Kisah Para Rasul 15 - En Taar Weru a nunuwu' é Tontemboan

En sidang an Yerusalem

¹ Awéan piraan tou an Yudea owo, mai an Antiokhia. Am bitu séra sumusui sé tou ra'ica Yahudi sé maémano in tana'i, “Sa kamu ra'ica sunaten iciit ing kanaramen si aisusui i Musa, kamu ra'ica malowir.”

² Taan en aicua éra itu wutu-wutul aicélong wo sinangkal i Paulus wo si Barnabas. Ampa'paano in itu sé jamaat an Antiokhia musé' e rumu'du' si Paulus, si Barnabas wo piraan tou walina maangé an Yerusalem e meta'up wo sé ruru'du'an, wo sé penatua e mepaar andumoro' im perkara itu.

³ Wo séra iwali é tou maéman an Antiokhia akar ang kesot ing kota. Séra lumala'us im bawayaan lumangkoi im Fenisia wo in Samaria. An sangkum itu, ipakua éra ka'i sapaoka sé tou ra'ica Yahudi an tampa walina mape'diso wo maémano a si Yesus. En abar itu méé kaaruian a sé tou maéman am bitu.

⁴ Icateka' mangé an Yerusalem, séra sinungkul é jamaat, é ruru'du'an wo sé penatua ang kota itu ang karapi in arui en até. Wo isisil éra in dua a sé tou itu, andumoro' im pakasa sé niéma'o i Amang Kasuruan ai séra in dua.

⁵ Taan am bitu awéan piraan tou Yahudi ang golongan Farisi sé maémano. Séra tumulung wo kumua, “Sé tou ra'ica Yahudi musti sunaten wo kumiit ing kanaramen si aisusui i Musa.”

⁶ Kekawus in itu, sé ruru'du'an wo sé penatua mali'us e mepaar andumoro' im perkara itu.

⁷ Uré-uréan keli séra mepaar andumoro' im perkara itu wo si Petrus tumulung, icuana ai séra, “Éi poo-poow, kailekan iow sapaoka si Amang Kasuruan indior isumisiro yaku an uner iow eng kumua in Abar Kaaruien andumoro' si Yesus Kristus a sé tou ra'ica Yahudi wosama' lingan éra en abar itu wo maéman.

⁸ Si Amang Kasuruan e makatuus in até é tou, aituru'-Na sapaoka Sia tumerimao sé tou ra'ica Yahudi itu. En itu aituru'-Nao ai cita an tutuw-Na méé i Roh Le'nas ai séra, tanu si aiwéé-Na ai cita.

⁹ Si Amang Kasuruan ka'i ra'ica masisir in tou, tou Yahudi kuma'pa tou ra'ica Yahudi. Line'nas-Nao en até éra ampa'paan maémano a si Yesus.

¹⁰ Sa taniitu, kéitu réén kamu mangepé' a si Amang Kasuruan ang karapi méé im pamuléngen a sé tou ra'ica Yahudi sé maémano? Sé apo-apo'ta wo ka'i cita in esa ra'ica kawisa makawoo méma' waya in ukum Torat.

¹¹ Taan em butulna, percayanta sapaoka ang karapi in upus aitambér i Apo' Yesus, kita lowiren oka meputé wo sé tou ra'ica Yahudi.”

¹² Kelinga in itu, pakasa sé tou am bitu makala'us menes. Wo lingan éra si Paulus wo si Barnabas sumisil andumoro' im pakasa in tuu-tuus sé ra'io icakua wo sé kakaya'kaan sé niéma' éra ampa'paano ing kawasa i Amang Kasuruan an uner é tou ra'ica Yahudi.

¹³ Kekawus i Paulus wo si Barnabas mepaar, wo icua ka'i i Yakobus, “Éi poo-poow, linganai aku!

¹⁴ Si Simon Petrus isumisilo tambisa si Amang Kasuruan kumataré itumuru' in upus aitambér-Na a sé tou ra'ica Yahudi. Sinisir-Na sé tou an uner é tou ra'ica Yahudi e mamuali tou-Na.

¹⁵ En itu meputé wo en aicua é nabi indior, tana'i:

¹⁶ ‘Kekawus in itu Aku maréng oka mai wo wangunen-Ku sumawel eng kakolanoan i Daud si imatongkaro itu wo wangunen-Ku oka sumawel sé aicaserar.

¹⁷ Émaan-Ku taniitu wosama' pakasa en tou walina mangéré Yaku, icauntep sé tou raica Yahudi sé sinisir-Ku e mamuali tou-Ku. Taniituo en aicua i Amang Kasuruan,

¹⁸ si cumuao im basa-Na itu indioré'wo.’ ”

¹⁹ “Anaé, sa kumiit yaku, ra'ica toro susanta sé tou ra'ica Yahudi sé imape'diso wo sé imaémano a si Amang Kasuruan.

²⁰ Taan, lébé loor sa ipaticta surat wo iwéé ai séra, wosama' séra ra'ica toro kuman ing kakanen najis sé ayumpero a sé opo-opo', ra'ica toro kuman in sama'na é binatang sé pinaté ampa'paan kiniselan eng kolot, kuma'pa kuman in enda', wo ka'i ra'ica toro mengabersina.

²¹ Ampa'paan indioré'wo en ukum i Musa aicuao am pakasa ing kota, wo akar intarépé' en ukum itu pemaca-macan susur in endo Sabat am balé-walé paapo'an é agama Yahudi.”

En surat a sé tou ra'ica Yahudi sé maémano

²² Kumawus in itu pinusé' é ruru'du'an wo sé penatua wo ka'i pakasa en tou maéman an Yerusalem en sumisir piraan tou ai séra. Sé tou sé kinasisiran itu ayutus eng kumiit si Paulus wo si Barnabas mangé an Antiokhia. Sé sinisir éra itu, si Yudas si pengatuulen ka'i Barsabas wo si Silas. Sé tou maéman an Yerusalem mengasiri' ai séra in dua.

²³ Wo en surat itu aisarakan a si Barsabas wo si Silas, aipatic in tana'i: “Siri' a sé poo-poow esa paémanen sé ra'ica tou Yahudi sé maento' an Antiokhia, an Siria, wo eng Kilikia. En siri' anio' ai cami owo sé ruru'du'an wo sé penatua an Yerusalem.

²⁴ Aipatic ami en surat anio', ampa'paan lininga ami awéan piraan tou sé ai cami owo imangéo ai camu. Séra lumicoko i ngaas iow wo méma' icamu ra'io makaaté in sama' in sususuien éra. Sé tou itu ra'ica airu'du' ami mangé ai camu.

²⁵ Ampa'paano in itu pinusé'o ami en sumisir wo mutus piraan tou e mewali-wali wo si Barnabas wo ka'i si Paulus si icaupus ami.

²⁶ Séra itu sumangkumo ing keli kawenduan ampa'paan i ngaran i Apo'ta Yesus Kristus.

²⁷ Anaé, ayutuso ami si Yudas wo si Silas eng kumua ai camu tanu in aipatic an surat anio'.

²⁸ Niénano i Roh Le'nas wo niénano ka'i ami, sa kamu ra'ica sangali in sunaten kuma'pa kumiit in ukum si aisusuio i Musa. Ampa'paan in ituo, kami asalo rumu'du' icamu eng kumiit in atoran anio':

²⁹ Kamu ra'ica toro kuman ing kakanen si ayumpero a sé opo-opo', ra'ica toro kuman sé binatang imaté ampa'paan kiniselan eng kolot, wo ra'ica toro kuman in enda', wo ka'i ra'ica toro mabersina. Sa pakasa en anio' itayang iow, kamu méma'o in loor. Akaré' am bia'i owo en surat ami anio', siri' ai cami owo.”

³⁰ Kumawus in itu, si Yudas wo si Silas mangé an Antiokhia. Am bitu towan éra pakasa sé tou maéman e mali'us wo en surat itu iwée i Yudas wo si Silas ai séra.

³¹ An tutuw en surat itu pinakabacao, séra im baya arui ampa'paan en surat itu mibor in até éra.

³² Si Yudas wo si Silas itu nabi, niéma' éra sé tou maéman an Antiokhia maibor wo ka'i kumeter in até éra.

³³ Am bitu séra in dua imento' uré toyo'. Kumawus in itu, séra niénano é tou maéman an Antiokhia e maréng sumawel ang karapi in sama' an Yerusalem a sé tou irumu'du' iséra. [

³⁴ Taan pinusé' i Silas e mento' an Antiokhia.]

³⁵ Si Paulus wo si Barnabas ka'i imento' uré toyo' an Antiokhia. Séra in dua wo sé tou walina masusui wo mengakua in Taar i Amang Kasuruan am bitu.

Si Paulus wo si Barnabas mentalicuran

³⁶ An tutuw i Paulus wo si Barnabas uréo toyo' an Antiokhia, icua i Paulus a si Barnabas, “Mayoo, kita maréng sumawel a sé poo-poowta ang kota-kota si sumangkumo kinuananta in taar i Casuruan en suméré ing kaberadaan éra.”

³⁷ Kelinga in itu wo énan i Barnabas wo ka'i icasalé'na e makawali si Yohanes si patuulen ka'i Markus.

³⁸ Taan sia rinomaanke' i Paulus sapaoka, ra'ica loor e maali si tou si sumangkumo tumela'u iséra am Pamfilia wo ra'ica kiim tumawoi mewali-wali wo iséra.

³⁹ Siituo e iméma' iséra in dua meindo-indoan roma', akar séra metané. Wo iwali i Barnabas si Markus en suméngkot angé an Siprus.

⁴⁰ Taan si Paulus isumisir si Silas. An tutuw éra i maangém, sé poo-poow maéman an Antiokhia mangilek a si Casuruan wosama' téiran-Na wo ituru'-Na en upus aitambér ai séra in dua.

⁴¹ Si Paulus wo si Silas mangé an sangkum in Siria wo eng Kilikia wo kumeter im paémanen é tou maéman am bitu.