sé tou am bitu ukumen oka i Amang Kasuruan in uli-ulit uter.

²⁴ Sé tou itu awéan sé patén oka in sa'bel wo awéan ka'i sé tangkaan mamuali tawanan wo paalin oka a negara-negara é tou ra'ica Yahudi. Wo en Yerusalem anio' mai oka tongkaren é bangsa ra'ica makatuus si Amang Kasuruan wo kawasan éra akar malekep en témpo aitantu-Na ai séra.”

Si Toyaang i Tou maai sumawel wo in andéan andumoro' in tuura in ara

²⁵ “An tutuw si Toyaang i Tou maai sumawel, awéan tuu-tuus sé kalinteren oka mai e mamuali asi yéndo, serap wo a sé sumesendot. Wo pakasa sé tou ang kayo'baan maindé' oka wo mabingo an tutuw luminga in deges repet keli si kalinteren oka mai wo en téngéna in sempa' wangker an ta'sic si kaindéén oka mai.

²⁶ Sé tou wutu-wutul tawio maté in indé' an tutuw suméré waya in tuu-tuus sé ra'io icakua mai ang kayo'baan, ampa'paan eng kawasa-kawasa an langit malicoko oka.

²⁷ Asi témpo itu sérén oka é tou si Toyaang i Tou mai ang kayo'baan pakasaputen ing kambung. Sia mai ang karapi pakasa ing kawasa wo ing kawangko'-Na.

²⁸ Sa pakasa en itu tumo'tolo mamuali, tu'tuleno mangé en atému wo maya'o mangé wuta im paarapen ampa'paan en témpona i Amang Kasuruan mai lumowir icamu makatawio.”

²⁹ Wo icua i Yesus en andéan anio' a sé murit-Na, “Wéan iow rékén en tuura in ara kuma'pa sé tuura walina.

³⁰ Sa sérén iow en tuu-tuura itu masééo, kailekano miow sa matawio en oras ing kasendangen.

³¹ Taniitu ka'i sa sérén iow in andumoro' sé aicua-Ku tarépé' itu mato'tolo mamuali, kailekano miow sapaoka makatawio si Amang Kasuruan maai Kumawasa tanu Kolano.

³² En ulitna icua-Ku mangé ai camu, sé tou menonou intarépé' ra'ipé' kawisa maté, sa pakasa en itu ra'ipé' mamuali.

³³ En langit wo eng kayo'baan maka'pu oka, taan e nunuwu'-Ku ra'ica maka'pu akar ing kauré-uré.”

En sina'u wosama' matéi-téir

³⁴ Wo icua i Yesus, “Téirano mangé sumama-sama' en owak iow, tioo en até miow wuta ing kasalé-salé'an sé ra'io masoma wo mengele-ngelep akar i malangu wo tioo kamu maindé-indé' andumoro' ing kaperluan iow susur in endo. Sa kamu mengéma-ngéma'ke' tanu siitu, an tutuw si Toyaang i Tou maai sumawel, kamu ra'ipé' tu'tul. Ampa'paan si endo itu tumarépé'anke'mai, tanuoka in ta'kong ipatangka' sé binatang.

³⁵ Wo en endo itu sangkumen oka waya é tou ang kayo'baan anio'.

³⁶ Ampa'paano in itu matéi-téiro mangé kamu wo menomba-nombayango mangé, wosama' kamu keter en sumangkum ing kawenduan sé mamuali oka sa wo ka'i makawoo tumulung an dior i Toyaang i Tou tutuw Sia mai makim icamu.”

³⁷ Susur in endo si Yesus masusui am Balé Le'nas wo an tutuw imawengio, Sia mangé mento' an Tolaina in Zaitun.

³⁸ Wo susur i mamoondopé' keli sé tou mai ai Sia am Balé Le'nas en luminga in sususuien-Na.