Kisah Para Rasul 13 - En Taar Weru a nunuwu' é Tontemboan

Si Barnabas wo si Saulus ayutus an jamaat an Antiokhia

¹ An jamaat Antiokhia, awéan piraan nabi wo awéan ka'i sé masusui in Taar i Amang Kasuruan. Séra itu si Barnabas, si Simeon si pengatuulen Wuring, si Lukius si tou Kirene, Menahem si pinewangko' mewali-wali wo si colano Herodes, wo ka'i si Saulus.

² Asi makasa, an tutuw éra mapuasa wo maapo' a si Amang Kasuruan, e Roh Le'nas kumua ai séra, “Tanéo mangé si Barnabas wo si Saulus e méma' in tawoien si aitantu-Kuo ai séra in dua.”

³ Kekawus éra i mapuasa wo masombayang, séra maro ing kama an dangka' in do'kos i Barnabas wo si Saulus wo séra in dua yutus angé e méma' in airu'du' i Amang Kasuruan.

Si Saulus wo si Barnabas am pulou Siprus

⁴ Ampa'paan airu'du' i Roh Le'nas si Barnabas wo si Saulus mangé an Seleukia, wo am bitu oka séra suméngkot angé am pulou Siprus.

⁵ Icateka' mangé an Salamis am pulou Siprus, séra in dua kumua in Taar i Amang Kasuruan am balé-walé paapo'an é tou Yahudi. Asi témpo itu kumiit ka'i si Yohanes si patowan Markus, en sumémbonga i séra.

⁶ Séra mangé am pakasa in tampa am pulou itu akar am Pafos. Am bitu séra meta'up wo si esa tou Yahudi, makangaran Baryesus. Sia itu masihir wo ka'i nabi ra'ica wutul.

⁷ Sia mekarapi wo si gubernur am pulou itu, si makangaran Sergius Paulus. Si gubernur itu pandéi keli. Towanna si Barnabas wo si Saulus ampa'paan icasalé'na luminga in taar i Amang Kasuruan.

⁸ Taan si Barnabas wo si Saulus sinundurke' i masihir itu si a nunuwu' é Yunani pengatuulen Elimas. Raméjinna wosama' si gubernur ra'ica maéman a si Yesus.

⁹ Taan si Saulus si pengatuulen ka'i Paulus, kinawasa i Roh Le'nas. Téintengenna si masihir itu,

¹⁰ wo kumua, “Éi toyaang i kikiiten é sétang! Ico wuta in uwak sé membam-balinaan wo ing kaléwo'an. Pakasa sé wutul pasundurenmuke'. Kéitu réén ra'ica yento'mu mengaléwo' im pawasan i Amang Kasuruan si mai lumowir sé tou?

¹¹ Intarépé', sérén, ico ukumen oka i Casuruan, ico mawola oka wo piraan ngando ko ra'io toro suméré in sendot i yéndo.” Asi témpo ituke', si Baryesus mawola akar sia maya' maéré-éré oka tou e makin sia.

¹² An tutuw i gubernur suméré sapa e mamuali, sia ka'i mapercaya a si Yesus. Wo sia mangaya-ngaya'ka' in sususuien andumoro' i Apo' Yesus.

Si Paulus an Antiokhia an sangkum im Pisidia

¹³ Wo itela'u i Paulus em Pafos am pulou Siprus, sia wo sé kara-karapina suméngkot angé am Perga an sangkum im Pamfilia. Taan tela'u i Yohanes séra wo sia maréng angé an Yerusalem.

¹⁴ Wo am Perga itu, si Paulus wo sé kara-karapina lumala'us ka'i im bawayaan éra akar icateka' an Antiokhia an sangkum im Pisidia. Asi endo Sabat séra muntep wo lumukut am balé paapo'an é agama Yahudi.

¹⁵ Kekawus i maca in ukum Torat wo ing kitap é nabi, sé kikiiten am balé paapo'an itu rumu'du' tou eng kumua a si Paulus wo si Barnabas tana'i, “Poo-poow, sa awéan ai camu e méé sina'u eng kumeter im paémanen é tou anio', icuao mai!”

¹⁶ Kelinga in itu, si Paulus tumulung wo suméin ing kamana a sé tou am bitu, icuana, “Poo-poow tou Israel wo sé tou ra'ica Yahudi sé mengaapo' a si Amang Kasuruan, linganai en icuaku!

¹⁷ Si Amang Kasuruan é tou Israel isumisiro sé apo-apo'ta indior. Wo an tutuw éra maento' an tana' Mesir tanu tou imanangkéi, séra niéma'-Na wutu-wutul makaawes eng kakeli. Kekawus in itu ang karapi ing kakawasaan-Na, séra icesot-Na an tana' Mesir itu.

¹⁸ Wo séra menonou an tana' kapayasan epat ngapulu' ngata'- un eng kauréna. Am bitu em peri ing katouan éra ra'ica makiit ing kasalé'an i Amang Kasuruan. Taan Sia kasake' talesen ai sera.

¹⁹ Wo séra tinawang i Amang Kasuruan eng kuma'pu sé pitu bangsa sé maento' an tana' Kanaan. Wo iwété-wéténg-Na en tana' itu a sé apo-apo'ta itu e mamuali anu éra.

²⁰ Pakasa en itu mamuali epat ngaatus lima ngapulu' ngata'un eng kauréna. Kekawus in itu, Sia sumisir akim-akim e makawali sé apo-apo'ta akar in jaman i nabi Samuel.

²¹ Asi témpo itu, sé apo-apo'ta mangilek esa tou a si Amang Kasuruan e mamuali kolano éra. Wo si Amang Kasuruan méé esa kolano ai séra, e ngaranna Saul, toyaang i Kish an suku Benyamin. Wo si Saul mamuali kolano epat ngapulu' ta'un eng kauréna.

²² Kumawus in itu, si Saul yento' i Amang Kasuruan wo sisiren-Na si Daud mamuali kolano en sumawel si Saul. Andumoro' i Daud anio', si Amang Kasuruan sumangkumo kumua in tana'i, ‘Winéan-Kuo rékén si Daud toyaang i Isai. Sia mengaarui in até-Ku, wo mengaéma' pakasa sé icasalé'-Ku.’

²³ Wo kiit in janji i Amang Kasuruan, asé taranak i Daud owo aituru'-Nao esa Tou en Lumowir sé tou Israel, Siao si Yesus.

²⁴ Wo ra'ipé' mai si lumolowir itu, aicuao i Yohanes a sé pakasa é bangsa Israel wosama' séra mape'dis wo méé in owak em baptisen.

²⁵ An tutuw en tawoien i Yohanes tawio malekep wo icuana, ‘Sa ciit icamu, si séi réén aku anio'? Ra'ica yaku si Tou si paento-entoon iow. Taan, sérén oka miow! Kekawus yaku, maai oka esa Tou. E muka'ke' in tali in sapatu-Na, yaku ra'ica patus.’

²⁶ Poo-poowku sé icauntep an taranak i Abraham wo ka'i sé tou ra'ica Yahudi sé maapo' a si Amang Kasuruan! En abar ing kalowiran itu aicuao ai cita im baya.

²⁷ Sé tou maento' an Yerusalem wo ka'i sé kikiiten éra ra'ica makatuus si Yesus, ampa'paan in ituo séra meesa wosama' Sia ukuman patén. Anaé, linekepo éra sapa sé ipakua é nabi andumoro' Sia si pemaca-macan iow susur in endo Sabat.

²⁸ Mandé ka'i ra'ica kinéréan éra en alasan e mukum Sia ang karapi in ukumen patén, pangileken éra a si Pilatus wosama' Sia patén.

²⁹ Wo an tutuw niéma'o éra waya en aicua é nabi andumoro' Sia, wo tumpa éra Sia ang kayu salip wo mangé éra icubur.

³⁰ Taan Sia tinou sumawel i Amang Kasuruan an uner é tou imaté.

³¹ Piraan ngando eng kauréna si Yesus mapaturu' in owak-Na a sé murit-Na, sé sumangkumo kumiit Sia ang Galilea owo wo mangé an Yerusalem. Sérao intarépé' sé mamuali sairi-sairi-Na a sé tou Israel.

³² Wo kami intarépé' makua in Abar Kaaruien andumoro' i Yesus Kristus ai camu, si aijanjio i Amang Kasuruan indior a sé apo-apo'ta.

³³ En janji itu linekep-Nao ai cita ang karapi in tumou sumawel si Yesus am papaté. En itu puté wo si aipatic ang kitap Mazmur karua: ‘Icoo si Toyaang-Ku! Asi endo anio' Yaku imamualio Amang-Mu.’

³⁴ Wo ka'i an tutuw i Yesus tinou sumawel i Amang Kasuruan an unér é tou imaté, en owak i Yesus ra'ica mawuruk, tanu in aicua i Amang Kasuruan, ‘Si aijanji-Ku a si Daud, en itu janji le'nas wo wutul mamuali oka ai Co.’

³⁵ Taniitu ka'i ang kitap Mazmur walina aipatic in tana'i, ‘Ra'ica iwaya i Amang Kasuruan en owak i Tou Le'nas-Na mawuruk an untep ing kubur.’

³⁶ E nunuwu' itu ra'ica andumoro' i Daud, ampa'paan kekawus sia sumelewir si Amang Kasuruan ang katouanna sia maté, wo aicubur an duru é apo-apo'na, wo e mayatna mawuruk.

³⁷ Taan an tutuw i Yesus imaté, e mayat-Na ra'ica mawuruk an untep ing kubur, ampa'paan Sia tinou sumawel i Amang Kasuruan.

³⁸ Anaé é poo-poow, icua ami ai camu sapaoka eng kamesé-meséaan iow ro'na makéré kaampungan ampa'paan si Yesus anio'. Taan sa kita asaloke' kumiit in ukum Torat, kita ra'ica nianggap wutul.

³⁹ Anaé, si séi si maéman a si Yesus, nianggap wutul i Amang Kasuruan.

⁴⁰ Ampa'paano in itu, intarépé' kamu musti mareti-reti, wosama' sapa en aicua ang kitap é nabi ra'ica mamuali ai camu.

⁴¹ ‘Wéanio' rékén sumama-sama', éi camu sé menéro-néro' an tutuw in luminga in Taar-Ku! Sérén oka miow eng kamamualian sé ra'io icakua sé émaan-Ku oka an jaman iow, akar kamu mangaya-ngaya'ka' wo maté. Kamu maté oka ampa'paan kamu ra'ica mercaya, mandé awéan tou mai sumisil waya in itu ai camu.’ ”

⁴² Kekawus i masusui, si Paulus wo si Barnabas kumesot am balé paapo'an itu. Taan sé tou am bitu mekiupus ai séra wosama' maréngai sumawel asi endo Sabat asi duminggu maai en sumusui ka'i andumoro' in taar itu.

⁴³ Kumawusai i maapo', sé tou itu kumesot am balé paapo'an wo awéan sé icumiit si Paulus wo si Barnabas. Séra itu sé tou Yahudi wo ka'i sé tou ra'ica Yahudi sé imuntepo agama Yahudi. Si Paulus wo si Barnabas sumina'u ai séra wosama' kasake' i mamangén an upus aitambér i Amang Kasuruan.

⁴⁴ Asi endo Sabat kumiitai in itu, tawi pakasa sé tou ang kota Antiokhia mai mali'us en luminga si Paulus wo si Barnabas kumua andumoro' in taar i Amang Kasuruan.

⁴⁵ Taan an tutuw sérén é kikiiten é tou Yahudi sé tou keli itu, en até é kikiiten itu manganat keli. Anaé pakasa sé ipakua i Paulus wo si Barnabas, ipakélong wo ka'i paroros éra.

⁴⁶ Taan ang karapi in da'ica wana kaindé'an, icua i Paulus wo si Barnabas, “Mémang wutul, en Taar i Amang Kasuruan itu musti icuao owo ai camu. Taan ra'ica kiim iow mercaya, kamu mawerot en owak iow ra'ica patus makéré ing katouan akar ing kauré-uré. Ampa'paano in itu, kamu itela'u ami wo kami maangé a sé tou ra'ica Yahudi eng kumua in taar i Casuruan itu.

⁴⁷ Ampa'paan si Amang Kasuruan e merénta icami, ‘Sinisir-Kuo ko, wosama' ko ro'na mangé kumua in abar kalowiran a sé tou ra'ica Yahudi akar an tempok ing kayo'baan. Wo in taniitu, ico mamuali kaputé in sosoloan si sumendot iséra.’ ”

⁴⁸ Kelinga in itu, pakasa é tou sé ra'ica Yahudi arui keli wo rumayo sumiri' in Taar i Casuruan itu. Wo sé tou sinisiro i Amang Kasuruan makéré oka ing katouan akar ing kauré-uré, séra itu mamuali maéman.

⁴⁹ Asi témpo itu, en Taar i Casuruan icaserar am pakasa in tampa an sangkum itu.

⁵⁰ Taan sé tou Yahudi sé cumélong in Taar i Amang Kasuruan itu, séra memaso-maso' in léwo' a sé wéwéné sé mengaapo' a si Amang Kasuruan sé awéan pengaru wo ka'i a sé kikiiten ang kota itu. Wo okoien éra si Paulus wo si Barnabas wo yusér éra en tumela'u in sangkum itu.

⁵¹ Taan itangkar i Paulus wo si Barnabas en awu ang kécéi éra an dior é tou itu, en itu mamuali tata'néi sapaoka sé tou itu ukumen oka i Amang Kasuruan. Kumawus in itu séra in dua mangé an Ikonium.

⁵² Taan sé murit an Antiokhia arui keli wo séra ka'i kinawasa i Roh Le'nas.