Kisah Para Rasul 19 - En Taar Weru a nunuwu' é Tontemboan

Si Paulus an Efesus

¹ An tutuw i Apolos ang Korintusé', si Paulus maya'o mangé an doo-roong an sangkum ing Galatia wo am Frigia wo icateka' an Efesus. Am bia'i, sia meta'up wo piraan tou sé maémano.

² Icuana ai séra, “An tutuw iow imaémano, tumerimao réén i Roh Le'nas kamu?” Isowat éra ai sia, “Ra'ipé', wo ka'i ra'ipé' sumangkum ako pinalinga ami sa e Roh Le'nas itu awéan.”

³ Wuéien ka'i sumawel i Paulus ai séra, “Sa taniitu, nibaptis réén im baptisan sapa kamu?” Isowat éra, “Kami nibaptis kumiit im baptisan i Yohanes.”

⁴ Wo icua i Paulus ai séra, “Em baptisan i Yohanes itu mamuali tuus sapaoka sé tou imape'diso. En aicua ka'i i Yohanes a sé tou itu sapaoka kekawusna, awéan oka ka'i esa Tou e maai wo séra musti maéman ai Sia, Siao si Yesus.”

⁵ Kelinga in itu, wo séra baptisen ang karapi ngaran i Apo' Yesus.

⁶ Wo an tutuw i Paulus maro ing kama an dangka' in do'kos éra, e Roh Le'nas tumumpa mai ai séra. Wo séra tumo'tolo maroma' a nunuwu' i roh wo ipakua éra en taar i Amang Kasuruan a sé tou am bitu.

⁷ Séra im baya, awéan wona' sangapulu' rua tou.

⁸ Telu ngaserap eng kauréna, si Paulus mengauntep am balé paapo'an é agama Yahudi. Am bitu sia maroma' ang karapi in da'- ica wana kaindé'an wo meindo-indoan roma' wo sé tou Yahudi wosama' percayan éra andumoro' ing kakolanoan i Amang Kasuruan.

⁹ Taan awéan piraan tou ra'ica kiim tumerima in sususuien i Paulus ampa'paan séra keté até. Wotaré ipemaa-maar éra in léwo' an dior é tou keli andumoro' im basa i Amang Kasuruan en lumowir sé tou iméma' ing kamesé-meséaan. Ampa'paano in itu itela'u i Paulus séra wo towanna sé tou maéman a si Yesus kumesot am balé paapo'an é agama Yahudi. Wo susur in endo sia maroma' ang karapi é tou am pakuliaan, si ningaranan Tiranus.

¹⁰ En itu niéma'na akar in dua ngata'un, akar pakasa sé tou maento' an Asia luminga in Abar Kaaruien andumoro' i Yesus Kristus. Sé iluminga in itu, tou Yahudi wo tou ra'ica Yahudi.

Sé toyaang i Skewa mepé' e musér si sétang maké i ngaran i Yesus

¹¹ Si Amang Kasuruan méé kawasa a si Paulus e méma' ing kakaya'kaan sé ra'io icakua.

¹² Mandé ka'i wayake' in lénso kuma'pa kaéng ipapules in licur si sumangkumo pinaké i Paulus wo iweta' a sé tou sumakit, séra makala'us masama'. Taniitu ka'i wo sé tou rinasuk i roh léwo', sé roh léwo' itu makala'us kumesot.

¹³ Awéan piraan tou Yahudi sé mengasihir, séra mawaya-waya' mangé am bisa-wisa e musér sé roh léwo' asé tou rinasuk. Yepé' éra imaké i ngaran i Apo' Yesus. Icua éra a sé roh léwo' itu. “Ang karapi i ngaran i Yesus si aicua i Paulus, yusérku kamu!”

¹⁴ Awéan pitu toyaang tuama i esa kikiiten é imam agama Yahudi si makangaran Skewa, séra itu musér si roh léwo'.

¹⁵ Taan aicuake' i roh léwo' ai séra, “Si Yesus katuusanku taniitu ka'i si Paulus, taan si séi réén kamu?”

¹⁶ Makanuwu' mai, si tou rinasuk i roh léwo' itu tumulung wo sumerang iséra, akar séra imakala. Wésoonna ka'i eng karai éra wo séra tumincas meke'da' tumela'u im balé itu akar i mapéla-péla'.

¹⁷ Pakasa sé tou Yahudi wo sé tou ra'ica Yahudi an Efesus makalinga ing kamamualian itu. Kelinga in itu wo séra maindé' wo marayo-rayo i ngaran i Apo' Yesus.

¹⁸ Kelian sé ai séra e mamuali tou maéman, mai wo mangaku an dior é tou keli sapaoka séra sumangkumo mengéma-ngéma' tanu siitu.

¹⁹ Wo kelian ka'i ai séra sé mengapaké in sihir, umungen éra eng kitap-kitap sihir wo tunun éra an dior é tou keli. Em bééna ing kitap-kitap itu, sa takséren wona' lima ngapulu' riwu roit pérak.

²⁰ Ang karapi i méma' in taniitu, en taar i Casuruan makaseraro am bisa-wisa wo makakelio ka'i sé tou maéman.

Si Demetrius méma' ing kalicokoan an Efesus

²¹ Kekawus ing kinamamualian itu, iru'du' i Roh i Amang Kasuruan si Paulus e mangé an Yerusalem lumangkoi i Makedonia wo Akhaya. Wo icua i Paulus, “Kekawusai mangé an Yerusalem, yaku ka'i musti mangé a Roma.”

²² Wo iru'du'na si Timotius wo si Erastus, sé rua kara-karapina matawoi wosama' rumior mangé a Makedonia, taan si Paulus in esa mento' uré-uréan toyo' an Asia.

²³ An tutuw itu, an Efesus imarinca'o ampa'paan en sususuien andumoro' im basa i Amang Kasuruan en lumowir sé tou, ra'ica icasalé' é tou.

²⁴ Pakasa en itu imamuali ampa'paano i esa tuama makangaran Demetrius. En tawoienna mengaéma' sé kuil-kuil teké' i opo' Artemis am pérak owo. Asi tawoienna itu sé tou matawoi ang karapina makéré roit keli.

²⁵ Asi makasa, li'usenna waya sé tou matawoi ai sia wo sé tou walina sé maéma' im barang-barang am pérak owo. Icuana ai séra, “Poo-poow, tantu kailekano miow sa kita mekéré roit keli ampa'paan in tawoienta anio'.

²⁶ Intarépé' sinéréo wo liningao miow in esa, ampa'paano taré i Paulus akar sé tou ra'io maapo' a si opo'ta Artemis. Pemaso-masoonna in léwo' sé tou wo ipakuana, sé patong paémaanta ra'ica wutul. En itu aicuana ra'ica asaloke' an Efesus, taan misio am pakasa in Asia.

²⁷ Anaé, sa pakasa en tou kumiit im pakua i Paulus, en tawoienta anio' iséro' oka é tou. Wo ka'i si caindé'ta sa eng kuil i opo'ta Artemis ra'io wana ka'i torona. Eng kasiwakana em patong i opo'ta Artemis si pengaapo'an é pakasa in tou an Asia wo am pakasa ing kayo'baan ra'io ka'i paapo'an éra.”

²⁸ Kelinga in itu, sé tou keli itu mae'bow keli wo yangko' éra, “Rayo si Artemis, si opo' é tou Efesus!”

²⁹ Wo malicokoo waya sé ang kota itu. Tangkaan éra si Gayus wo si Aristarkhus wo iwali éra an stadion. Séra in dua itu tou Makedonia sé mewali-wali mai wo si Paulus am bawayaanna.

³⁰ An tutuw itu si Paulus masalé' muntep an uner in stadion e numuwu' a sé tou keli itu, taan pinéro'ke' é muritna.

³¹ Am bitu, awéan ka'i piraan pejabat Asia sé mekarapi sama' wo si Paulus. Ru'du' éra tou e mangé mekiupus a si Paulus wosama' sia tioo muntep an stadion itu.

³² Sé tou imali'us an stadion itu mengangko-ngangko', awéan sé maangko' in tana'i awéan sé maangko' in taniitu. Sé imali'us am bitu malicokoo, ampa'paan kinakelian ai séra ra'ica makailek sapa en torona éra imali'us.

³³ Wo am bitu awéan esa tou makangaran Aleksander. Ruké é tou Yahudi sia an dior é tou keli ampa'paan icasalé' éra sia en tumerangkan sapaoka si méma' im perkara anio' ra'ica tou Yahudi. Wo si Aleksander masalé' méla in owak an dior é tou keli, anaé sia mangkai ing kama en suméin wosama' sé tou menes.

³⁴ Taan tutuw kailekan éra sia tou Yahudi, séra mewali-wali mangko' wona' dua jam eng kauréna, “Rayo si Artemis, si opo' wéwéné é tou Efesus!”

³⁵ Wo iru'du' i jortulis ing kota itu wosama' séra menes, icuana, “Éi tou Efesus! Kailekan waya é tou ang kayo'baan anio' sapaoka tinéiran é tou Efesus sumama-sama' eng kuil i opo' Artemis si wangko' wo ka'i em patongna si tumumpa mai an langit.

³⁶ En itu ra'ica toro sangkalen, ampa'paano in itu menes owo tioo mario-rior mindo in tindakan.

³⁷ Ampa'paan aiwalio miow sé rua tou anio' am bia'i mandé ka'i séra ra'ica irumombit in sapa-sapake' ang kuil i opo'ta wo ra'ica ka'i maroros i ngaran i opo'ta.

³⁸ Anaé, sa si Demetrius wo sé mengatawoi ai sia awéan ipatudu a si séike' mangé, lébé loor paalin éra en itu am pangadilan kuma'pa a si gubernur. A mangé mbitu ro'na icua éra em ipatudu itu.

³⁹ Wo sa awéan masala walina si tuntuten iow, lébé loor lekepen iow en itu an sidang im pengadilan.

⁴⁰ Ampa'paan sapa e imamuali asi endo anio' iméma'o cita ang kawangkuran. Sé pemerénta Romawi ro'na tumudu icita iméma' ing kalicokoan. Sa en anio' mamuali kita ra'ica wana alasan en icua ai séra.” Ampa'paan i nuwu'na itu sé tou imali'us itu metalicur.

⁴¹ Kekawus i jortulis kumua in itu, iru'du'na sé tou keli itu e maréng.