Kisah Para Rasul 26 - En Taar Weru a nunuwu' é Tontemboan

Si Paulus méla in owakna an dior i colano Agripa

¹ Wo icua i colano Agripa a si Paulus, “Intarépé', wéanku kaloasan ko e rumoma' e méla in owakmu.” Wo si Paulus méé tuus mangkai ing kamana wo kumua,

² “Kolano Agripa si pasiri-siriin. Yaku wutu-wutul arui ampa'paan aku winéan kaloasan e méla in owak an dior i tuang andumoro' sé ipatudu é tou Yahudi a yaku.

³ Wopé'ka'i kailekanku, sa wutu-wutul kailekan i tuang eng kanaramen wo e masala ami tou Yahudi. Ampa'paan ituo, pangilekenku wosama' si tuang luminga ang karapi in talesen sapa en icuaku.

⁴ Kailekan waya é tou Yahudi sa tambisa eng katouanku an doongku tumo'tolai aku i mangalitoué', ampa'paan ketoukuke' mai yaku menonou an uner é bangsaku an Yerusalem.

⁵ Uréo séra makatuus yaku. Sa woo séra masalé', séra ro'na sumairi an dior i tuang sapaoka aku uréo menonou mamuali tou Farisi, si golongan wutu-wutul makiit wo mengaéma' in ukum Torat.

⁶ Intarépé' aku aisaru am pengadilan anio' ampa'paan aku maarap in janji si aiwéé i Amang Kasuruan a sé apo-apo'ta,

⁷ wo ka'i si paarapen é sangapulu' rua suruta in tou Israel. Endo wo em bengi séra ra'ica maento' mengaapo' karapi in le'tek a si Amang Kasuruan ampa'paan maarap Sia lumekep in janji-Na. En janji-Na itu sapaoka sé tou imatéo touen oka sumawel. Anaé, é kolano Agripa, ampa'paano im percayanku en janji itu, sé tou Yahudi tumudu yaku.

⁸ Wo intarépé' wuéienku ai camu é tou Yahudi, kéitu réén ra'ica percayan iow sapaoka si Amang Kasuruan ro'na tumou sumawel sé tou imatéo?

⁹ Indior sa kumiit im basaku in esa, émaanku sapake' mangé en sumundur sé tou makiit si Tou Nazaret makangaran Yesus.

¹⁰ En itu émaanku ka'i an Yerusalem. An tutuwku imakéréo kawasa asé kikiiten é imam, tangkaanku sé tou le'nas wo yuntep am bui. Énanku ka'i séra makéré in ukuman patén.

¹¹ Yaku ka'i muntep am balé-walé paapo'an é agama Yahudi wo pengaokoienku sé tou makiit si Yesus wo leséénku séra en sumangkal im paémanen éra. Ampa'paano aku mae'bow keli wo keli paangitenku séra akar ang kota-kota walina.”

Si Paulus sumisil tambisa sia maéman a si Yesus

¹² Icua ka'i i Paulus, “Asi makasa aku makéré surat kawasa asé kikiiten é imam owo e mangé an Damsyik.

¹³ An uner in lalan an tutuw ing katoora i yéndo, éi kolano Agripa, tumarépé'anke'mai sérénku en sendot tumélangai an langit owo, en sendot itu lumébé mai ing kasendot i yéndo. Wo si sendot itu sumaput yaku wo sé tou mewali-wali wo yaku.

¹⁴ Pakasa kami icarepa an tana'. Wo kalingaanku awéan suara makua mai a yaku maké i nunuwu' é Ibrani tana'i, ‘Saulus, Saulus, kéitu réén ko maoko-okoi Yaku? Ico imokoio in owakmu in esa sa ko ra'ica mento' masundur Yaku si makakawasa ico.’

¹⁵ Wo isowatku, ‘Si séi réén Ko é Tuang?’ En suara itu kumua, ‘Yakuo si Yesus, si paoko-okoienmu.

¹⁶ Intarépé', tumooro wo tumulungo. Yaku mapaturu' in owak-Ku ai co ampa'paan aitantu-Kuo ko e maselewir a Yaku wo sumairi andumoro' pakasa sé sinérému e niéma'-Ku wo andumoro' sé ipapaturu'-Ku oka ai ico sa.

¹⁷ Asi endo maai sa, ico okoien oka é bangsa Israel wo sé bangsa walina, taan ko lowiren-Ku oka an uner éra. Intarépé', ru'du'-Ku ko mangé ai séra,

¹⁸ e mangé muka' im bewerot éra wosama' séra ra'io ka'i menonou ang kariréimbengan taan menonou ang kasendotan, wo ka'i séra ra'io pakakawasan i kikiiten é sétang taan pakakawasan i Amang Kasuruan. Wo in taniitu ampa'paan séra maéman a Yaku, eng kamesé-meséaan éra makéré oka kaampungan wo makéré oka ka'i bagéan si aitantuo i Amang Kasuruan a sé tou sé line'nas-Na.’

¹⁹ Kolano Agripa si pasiri-sirinku, an tutuw-Na imapaturu' in owak-Na a yaku, yaku tatap le'tek mengaéma' im perénta si aiwéé i Apo' Yesus.

²⁰ Wo icuaku waya en itu kataré-taré a sé tou Yahudi an Damsyik, an Yerusalem wo am pakasa in tampa an tana' Yudea wo ka'i a sé tou ra'ica Yahudi. Icuaku ai séra, sapaoka musti mape'dis ang kamesé-meséaan wo maémano mangé a si Amang Kasuruan wo menonou makiit ing kasalé'an-Na tanu tuus sa séra imape'diso.

²¹ Ampa'paan in ituo, yaku tinangka' é tou Yahudi am Balé Le'nas wo mepé' e maté yaku.

²² Taan yaku tinawang i Amang Kasuruan, siituo aku menonoué' akar asi endo anio'. Wo intarépé' aku makatulung am bia'i e méé kasairian andumoro' si Yesus ai camu im baya, tou sé iparangka-rangka' kuma'pa tou sé ipawawa-wawa'. Pakasa sé aicuaku itu meputé sé aicuao i Musa wo sé nabi indior.

²³ En aicua éra sapaoka si Mesias musti mamuléng ing keli kawenduan wo maté, taan Siao eng kataré-taré tumou sumawel. Sia oka ka'i e maali mai in sendot ing kalowiran a sé tou Yahudi wo ka'i a sé tou ra'ica Yahudi.”

²⁴ Ang karoro'an i Paulus mabéla in owakna, wo positen i Festus i rumoma' ang kerapi in depet, “Ra'io lekep ko é Paulus! Ico keliano eng kailekan, akar em ipakawerotmu ra'io wutul.”

²⁵ Taan isowat i Paulus, “Tuang Festus si pasiri-siriinku, yaku ra'ica si tou ra'ica lekep! Pakasa sé aicuaku itu wutul wo em ipakawerotku looré'!

²⁶ Si aicuaku a si tuang kolano kailekan waya i tuang. Ampa'paano in itu yaku ra'ica maindé rumoma' ang karapi ra'ica ipaene-enep an dior i colano. Percayanku ra'ica wana mandé esake' sé aicuaku wo ra'ica kailekan i colano, ampa'paan pakasa en itu imamuali an dior é tou keli.

²⁷ Kolano Agripa si pasiri-siriinku, percayan réén i colano sapa sé aipatic é nabi indior? Kailekanku sapaoka en itu percayan i colano.”

²⁸ Wo icuana a si Paulus, “Paulus, tawio émaanmu aku mamuali tou Krésten asi témpo ra'ica uré anio'!”

²⁹ Wo isowat i Paulus, “Yaku masalé' sumombayang a si Amang Kasuruan wosama' si colano maéman a si Yesus, wo ka'i pakasa in tou am bia'i wo sé imakalinga in aicuaku, rior kuma'pa uré, mamuali puté wo yaku. Taan ra'ica mamuali tou pakawa'kesen tanu yaku intarépé'.”

³⁰ Kekawus ako si Paulus maroma' wo si colano Agripa, si Bernike, si gubernur Festus wo pakasa in tou makalukut mewali-wali wo iséra makala'us tumulung.

³¹ Ang karoro'an i makesot am bitu, séra mengkung-kuanan, “Si tou itu ra'ica iméma' ing kameséaan sapa-sapa e méma' sia patus makéré in ukuman patén kuma'pa yuntep am bui.”

³² Wo icua i colano Agripa a si Festus, “Si tou itu ro'nao woo iwekar sa sia ra'ica imangilek sumosor im perkarana en sidangen i Kaisar Romawi.”