Kisah Para Rasul 8 - En Taar Weru a nunuwu' é Tontemboan

^1a An tutuw i Stefanus pinaté éra, niénan ka'i i Saulus.

Si Saulus mokoi sé tou maéman an Yerusalem

^1b An tutuw itu sé tou maéman an Yerusalem tumo'tolo pengoko-ngokoien. Anaé séra im baya aicaserar am pakasa in sangkum in Yudea wo an Samaria, taan sé ruru'du'an kasake' mento' an Yerusalem.

² Sé tou le'tek a si Amang Kasuruan mangé mindo i mayat i Stefanus wo icubur wo séra maamé' akar in sesendu'an oka.

³ raméjin i Saulus eng kuma'pu sé jamaat. Wo sia muntep am balé-walé wo icesotna sé tuama wo sé wéwéné wo isarakanna en yuntep am bui.

Si Filipus an Samaria

⁴ Wo an tampa-tampa tinincasan é tou maéman itu, séra mengua-ngua in Abar Kaaruien andumoro' i Yesus Kristus a sé tou keli.

⁵ Esaan ai séra itu si Filipus. Sia mangé an esa kota an Samaria wo kumua in andumoro' i Mesias.

⁶ Sé tou keli am bitu imakalinga en aicua i Filipus wo sinéré éra ka'i pakasa en tuu-tuus kakaya'kaan sé niéma'na. Anaé, tinerima éra ang karapi in lekep en até pakasa en aicua i Filipus.

⁷ An tutuw itu ka'i, si Filipus imusér sé sétang irumasuk sé tou keli wo sé sétang itu makala'us kumesot ang karapi i mengangko-ngangko'. Kelian ka'i sé tou késo' wo kénto' sé sinama'na.

⁸ Ampa'paano in itu, sé tou ang kota itu maaru-arui.

⁹ Ang kota itu, awéan si esa tou makangaran Simon. Sia itu uréo masihir sé tou wo méma' sé tou an Samaria mangaya-ngaya'ka'. Sia mengatirayo in owakna tanuoka kéndo' isiao si tou penting keli.

¹⁰ Pakasa in tou, wangkoo kuma'pa' teké'pé' sé mengakiit si Simon masihir itu, séra makua, “Si tou anio' awéan kawasa asi Amang Kasuruan si kawasa pengatuulen ing Kawasa Wangko'.”

¹¹ Séra kumiit sia ampa'paan uréo sia méma' iséra mangaya-ngaya'ka' in sihirna itu.

¹² Taan intarépé' séra luminga si Filipus makua in Abar Kaaruien andumoro' si Amang Kasuruan Kumawasa tanu Kolano wo andumoro' i ngaran i Yesus Kristus. Kelinga éra in itu wo séra maéman wo méé in owak em baptisen, séra itu tuama wo wéwéné.

¹³ Si Simon masihir itu ka'i mamualio tou maéman wo nibaptis. Pakabaptisen ako, sia tatap mewali-wali wo si Filipus am bisake' en angéan i Filipus. Wo an tutuw i Simon itu suméré in tuu-tuus wo kakaya'kaan wangko' si niéma' i Filipus, sia mangaya-ngaya'ka'.

¹⁴ Asi témpo itu, sé ruru'du'an an Yerusalem makalinga sa kelian tou an tana' Samaria maémano in Taar i Amang Kasuruan. Wo yutus éra si Petrus wo si Yohanes mangé am bitu.

¹⁵ Icateka' mangé am bitu, sé rua ruru'du'an itu sumombayang wosama' sé tou Samaria sé maémano itu ro'na tumerima i Roh Le'nas.

¹⁶ Mandé esake' asé tou Samaria itu, ra'ipé' wana si tumerimao i Roh Le'nas, ampa'paan sé tou itu baptisené' ang karapi i ngaran i Apo' Yesus.

¹⁷ Anaé, si Petrus wo si Yohanes maro ing kama éra an do'kos é tou Samaria itu, wo séra tumerima i Roh Le'nas.

¹⁸ An tutuw itu si Simon makaséré sé ruru'du'an itu e maro ing kama an do'kos é tou Samaria itu wo séra tumerima i Roh Le'nas. Wo sia méé roit a sé ruru'du'an itu wosama' sia ka'i ro'na méma' in taniitu.

¹⁹ Icuana, “Tuang-tuang, wéanai aku kawasa itu wosama' sa aku maro ing kama a si esa tou, si tou itu ro'na tumerima i Roh Le'nas.”

²⁰ Taan icua i Petrus ai sia, “Icawangkuro ko ang karapi in doitmu itu. Pawerotenmu réén ro'na telesanmu in doit eng kamang aitambér i Amang Kasuruan.

²¹ Ico ra'ica toro mindo bagéan asi tawoien anio', ampa'paan en atému péngkor an dior i Amang Kasuruan.

²² Anaé, mape'diso mangé ang kaléwo-léwo'anmu wo sumombayango mangé a si Casuruan wosama' ampungan-Na mai em paaté-aténmu léwo' itu.

²³ Ampa'paan pakasérénku ka'i ko kokanat keli wo en atému pakakawasan ing kaléwo-léwo'an.”

²⁴ Isowat i Simon ai séra, “Tuang-tuang, isombayango mangé aku a si Casuruan wosama' si aicua miow a yaku ra'ica mamuali.”

²⁵ Kekawus i Petrus wo si Yohanes masairi wo makua in Taar i Amang Kasuruan a sé tou, wo séra maréng sumawel an Yerusalem. Am bawayaan, séra mengua-ngua in Abar Kaaruien andumoro' i Yesus an doo-roong walina an Samaria.

Si Filipus wo si kikiiten an Etiopia

²⁶ Asi makasa, si esa malaékat i Amang Kasuruan rumu'du' si Filipus, “Maya'o méko. Kumiito in lalan an Yerusalem owo maperos éko ang Gaza.” Si lalan itu lulu in tou.

²⁷ Kelinga in itu, si Filipus makala'us maya'. An uner im bawayaan, sérénna awéan esa tou kikiiten an Etiopia owo si maurus ing kasiyaan i Kandake si ratu an Etiopia. Si kikiiten itu makalekepé' maapo' an Yerusalem,

²⁸ wo asi témpo itu sia mawaréngo an tana' Etiopia. Sia makalukut ang kerétana wo ang karoro'an i mengabaca ing kitap i nabi Yesaya.

²⁹ Wo icua i Roh Le'nas a si Filipus, “Rumuruo mangé ang keréta itu!”

³⁰ Si Filipus makala'us rumuru mangé ang keréta wo linganna si kikiiten itu mengabaca ing kitap i nabi Yesaya. Wo icua i Filipus ai sia, “Kailekan réén i tuang sapa em pabacan i tuang?”

³¹ Isowatna, “Tumambisa aku ro'na makailek sa ra'ica wana tou en sumusui a yaku.” Wo pekiupusenna si Filipus sumaké ang keréta itu wo lumukut an duruna.

³² Sé nats binaca i kikiiten itu tana'i, “Sia paalin tanuoka maali si domba mangé pokolen. Sia ka'i asalo i makapenes ra'io rumoma' mai in sapa-sapa tanuoka si ana' i domba pakuntingan im buuk.

³³ Sia ipaséro' é tou wo pengaémaan éra marapitke'. Si séi oka en sumisil andumoro' sé taranak-Na? Ampa'paan en aseng-Na indon oka ang kayo'baan.”

³⁴ Wo icua i kikiiten itu a si Filipus, “Wuéienku ai co, si aicua i nabi anio' andumoro' i séi? Andumoro' in owakna in esa kuma'pa andumoro' é tou walina?”

³⁵ Kelinga in itu, tumo'tolo si Filipus kumua maké i nats an Abar Kaaruien andumoro' i Yesus Kristus en sisil ai sia.

³⁶ Séra lumala'us i bawayaan wo séra icateka' an esa tampa awéan rano. Icua i kikiiten itu a si Filipus, “Sérénmu, am bitu awéan rano! Tambisa, ro'nao réén aku baptisenmu?” [

³⁷ Wo isowat i Filipus, “Sa si tuang maéman a si Yesus Kristus ang karapi in lekep en até, ro'nao baptisen.” Isowat i kikiiten itu, “Yaku wutu-wutul maéman sa si Yesus Kristus itu Toyaang i Amang Kasuruan.”]

³⁸ Wo iru'du' i kikiiten itu yento' eng keréta wo séra in dua tumumpa an dano wo sia baptisen i Filipus.

³⁹ An tutuw éra in dua kumesotai an dano, tumarépé'anke'mai iwali i Roh i Amang Kasuruan si Filipus wo sia ra'io kaséréan i kikiiten itu. Wo si kikiiten itu lumala'us im bawayaanna ang karapi in arui.

⁴⁰ Taan si Filipus, tumarépé'anke' an esao roong makangaran Asdod. Sia maya' melala'us asi tampa itu wo kumua in Abar Kaaruien andumoro' i Yesus Kristus a sé tou am pakasa ing kota akar sia cateka' ang Kaisarea.