Kolose 3 - En Taar Weru a nunuwu' é Tontemboan

Menonou weru ampa'paan imeesao wo si Kristus

¹ Poo-poow, si Kristus itumouo sumawel, anaé kamu sé maéman ai Sia tanuoka aitou sumawel ang katouan weru mewali-wali wo Sia. Ampa'paano in itu rumaméjio mangé kamu mangéré andumoro' sé an sorga. Asi tampa itu si Kristus makalukut ang kakan i Amang Kasuruan.

² Anaé, weroteno mangé in andumoro' sé an sorga wo tioo memero-merotke' in andumoro' sé ang kayo'baan.

³ Ampa'paan kamu tanu imatéo wo eng katouan iow aicaenep mewali-wali wo si Kristus ang karapi i Amang Kasuruan.

⁴ Si Kristuso em palemboian ing katouan iow. Wo sa Sia maai sumawel ang kayo'baan ang karapi i rarayo wo in sisiri'-Na, kamu ka'i kaséréan oka wo pekiit irayo wo in siriin mewali-wali wo Sia.

⁵ Ampa'paano in itu tiya'o waya eng kasalé-salé'an in owak ang katouan iow, tanumai, mabersina, najis, kasalé'an in owak andumoro' in cabul, kasalé'an léwo', longi' am baya-waya si ro'na ipeputé wo i mengaapo' a sé opo-opo'.

⁶ Pakasa en itu mengaéma' ing kae'bowan i Amang Kasuruan [a sé tou ra'ica le'tek ai Sia.]

⁷ Indior kamu ka'i mengaéma' in taniitu an tutuw eng katouan iow pakakawasané' ing kasalé-salé'an itu.

⁸ Taan intarépé', tiya'o waya sé kasalé-salé'an léwo' anio' ang katouan iow, menge'bo-nge'bow, mae'bow akar ing karangoan, mawasa-wasa in léwo' a sé tou walina, mengawuruk i ngaran é tou wo mawa'ba', en itu tioo kumesot am ba'ba' miow.

⁹ Tioo kamu mengatowo a si esa wo si esa, ampa'paan eng katouan uré wo em peri uré itu aitela'uo miow.

¹⁰ Wo kamu intarépé' winéano ing katouan weru, wo em peri miow pemeru-merun i Amang Kasuruan si méma' icamu kiit ing gambar-Na, wosama' kamu wutu-wutul makatuus Sia.

¹¹ Wo in taniitu, kamu sé mamualio weru, ra'io wana em bédana, tou Yunani kuma'pa tou Yahudi, tou sinunat kuma'pa tou ra'ica sinunat, tou Barbar kuma'pa tou Skit, ata kuma'pa ra'ica ata, pakasa waya puté. Taan si penting keli si Kristus wo Sia menonouo an owak iow im baya.

¹² Ampa'paano in itu, kamu sé sinisiro i Amang Kasuruan wo sé line'nas-Nao wo ka'i sé icaupus-Na, ituru'o mangé eng kaupusan iow, mengaéma' mangé in loor, mengako'kos angé in até, tioo mengakasar a sé tou wo malese-lesen mengasaru ing kawenduan asi esa wo sé walina.

¹³ Sa awéan tou e méma' ing kaséaan ai camu, ituru'o mangé eng katalesenan iow a si tou itu wo sa awéan ai camu si menii-niim in léwo' membém-béan angé ing kaampungan. Tanu si Casuruan mééo ing kaampungan ai camu, mengaéma'o mangé tanu siitu.

¹⁴ Wo si penting keli am pakasa in itu: meupu-upusano mangé kamu, ampa'paan en upus itu mengaéma' icamu meesa akar em paesaan iow itu wutu-wutul lekep.

¹⁵ Iwayao mio' en até wo em pemero-meroten iow kawasan ing kaeluran si aiwéé mai i Kristus. Ampa'paan si Amang Kasuruan tumowao icamu mamuali tanuoka esa owak wosama' kamu si esa wo si esa menonou ang kaeluran. Wo ka'i mengawéé mangé i makapulu'sama' a si Amang Kasuruan.

¹⁶ Wo iwayao e nunuwu' i Kristus kasake' an até miow ang karapi i mawuta-wuta akar kamu si esa wo si esa ro'na mensun-susuian wo mensin-sina'uan ang karapi wuta ing kapinteran asi Amang Kasuruan owo. Wo icantaro mangé e mazmur, kakantaren rarayoan wo kakantaren rohani wo mawéé mangé i makapulu'sama' a si Amang Kasuruan si lumembo mai an até miow.

¹⁷ Wo sapake' mangé en émaan iow kuma'pa icua miow, émaano mangé waya en itu kumiit ing kasalé'an i Apo' Yesus, ang karapi i makua makapulu'sama' a si Amang Kasuruan, Amangta, ampa'paano i Yesus Kristus.

En andumoro' in ubungan é anggota an esa pamalé

¹⁸ Éi wéwéné-wéwéné sé kinawéngo, male'te-le'teko mangé a si penanaanmu. Ampa'paan siituo si musti émaan é tou sé maémano a si Amang Kasuruan.

¹⁹ Éi tuama-tuama sé kumawéngo, caupus angé si penanaanmu wo ra'ica toro mengakasar ai sia.

²⁰ Éi toya-toyaang, pengakiiten angé em perénta é matu'a miow am baya-waya, ampa'paan siituo e mengaarui in até i Casuruan.

²¹ Éi amang-amang, tioo pengasakiten en até é toyaangmu, wosama' séra ra'ica mateké' en até.

²² Éi ata-ata, pengakiiten angé em perénta i tuang iow ang kayo'baan anio' sapake' mangé en airu'du'na. Tioo kamu asalo mengaturu' in le'tek an diorna e mengaarui in aténa, taan male'te-le'teko mangé kamu ang karapi in lekep en até ampa'paan kamu maindé' a si Casuruan.

²³ Sapake' mangé en émaan iow, tawoieno mangé en itu ang karapi in lekep en até, meputéo kamu sumelewir a si Casuruan, ra'ica sumelewir sé tou.

²⁴ Weroten sumama-sama', sapaoka teriman oka miow em bagéan asi Casuruan owo, si aitu'tul-Nao ai camu. Siituo en laasa iwéé-Na oka ai camu. Ampa'paan en ulitna, kamu ang karoro'an i maselewir a si Tuang iow, Siao si Kristus.

²⁵ Si séike' e méma' ing kameséaan, pamuléngenna oka eng kameséaanna itu. Ampa'paan si Casuruan ra'ica masisir in tou.