Kisah Para Rasul 6 - En Taar Weru a nunuwu' é Tontemboan

Sé pitu tou kinasisiran en sumelewir sé tou lengéi

¹ Sé tou mengakiit in sususuien i Yesus makaaweso eng kakeli. An tutuw itu sé tou Yahudi sé manuwu' i nunuwu' é Yunani mangingimbulu a sé tou Yahudi sé menganuwu' i nunuwu' é Ibrani. Ampa'paan sé wéwéné balu é tou Yahudi menganuwu' i nunuwu' é Yunani itu, ra'io pawéan rékén é tou an tutuw mengaéké ing kaperluan mengendo-ngendo.

² Ampa'paano in itu, sé sangapulu' rua ruru'du'an itu tumowa pakasa sé tou makiit in sususuien i Yesus, icua éra, “Kami in sangapulu' rua tou musti mengua-ngua in Taar i Amang Kasuruan. Suméa'o keli sa yento' ami mengua-ngua in Taar itu ampa'paano i menu'tu-nu'tulke' ing kakanen é tou keli.

³ Anaé, tana'io é poo-poow, aweso taré sisiren iow pitu tou an uner iow. Séra itu musti tou sama', kinawasa i Roh Le'nas wo awéan kapinteran asi Casuruan owo. Sé tou anioo em béan ami oka in tawoien en tumu'tul ing kakanen.

⁴ Wo in taniitu, kami asaloka mengasombayang wo mengakua in Taar i Amang Kasuruan.”

⁵ Pakasa sé jamaat tumerima in sama' sé aicua ai séra itu. Anaé, séra sumisir pitu tou anio': Si Stefanus si wutu-wutul maéman wo kinawasa i Roh Le'nas, si Filipus, si Prokhorus, si Nikanor, si Timon, si Parmenas wo si Nikolaus si ra'ica tou Yahudi taan imuntepo agama Yahudi, sia mai an Antiokhia owo.

⁶ Sé pitu tou itu iwali éra a sé sangapulu' rua ruru'du'an wo séra maro ing kama an dangka' é pitu tou itu wo sumombayang.

⁷ En Taar i Amang Kasuruan makaseraro wo sé tou maéman a si Yesus an Yerusalem makaaweso eng kakeli. Kelian sé imam sumarakan in owak éra wo maéman a si Yesus.

Si Stefanus tinangka'

⁸ Si Amang Kasuruan tumambérai in upus wo ing kawasa-Na a si Stefanus, ampa'paan in ituo sia méma' ing kakaya'kaan wo in tuu-tuus sé ra'io icakua an uner é tou keli.

⁹ Am bitu awéan ka'i piraan tou Yahudi ang Kirene owo wo an Aleksandria, wo awéan piraan ka'i mai ang Kilikia wo an Asia owo. Séra itu indior sumangkumo mamuali ata é tou taan intarépé' ra'io. Em balé paapo'- an éra makangaran ‘Walé paapo'an é tou sé indior sumangkumo mamuali ata.’ Ra'ica icasalé' éra si Stefanus, ampa'paan in ituo séra meindoan roma' wo sia.

¹⁰ Taan émaan i Roh Le'nas si Stefanus pinter keli maroma' akar ra'ica kawooan éra en sumundur sia.

¹¹ Ampa'paan in itu, ang karapi i memene-menes ru'du' éra piraan tou en sumairi in towo, tana'i, “Pinalingao ami sé nuwu' i Stefanus maroma' ang karapi i maojat si Musa wo si Amang Kasuruan.”

¹² Tanu siituo em pengaémaan éra mengawéé in léwo' a sé tou keli, a sé matu'a, a sé makailek wutul in Torat. Wo tangkaan éra si Stefanus wo wésoon éra sia wo iwali éra mangé a Mahkamah Agama.

¹³ Asi tampa itu ru'du' éra piraan tou en sumairi in towo andumoro' i Stefanus. Icua é tou sé mengasairi itu, “Si tou anio' ra'ica mento' mengawéé in léwo' andumoro' im Balé Le'nas anio' wo en ukum Torat.

¹⁴ Lininga ami, ipakuana sa si Yesus tou Nazaret itu e tumongkar oka im Balé Le'nas anio' wo rumoba ing kanaramen si aisusuio i Musa indior, si pemaké-makénta akar intarépé'.”

¹⁵ Asi témpo itu, pakasa é tou sé makalukut a Mahkamah Agama tuméinteng si Stefanus wo sérén éra en amona masélap tanuoka malaékat.