Kisah Para Rasul 12 - En Taar Weru a nunuwu' é Tontemboan

Si Yakobus pinaté wo si Petrus aicesot am bui

¹ Asi témpo itu si Herodes tumo'tolo mengaokoi sé piraan tou an jamaat.

² Peréntanna sé touna wosama' si Yakobus si metuari wo si Yohanes patén maké in sa'bel.

³ An tutuw kinailekan i Herodes sa si niéma'na itu méma' in até é tou Yahudi arui wo iru'du'na ka'i si Petrus tangkaan. Asi témpo itu endo wangko' Roti Ra'ica Rinagian.

⁴ Kekawus ako si Petrus tinangka', sia iru'du' i Herodes en yuntep am bui. Wo iru'du'na ka'i epat regu suraro mensan-sawelan tuméir si Petrus. Esa regu epat suraro. Si Petrus yuntepna am bui wosama' sa icumawuso en endo wangko' Paska, akimenna si Petrus an dior é tou keli.

⁵ Taniituo si Petrus tinang am bui. Taan sé tou maéman ra'ica mento' menomba-nombayang a si Amang Kasuruan torona i Petrus.

⁶ Asi sanga wengi, an tutuw ra'ipé' niakim i Herodes si Petrus an dior é tou keli, si Petrus tumekel an uner é rua suraro wo eng kamana wina'kes in dua ranté mewali-wali wo iséra. Awéan ka'i suraro makatéir an dior im papalen im bui.

⁷ Tumarépé'anke'mai si malaékat i Casuruan tumulung an duru i Petrus, wo an untep im bui itu masendot keli. Wo éroon i malaékat itu si Petrus e molo sia, icua i malaékat, “Petrus, tumooro!” Wo e ranté aipakawa'kes ing kama i Petrus makala'us mawuka'.

⁸ Wo icua i malaékat ai sia, “Pakéno eng karai wo en sapatumu!” Wo émaan i Petrus tanu in aicua i malaékat. Kumawus in itu, icua ka'i i malaékat itu ai sia, “Pakéno en jubamu wo kumiito mai yaku!”

⁹ Wo si Petrus kumiit si malaékat eng kumesot am bui. Asi témpo itu, pawerotenna en itu asalo aipapaturu' wo ra'ica kailekanna sa si malaékat itu uli-ulit makawali sia kumesot am bui.

¹⁰ Wo séra maya' lumangkoi in tampa patéiran kataré wo si patéiran karua wo séra icateka' am papalen wangko' si niéma' am bési owo, si pengalangkoian maangé ang kota. Em papalen itu mawuka' in esa wo langkoian éra. Icateka' ang kesot séra maya' akar an tempok in lalan, wo tumarépé'anke'mai sia itela'u i malaékat itu.

¹¹ An tutuw i Petrus makaileko mai in tou andumoro' in sapa e mamuali, wo icuana, “Intarépé', wutu-wutul kailekanku sa si Amang Kasuruan irumu'du'o si malaékat-Na en lumowir yaku ang kakawasaan i Herodes wo am pawasa-wasan léwo' é tou Yahudi.”

¹² Kekawusna memero-merot toyo', wo sia mangé am balé i Maria inang i Yohanes. Si Yohanes itu pengatuulen ka'i Markus. Am bitu kelian tou imali'us wo masombayang.

¹³ Icateka' mangé si Petrus, téngkorenna em papalen wangker wo mai si esa ata wéwéné si makangaran Rode en suméré si séi si maténgkor.

¹⁴ Kelingana in suara itu, makala'us kailekanna sapaoka en itu suara i Petrus. Taan ampa'paan ing kaaruianna, ra'ica winuka'na em papalen itu taan sia imuntepke' taré sumawel wo kumua a sé tou an untep im balé sapaoka si Petrus an dior im papalen wangker itu.

¹⁵ Taan séra asalo isumowat ai sia, “Ra'io wona' lekep ko!” Taan si ata itu kasake' kumua sapaoka si Petrus wutu-wutul am bitu. Icua éra ka'i, “Sia si malaékat matéir si Petrus.”

¹⁶ Ang karoro'an in itu si Petrus menéngko-néngkoré'. Wo an tutuw éra muka im papalen sérén éra sia wo séra mangaya-ngaya'ka'.

¹⁷ Taan séinan i Petrus ing kama wosama' séra menes. Kumawus in itu isisilna ai séra tambisa si Casuruan makawali sia kumesot am bui. Wo icuana ai séra, “Icuao mangé pakasa en anio' a si Yakobus wo a sé poo-poowta walina sé maémano.” Wo sia kumesot am bitu wo mangé an tampa walina.

¹⁸ Mando mai, an tutuw sérén é suraro sapaoka si Petrus ra'io am bui, wo séra marinca'o. Wo séra membum-buéian sapa e mamuali a si Petrus.

¹⁹ An tutuw ing kinailekano i Herodes andumoro' in itu, wo ru'du'na sé tou e mangéré si Petrus, taan ra'ica kinéréan éra. Wo iru'du' i Herodes ti'tiren sé suraro sé ituméir si Petrus, kumawus in itu séra patén. Wo itela'u i Herodes en Yudea e mangé ang Kaisarea wo mento' am bitu.

Si Herodes imaté

²⁰ Sé tou Tirus wo sé tou Sidon mengateles kakanen a sé tou an sangkum ing kakawasaan i Herodes. Taan asi témpo itu, si Herodes mae'bow keli a sé tou Tirus wo Sidon. Ampa'paan in ituo, séra meesa e mangé meta'up wo sia. Wo awéan esa tou maurus an istana i Herodes, makangaran Blastus, sia lepéien éra, e mekitawang wosama' si Herodes ro'na meeluran wo iséra. Émaan éra taniitu wosama' séra ro'na menele-neles kakanen an sangkum ing kakawasaan i Herodes.

²¹ Wo si Herodes tumantu esa endo en tumerima iséra. Asi endo itu, si Herodes maké ing karai kakolanoan, lumukut am palukutan pasiri-siriin, wo rumoma' ai séra.

²² Wo sé tou keli marayo-rayo sia ang karapi in taangko', “Si anioo en suara i opo', ra'ica suara é tou!”

²³ Asi témpo ituke' si Herodes sepéén i malaékat i Casuruan ampa'paan sia ra'ica rumayo si Amang Kasuruan. Wo en owakna kanen é uler akar i maté.

Si Barnabas wo si Saulus maréng sumawel an Antiokhia

²⁴ Ang Karoro'an in itu, makaaweso sé tou sé masisil in Taar i Amang Kasuruan wo makaaweso ka'i sé tou maéman.

²⁵ An tutuw i Barnabas wo si Saulus sumarakano in doit ipatawang an Yerusalem wo séra maréng sumawel an Antiokhia. Awéan esa tou si kumiit mewali-wali mai wo iséra an Yerusalem owo. Si tou itu makangaran Yohanes, si pengatuulen ka'i i Markus.