Lukas 19 - En Taar Weru a nunuwu' é Tontemboan

Si Zakheus tumerima si Yesus

¹ Icateka' mangé si Yesus ang kota Yerikho, Sia maya' melala'us lumangkoi ing kota itu.

² Ang kota itu awéan si esa tou kikiiten é matagi im pajak, sia ka'i tou siya' e ngaranna Zakheus.

³ Sia rumaméji suméré tambisa si Yesus itu. Taan ra'ica kaséréanna si Yesus, ampa'paan keli asé tou wo en owakna ka'i kompéng.

⁴ Wo sia tuméron rumior angé asé tou keli itu wo lumaput an tuura in ara wosama' ro'na kaséréanna si Yesus en lumangkoi am bitu.

⁵ An tutuw i Yesus icateka'o an duru in tuura in ara itu, kanaten-Na mangé si Zakheus wo icua-Na, “Zakheus, morak tumumpao mai ko! Ampa'paan asi endo anio' Aku musti lumosér am balému.”

⁶ Wo sia mario-rior tumumpa wo terimanna si Yesus ang karapi in arui en até.

⁷ Taan pakasa é tou sé makaséré in itu mengimbu-ngimbulu. Icua éra, “Sia lumosér oka am balé i tou ang kamesé-meséaan!”

⁸ An tutuw i Yesus am balé i Zakheus wo sia tumulung wo kumua a si Apo' Yesus, “Tuang! Sangaperua ing kasiyaanku, iwééku oka a sé tou lengéi. Wo si séike' mangé si sumangkumo niuwak wo niindoanku in doit, iwaréngku oka sumawel ai sia makaepat lumepet!”

⁹ Wo icua i Yesus ai sia, “Asi endo anio', pakasa sé am balé anio' linowiro i Amang Kasuruan, ampa'paan ko wutu-wutul maéman a si Amang Kasuruan meputé si apo'mu Abraham.

¹⁰ Ampa'paan si Toyaang i Tou mai e mangéré sé tou itumayango asi Amang Kasuruan wo lumowir iséra an ukuman ing kamesé-meséaan.”

En andéan andumoro' in doit mina

¹¹ Ang karoro'an é tou keli malingapé' si Yesus maroma' wo lala'us-Na ka'i in sumisil esa andéan, ampa'paan Sia matawio an Yerusalem wo pawasan ka'i é tou itu, sapaoka Sia makala'- uso merénta tanu Kolano ai séra.

¹² Icua i Yesus, “Awéan esa tou wangko' wo pasiri-siriin, mangé an esa roong wangker wo tayang en lantiken mamuali kolano. Pakalantikenai, sia maréng sumawel an doongna.

¹³ An tutuwna ra'ipé' mangé, towanna owo sé sangapulu' atana wo wéanna makélé esa mina. Wo icuana ai séra, ‘Pakéno en doit anio' e mangkér akar aku maréngai sumawel.’

¹⁴ Taan sé tou an doongna itu masuut isia. Anaé, an tutuw sia imangém wo iru'du' éra tou mangé an doong wangker wo tayang itu, eng kumua tana'i, ‘Ra'ica kiim ami si tou itu mamuali kolano ami.’

¹⁵ Taan si tou itu kasake' in linantik mamuali kolano. Wo sia maréng sumawel an doongna wo towanna sé ata sé winéanna roit mina, ampa'paan casalé'na kakailekanna pira eng kauntungan kinéréan éra asi esa wo si esa.

¹⁶ Si ata kataré mai wo kumua ai sia, ‘Tuang, si esa mina aiwéému a yaku itu, intarépé' imamualio sangapulu' mina.’

¹⁷ Wo icua i tuang itu a si ata itu, ‘Wutu-wutul loor e niéma'mu itu. Ico ata loor wo le'tek. Ampa'paan ko ro'na tinokéan in tawoien teké', anaé wéanku ko kawasa e merénta sangapulu' kota.’

¹⁸ Mai ka'i si ata karua wo kumua, ‘Tuang, si esa mina aiwéému a yaku itu, intarépé' imamualio lima mina.’

¹⁹ Wo icua i tuang itu a si ata itu, ‘Sa taniitu wéanku ko kawasa e merénta lima kota.’

²⁰ Mai ka'i si ata walina wo kumua, ‘Tuang, nio' en doit mina i tuang, sinaputku in lénso wo ayéma'ku sumama-sama'.

²¹ Icaindé'ku si tuang ampa'paan si tuang tou bengis. Si tuang mengaindo sapa si ra'ica anu i tuang wo mengaupu' si ra'ica ayusew i tuang.’

²² Wo icua i tuangna a si ata itu, ‘Éi ata léwo'! Akimenku ko iciit in aicuamu in esa. Kailekanmuo em periku keté, mengaindo si ra'ica anuku wo mengaupu' si ra'ica ayusewku.’

²³ Sa taniitu kéitu réén en doitku itu ra'ica ayéma'mu am bank, wosama' an tutuwku maréngai sumawel, terimanku oka en doit itu ang karapio i rénténa?

²⁴ Wo icua i tuang itu a sé tou makatulung am bitu, ‘Indono e mina itu ai sia wo iwééo mio' a si ata si makaanu in sangapulu' mina.’

²⁵ Taan icua é tou itu, ‘Tuang, sia makaanuo sangapulu' mina.’

²⁶ Isowat i tuang itu, ‘Wutu-wutul icuaku ai camu: Sé tou ro'na pengatokéan in sapake' mangé, séra wéan oka lébé keli mai. Taan sé tou ra'ica toro patokéan in sapake' mangé, sapa ka'i sé ai séra pakaindo-indon oka.

²⁷ Wo intarépé', pakasa sé kaséké'ku itu sé ra'ica masalé' yaku mamuali kolano éra, iwali mai wo patén an diorku!’ ”

Si Yesus sinungkul in arui wo iparayo-rayo an Yerusalem

²⁸ Kekawus i Yesus sumisil in andéan itu, Sia lumala'us im bawayaan maangé an Yerusalem. Sia maya' rumior asé murit-Na.

²⁹ An tutuw matawio im Betfage wo im Betania sé roong an Tolaina si makangaran Zaitun, si Yesus rumu'du' sé rua murit-Na.

³⁰ Icua-Na ai séra, “Mangém kamu asi roong an dior itu. An tutuw iow muntep am bitu, kaséréan iow oka esa keledai wo'bas ipakawa'kes si ra'ipé' sumangkum ako pinaké. Wukaano mio' en talina wo paalinai.

³¹ Wo sa awéan tou mamuéi, ‘Kéitu réén pawukaan iow en tali i celedai itu?’, sowateno mio' in tana'i, ‘Paperlun i Tuang ami.’ ”

³² Wo sé rua murit itu mangé wo pakasa sé ipeta'up éra meputé wutul wo en aicua i Yesus.

³³ An tutuw éra mawuka' in tali i celedai itu wo icua é tou sé makakeledai itu: “Kéitu réén wekar iow si celedai itu?”

³⁴ Icua éra, ‘Paperlun i Guru.’

³⁵ Paalin éra mai si celedai wo'bas itu a si Yesus, wo ya'li' éra eng karai éra an licur i celedai itu. Wo atasan éra si Yesus sumaké am bawo i celedai itu.

³⁶ Ang karoro'an i Yesus malangkoi makasaké asi celedai itu, sé tou keli maa'li' ing karai éra an lalan.

³⁷ An tutuw Sia matawio in Yerusalem, an lalan maperos in Tolaina in Zaitun, pakasa é tou sé makiit Sia tumo'tolo maaru-arui wo marayo-rayo si Amang Kasuruan in suara taangko' ampa'paan pakasa eng kakaya'kaan sé sinéréo éra.

³⁸ Icua éra, “Rayoo Sia si mai tanu Kolano si mai ang karapi i ngaran i Amang Kasuruan! Kita pineeluro wo si Amang Kasuruan si an sorga wo rayoo wo siriino Sia asi tampa Rumangka-rangka'!”

³⁹ Piraan tou Farisi sé mewali-wali wo sé tou keli itu kumua a si Yesus, “Guru, romaanio' sé makii-kiit si Guru wosama' séra menes.”

⁴⁰ Isowat i Yesus, “Icuaku ai camu, sa séra menes, sé watu anio' oka e mangko' rumayo Yaku.”

Si Yesus maamé' an tutuw suméré ing kota Yerusalem

⁴¹ An tutuw i Yesus makatawio in Yerusalem wo sérén-Na eng kota itu wo amé'an-Na.

⁴² Icua-Na: “Oré wéta' ko é kota Yerusalem! Lébé loor woo sa asi endo anio' kamu sé maento' am bitu makailek tumambisa meeluran wo si Amang Kasuruan. Taan intarépé' pakasa en itu ra'ica kailekan iow!

⁴³ Taan maai oka en endona, ko li'ciren oka ing kakala' é kaséké'mu, yémbong éra oka wo am bisa-wisake' mai serangen éra.

⁴⁴ Wo ko é kota Yerusalem pakatongka-tongkaren oka wo sé tou ang kotamu pakapaté-patén oka. Wo ra'io iwaya éra esa watu e meliunsunan am bawo im batu walina. En itu si mamuali oka, ampa'paan ra'ica kailekanmu sapaoka intarépé' si Amang Kasuruan imayo lumowir ico.”

Si Yesus musér sé tou mawangkér am Balé Le'nas

⁴⁵ Wo si Yesus muntep am Balé Le'nas. Wo tumo'tolo yusér-Na sé tou mawangkér am bitu.

⁴⁶ Icua-Na ai séra: “Ang Kitap Le'nas aipatic in tana'i, ‘Em balé-Ku walé pengasombayangan.’ Taan niéma'o miow tampa mengauwak sé tou.”

⁴⁷ Susur in endo si Yesus masusui am Balé Le'nas. Sé kikiiten é imam é tou Yahudi wo sé makailek wutul in Torat wo sé tou pasiri-siriin é tou Yahudi rumaméji maté Sia.

⁴⁸ Taan ra'ica kailekan éra tumambisa e maté si Yesus, ampa'paan pakasa en tou masalé' mengalinga in sususuien-Na.