Kisah Para Rasul 25 - En Taar Weru a nunuwu' é Tontemboan

Si gubernur Festus sumidang im perkara i Paulus

¹ Si Festus mai ang Kaisarea e mamuali gubernur am bitu. Teluo ngando am bitu, sia mangé an Yerusalem.

² A mangé mbitu, sé kikiiten é imam wo sé tou Yahudi sé pasiri-siriin mai meta'up wo isia eng kumua in tuduan éra a si Paulus.

³ Pangileken éra a si gubernur wosama' méé kaloasan e rumu'du' tou maali si Paulus an Yerusalem, ampa'paan séra mawasa-wasa e maté isia an uner in lalan.

⁴ Taan icua i gubernur Festus sapaoka si Paulus kasake' tangen am bui ang Kaisarea wo sia mawasa i makala'uso maréng angé sumawel am bitu.

⁵ Ampa'paan ituo icuana, “Aweso taré sé kikiiten iow kumiito mewali-wali mangé wo yaku maangé am bitu. Sa a mangéo mbitu, ro'na icua miow en tuduan iow andumoro' si Paulus, sa sia wutu-wutul iméma'o kaléwo-léwo'an.”

⁶ Si Festus imento' an Yerusalem wona' walu kuma'pa sangapulu' ngando, kekawus ako in itu sia maréng angé sumawel ang Kaisarea. Mando mai sia sumidang e murus im perkara i Paulus wo ka'i ru'du'na tou makawali si Paulus e mai saru ai sia.

⁷ Icateka' mangé si Paulus am bitu, pakasa sé tou Yahudi sé an Yerusalem owo, tumulung lumi'cir isia. Wo icua éra a si gubernur kelian tuduan uter andumoro' si Paulus. Taan pakasa em ipatudu éra ai sia itu ra'ica wana tuus.

⁸ Taan si Paulus méla in owak, icuana, “Mandé teké'ke', aku ra'ica kawisa mako méma' kaséaan. Yaku ra'ica iméma' sapa-sapa en sumundur in ukum Torat wo ra'ica méma' kaséaan am Balé Le'nas wo ka'i ra'ica iméma' kaséaan a si Kaisar Romawi.”

⁹ Taan ampa'paan si Gubernur Festus meindo-indo in até é tou Yahudi, wuéienna a si Paulus, “Paulus, masalé' réén ko maangé an Yerusalem wosama' aku ro'na sumidang im perkaramu a mangé mbitu?”

¹⁰ Isowat i Paulus, “Yaku tou Romawi. Intarépé' aku makatulung an tampa pengasidangan im perkara é tou Romawi. Anaé, yaku musti sidangen am bia'i, ra'ica an Yerusalem. Kailekano wutu-wutul i tuang, sa aku ra'ica iméma' ing kaséaan sapa-sapa a sé tou Yahudi.

¹¹ Sa aku wutul iméma' ing kaséaan kuma'pa ing kaléwo-léwo'an si patus makéré in ukuman patén, yaku tu'tulo maté. Taan ka'icé', sa pakasa en aitudu éra a yaku ra'ica wutul, ra'ica wana mandé esake' tou e ro'na musé' en sumarakan yaku ai séra. Sa tana'i, pangilekenku em perkaraku isosor en sidangen i Kaisar Romawi!”

¹² Kelinga in itu, si Festus meroma' wo sé tou mengawéé sina'u ai sia. Wo icuana a si Paulus, “Ico mangileko sumosor im perkara en sidangen i Kaisar Romawi, anaé ico musti mangé meta'up wo isia.”

Em perkara i Paulus aicua i gubernur Festus a si colano Agripa

¹³ An tutuw ilumangkoio pira ngando, si colano Agripa mangé ang Kaisarea mewali-wali wo si tuarina wéwéné makangaran Bernike. Séra imangé am bitu e mangé méé in siri' ampa'paan si Festus werupé' imamuali gubernur.

¹⁴ Wo ampa'paan séra piraan ngando imento' am bitu wo ipepaar i gubernur Festus em perkara i Paulus a si colano itu, icuana, “Am bia'i awéan si esa tou a yuntep am bui. Em perkarana sumangkumo sinidang i gubernur Feliks taan ra'ica imalekep. Ampa'paan ituo, sia pakatangené' am bui.

¹⁵ An tutuwku an Yerusalem, sé kikiiten é imam wo sé matu'a é tou Yahudi mai mower ing kaléwo-léwo'an i tou itu a yaku wo pangileken éra wosama' sia makéré ukuman.

¹⁶ Taan icuaku ai séra, eng kanaramen é tou Romawi, sa awéan esa tou tinudu, si tou itu ra'ipé' toro isarakan en ukumen sa sia ra'ipé' meta'up wo sé tou tumudu isia wo winéan témpo e méla in owakna.

¹⁷ Ampa'paano in itu an tutuw éra mai am bia'i, ra'io ipauré-uréku wo mio' mando mai makala'us sidangenku em perkarana itu am pengadilan. Wo iru'du'ku tou makawali mai sia en sumaru a yaku.

¹⁸ Wo asi témpo itu, sé tou matudu isia tumulung lumi'cir isia wo icua éra en aitudu éra ai sia. Taan pakasa en aitudu éra itu, ra'ica andumoro' ing kaléwo-léwo'an tanu im pawero-werotenku.

¹⁹ Séra asaloke' meindo-indoan roma' wo isia andumoro' in agama éra wo andumoro' si esa tou makangaran Yesus. Si Tou itu kiné imatéo, taan icua i Paulus si Tou itu itumou sumawel.

²⁰ Ampa'paano in itu, aku marua-rua wasa tumambisa en sumidang im perkara tanu sia'i. Anaé, wuéienku a si Paulus sa sia masalé' maangé an Yerusalem wo em perkarana sidangen a mangé mbitu.

²¹ Taan aicuake' i Paulus sapaoka em perkarana isosorna en sidangen i Kaisar Romawi. Pangilekenna a yaku wosama' sia tangen owo akar si Kaisar in esa e musé' im perkarana. Ampa'paan ituo iru'du'ku sia tangen akar aku ro'nao kumirim isia a si Kaisar Romawi.”

²² Kelinga in aisisil i Festus wo icua i colano Agripa, “Icasalé'ku luminga si tou itu in esa eng kumua a yaku.” Wo isowat i Festus, “Woondo oka lingan i tuang, isia in esa oka eng kumua a si tuang.”

²³ Mando mai, si colano Agripa wo si Bernike mai am balé pengaadilan, mepaké ing karai kakolanoan. Séra in dua mai mewali-wali wo sé kikiiten é suraro wo sé tou pasiri-siriin a si kota itu. Wo peréntan i gubernur Festus wosama' si Paulus iwali mai am bitu.

²⁴ An tutuw i Paulus am bituo, icua i gubernur Festus, “Kolano Agripa si pasiri-siriinku wo sé pakasa in tou sé imewali-wali wo icami am bia'i. Séréno mai si tou anio', si patudun é pakasa in tou Yahudi an Yerusalem wo sé ang Kaisarea am bia'i. Séra imayo a yaku wo mangilek ang karapi i mengangko-ngangko' sapaoka sia musti makéré in ukumen patén.

²⁵ Taan an tutuwku in sumidang im perkarana, ra'ica kinéréanku mandé esake' eng kameséaanna si patus makéré in ukuman patén. Wo ampa'paan sia in esa e imangilek im perkarana isosor en sidangen i Kaisar Romawi, anaé puséénku eng kumirim isia sumaru a si Kaisar.

²⁶ Taan em perkarana anio' ra'ipé' talos kailekanku, anaé ra'ipé' wana e ro'na ipaticku a si Kaisar andumoro' ing kaléwo-léwo'an i tou anio'. Ampa'paan ituo towanku mai sia am bia'i en isaru ai camu im baya am bia'i. Paarapenku, kamu waya sé am bia'i, wo ka'i si colano Agripa ro'na mewali-wali wo yaku e meriksa im perkarana. Wo in taniitu awéan em paticku a si Kaisar.

²⁷ Ampa'paan ra'ica patus sa si esa tou pakatangen wo icirim a si Kaisar wo ra'ica wana en aipatic andumoro' sé ipatudu a si tou itu.”