Kisah Para Rasul 27 - En Taar Weru a nunuwu' é Tontemboan

Si Yulius makawali si Paulus maangé a Roma

¹ Pinusé'o i gubernur Festus eng kumirim icami im baya maangé a Roma an Italia. Anaé, si Paulus wo piraan tou sé binui walina aisarakan a si esa kikiiten é suraro, makangaran Yulius. Sia pasukan i Kaisar Romawi.

² Wo kami im baya sumaké ang kapal an Adramitium owo, si menuli-nuli oka am pasuwa-suwaan ing kapal an Asia. Wo awéan esa tou icumiit icami, makangaran Aristarkhus, si tou Makedonia ang kota Tesalonika owo.

³ Mando mai, kami tumuli an Sidon. Si Yulius sama' keli a si Paulus, wéanna kaloasan sia mangé a sé kara-karapina wosama' séra ro'na tumu'tul ing kaperluanna.

⁴ Am bituke' kami suméngkot sumawel. Taan an tutuw itu oras in awaat anaé kami suméngkot masu'suk in deges, anaé kami mengii-ngiit in tembir im pulou Siprus wosama' eng kapal ami ra'ica su'suken in deges itu.

⁵ An Siprus, kami suméngkot lumewet in ta'sic wangker si an dior ing Kilikia wo Pamfilia. Wo kami icateka' a Mira an sangkum in Likia.

⁶ An tampa itu, si Yulius makéré kapal si an Aleksandria owo, si suméngkot oka maangé an Italia. Wo iwalina kami im baya méra ang kapal itu.

⁷ Pirao ngando kami suméngkot, eng kapal mawaya' ngenger keli ampa'paan pasu'suken in deges repet wo ang karapi im bendu keli kami matawio ing Knidus. Asi témpo itu en deges repeté' keli, ampa'paano in itu, kami suméngkot mindo lalan walina kumiit an tanjung Salmone am pulou Kreta wosama' ra'ica sumu'suk in deges repet.

⁸ Kami suméngkot ang karapi im bendu keli kumiit in tanjung itu. Kekawus in itu kami icateka' an esa tampa, makangaran Pasuwaan ing kapal Loor. En tampa anio' mentawian wo eng kota Lasea.

⁹ Kami kinatalaano ing keli témpo ampa'paan kami suméngkot masu'suk in deges awaat. Intarépé' ilumangkoio en orasna é tou Yahudi mapuasa wo an orasnao in ta'sic masempa', anaé icawangkur sa melala'us suméngkot. Ampa'paan in ituo ipokéi i Paulus ai séra, icuana,

¹⁰ “Poo-poow, sérénku kita meta'up ing keli kawangkuran wo ing karugian wangko' sa suméngkot melala'us. Ra'icake' em barang-barang paali-alin wo eng kapal tuminep, taan kita im baya ka'i maté.”

¹¹ Taan si Yulius si perwira itu ra'ica kiim luminga si Paulus, sia lébéke' mercaya si mawali ing kapal wo si makaanu ing kapal itu.

¹² Ampa'paan em pasuwaan ing kapal itu ra'ica loor pasuwaan ing kapal-kapal asi oras ing kautingan. Ampa'paan in ituo keli sé tou ang kapal lébé masalé' sa eng kapal maya' suméngkot melala'us mangé ang kota Feniks am pulou Kreta wosama' ro'na mento' toyo' am bitu an orasna ing kautingan. Eng kota Feniks itu kota pasuwaan ing kapal aicari'dir an deges ampa'paan makasaru mako.

Eng kapal sinakéan i Paulus kumandas

¹³ Asi témpo itu, en deges a mékona owo ra'ica talos repet. Anaé, paweroten é tou ing kapal sa séra suméngkot maangé ang kota Feniks ra'ica sapa-sapa. Ampa'paan in ituo angkaien éra en jangkar wo suméngkot angé kumiit in tembir in ta'sic im pulou Kreta.

¹⁴ Taan ra'ica mento' uré, imayo en deges repet maregesai am pulou Kreta owo, si pengatuulen “Reges Timu”.

¹⁵ En deges itu repet keli akar eng kapal ami ra'io makawoo masu'suk in deges itu. Wo kami ra'io wana lalan walina, anaé waya-wayaano sapa e mamuali wo eng kapal ami ipawali-wali oka in deges.

¹⁶ Wo kami iwali in aros akar an tembir in ta'sic am pulou teké' makangaran Kauda. Wo kami kinari'diran toyo' in deges, ampa'paano in itu mandé im bendu keli ro'na kinaindoan ami en londéi teké'.

¹⁷ An tutuw en londéi teké' itu aisakéo ang kapal wo eng kapal itu wa'kesen éra in tali si makali'cir asi kapal itu wosama' eng kapal itu ra'ica materi. Kekawus ako in itu, itumpa éra en layar wo iwaya éra eng kapal ipawali-wali in sempa'. Émaan éra taniitu ampa'paan icaindé' éra oréoka eng kapal kumandas an tampa wawo an duru in ta'sic Sirtis.

¹⁸ En deges si kaindéén oka mai itu mawali-wali ing kapal ami, ampa'paan in ituo mando mai tumo'tolo ipatiya' éra an ta'sic em barang-barang ang kapal.

¹⁹ Asi katelu ngando mai, sé tou ing kapal in esao en tumiya' im pakakas ing kapal.

²⁰ Wo awéan pira ngando kami ra'ica mailek si yéndo wo sé sumesendot. En deges repet ra'ica mento', ampa'paan in ituo paweroten ami sapaoka ra'io wana arapan e malowir.

²¹ Wo si Paulus tumulung an uner éra, ampa'paan pirao ngando sé tou itu ra'ica icuman. Icuana, “Poo-poow, sa lininga miow si aipokéiku asi sangando sapaoka kita ra'ica suméngkot tumela'u im pulou Kreta, tana'i kita ra'ica meta'up ing kawenduan wo kelian eng kinatalaan tanu sia'i.

²² Taan intarépé', mandé wenduo, sina'- uenku kamu wosama' kamu malese-lesen. Ampa'paan ra'ica wana mandé esake' mangé ai camu e maté, wayake' ing kapal anio' e materi.

²³ Ampa'paan, kawengi si Amang Kasuruan si paapo'anku wo si makaanu yaku, rumu'du' mai si malaékat-Na mai tumulung an duruku.

²⁴ Icua i malaékat itu a yaku, ‘Paulus, ra'ica toro maindé'! Ico musti mangé sumaru a si Kaisar Romawi. Si Amang Kasuruan itumambéro mai in upus-Na ai co wo ampa'paano ico pakasa en tou sé suméngkot mewali-wali wo ico malowir oka.’

²⁵ Ampa'paan in ituo é poo-poow, tioo kamu maindé'! Ampa'paan émanenku waya si aicua i Amang Kasuruan a yaku itu wutul mamuali.

²⁶ Taan eng kapal anio' musti i dampar an esa pulou.”

²⁷ Asi wengi kasangapulu' epat, en deges kaindéén oka mai mawali-walipé' ing kapal ami an ta'sic Adria. Wona' katoorao im bengi, sé tou ing kapal makapendam sa eng kapal matawio ing katanaan.

²⁸ Wo séra mangkil im batu si wina'kesan in tali wosama' kailekan éra eng kararem in ta'sic am bitu. Wo eng kararemna wona' epat ngapulu' meter. Wo eng kapal éra maya' ka'i toyo' wo ukuren éra ka'i sumawel, eng kararemna wona' telu ngapulu' meter.

²⁹ Ampa'paan icaindé' éra oréoka eng kapal kumandas am batu karang, anaé itumpa éra en epat jangkar an somoi ing kapal. Séra sumombayang wosama' rior mando.

³⁰ Wo sé tou ing kapal tumumpa in londéi teké' ang karapi i memene-menes ampa'paan rumaméji tumela'u ing kapal itu, tanuoka woo séra matumpa im piraan jangkar an dior ing kapal akar ra'ica kailekan é tou ang kapal.

³¹ Taan en itu kailekan i Paulus wo icuana a si Yulius si perwira é suraro wo sé surarona, “Sa séra tumincas tumela'u ing kapal anio', kamu ra'ica kawisa malowir.”

³² Kelinga in itu wo pokolen é suraro itu en tali in londéi teké' itu wo iwaya éra iwali in aros.

³³ Matawio ing katoora yéndo wo uwasen i Paulus pakasa sé tou ang kapal eng kuman. Icuana, “Ruao duminggu kita itumang in arem ra'ica icuman sapa-sapa mengento-ngento' oka.

³⁴ Ampa'paano in itu, sina'uenku kamu kuman owo wosama' ro'na maketer. Mandé esake' tou ai camu, ra'ica wana wuuk an do'kos iow e rumongkor mandé in esake'.”

³⁵ Kekawus sia kumua in taniitu, sia mindo roti wo kumua mangé makapulu'sama' a si Amang Kasuruan an dior éra waya. Te'bi-te'biinna e roti wo tumo'tolo kuman.

³⁶ Wo en até éra im baya maketer wo séra ka'i kuman.

³⁷ Pakasa sé ang kapal itu eng kakelina rua ngaatus pitu ngapulu' enem tou.

³⁸ An tutuw i mawesuo wo itiya' éra an ta'sic eng karong-karong si pinumpunan ing gandum wosama' eng kapal maporak.

³⁹ Ampa'paan i mandoo, sé tou ing kapal makaséréo in teluk wo ing katanaanna rata, taan ra'ica kailekan éra en tampa itu. Wo puséén éra en dumampar ing kapal an tampa itu.

⁴⁰ Ampa'paan in ituo pokolen éra en tali-tali in jangkar wo iwaya éra en jangkar itu ang karareman in ta'sic. Ang karoro'an in itu ka'i wora éra en tali-tali ing kamudi. Wo wukaan éra ka'i en layar wosama' eng kapal itu iwali in deges ang katanaan itu.

⁴¹ Taan eng kapal éra icasaké am bawo i rangi'ngis wo kumandas. Haluan ing kapal icasu'suk am bitu akar ra'io icaéro'. Wo en somoi ing kapal imateri ampa'paan pawekaran in sempa' wangko'.

⁴² Ampa'paan i imamualio taniitu, sé suraro mawasa i maté sé tou pakaukumen sé ipawali-wali éra wosama' ra'ica wana esa tou en tumincas kume'bung.

⁴³ Taan péronen i perwira éra sapa em pawasa-wasan éra, ampa'paan sia masalé' lumowir si Paulus. Wo peréntanna sé tou sé makailek make'bung, en dumior lumo'tic an ta'sic wo kume'bung akar ang katanaan.

⁴⁴ Wo sé walina mekiit ang karapi i maké papang kuma'pa barang walina sé materi-terio ang kapal. Wo in taniitu séra im baya ro'na malowir akar ang katanaan.