Kisah Para Rasul 11 - En Taar Weru a nunuwu' é Tontemboan

Si Petrus sumisil a sé jamaat an Yerusalem andumoro' i Kornelius nibaptis

¹ Sé ruru'du'an wo sé poo-poow esa paémanen an Yudea lumingao ka'i sapaoka awéan tou ra'ica Yahudi sé itumerimao in taar i Amang Kasuruan.

² Ampa'paan in ituo, an tutuw i Petrus imaréngo sumawel an Yerusalem, awéan piraan tou Yahudi sé imaémano, meindo-indoan roma' wo isia.

³ Icua éra, “Kéitu réén ko imangé am balé é tou ra'ica Yahudi wo ka'i cuman mewali-wali wo iséra?”

⁴ Kelinga in itu wo isisil i Petrus ai séra sapa waya e mamuali tumo'tolai asi cataré-taré. Icuana,

⁵ “Asi sangando ang kota Yope, an tutuwku masombayang, tumarépé'anke'mai aku pinapaturu'an i Amang Kasuruan. Kaséréanku awéan tanu esa kaéng welar itumumpamai an langit owo, epat ruuna ing kaéng itu wina'kes in tali wo makawérén akar an diorku.

⁶ Wo kaséréanku an untep ing kaéng itu awéan membam-balinaan binatang: awéan sé makakécéi epat, binatang ra'ica papiaran, binatang maloyon wo sé burung.

⁷ Wo kalingaanku en suara makua in tana'i, ‘Petrus, tumulungo! Pokolen sé binatang itu wo kaneno.’

⁸ Taan sinowatkuke', ‘Ra'ica é Kasuruan. Yaku ra'ipé' sumangkum ako kuman sé binatang ra'ica toro kanen wo najis tanu siitu.’

⁹ Taan en suara an sorga itu kumua sumawel a yaku, ‘Sapa sé aicua i Amang Kasuruan ro'na kanen, ra'ica toro icuamu ra'ica toro kanen.’

¹⁰ En itu imamuali akar i makatelu, wo pakasa en itu icaangkai angé sumawel an langit.

¹¹ Asi témpo ituke' awéan telu tou makatulung an dior im pana'pa' im balé linoséranku. Séra in telu ang Kaisarea owo, airu'du' meta'up wo yaku.

¹² Wo icua i Roh Le'nas a yaku, ‘Mangéo mewali-wali wo iséra. Tioo ko marua-rua wasa mandé séra ra'ica tou Yahudi.’ Kelinga in itu, yaku wo sé enem poow sé maémano anio', mewali-wali mangé ang Kaisarea. Icateka' mangé am bitu, kami muntep am balé i Kornelius.

¹³ Wo isisilna ai cami tambisa sia isuméré si malaékat makutulung am baléna. Si malaékat itu icumua ai sia in tana'i, ‘Ru'du'o piraan tou mangé an Yope en sumungkul si Simon si pengatuulen Petrus.

¹⁴ Sia oka eng kumua in abar e méma' ico wo pakasa sé am pamalému malowir.’

¹⁵ An tutuwku icateka' mangé am bitu wo tumo'tolo maroma', tumumpa mai e Roh Le'nas ai séra tanu si sumangkumo mamuali ai cita indior.

¹⁶ Keséré in itu, kata'néiankuo en aicua i Apo' Yesus, ‘Si Yohanes Mabaptis mengabaptis in tou maké in dano, taan kamu baptisen oka i Roh Le'nas.’

¹⁷ Si Amang Kasuruan in esao en tumambérai i Roh Le'nas a sé tou ra'ica Yahudi itu, tanu ka'i si aiwéé-Nao ai cita an tutuwta imaémano a si Apo' Yesus Kristus. Anaé, si séi réén aku anio' akar ro'na sumémpér im pawasan i Amang Kasuruan?”

¹⁸ Kelinga in itu, sé tou Yahudi sé maémano a si Yesus ra'io ka'i tumantang si Petrus. Wo séra rumayo si Amang Kasuruan wo kumua, “Anaé, sé tou ra'ica Yahudi ka'i tinambérano mai i Amang Kasuruan kamang e mape'dis wo makéré ing katouan akar ing kauré-uré.”

Sé tou an Antiokhia maéman a si Yesus

¹⁹ Kekawus i Stefanus pinaté, sé poo-poow esa paémanen tumincas icasera-serar am bisa-wisa ampa'paan im paoko-okoien. Awéan sé tumincas am Fenisia, am pulou Siprus, an Antiokhia an Siria. Taan séra mengakua in Abar Kaaruien andumoro' i Yesus Kristus taan wayake' a sé tou Yahudi.

²⁰ Taan an uner éra awéan ka'i piraan tou Siprus wo Kirene sé imangé an Antiokhia. A mangé mbitu icua éra ka'i en Abar Kaaruien andumoro' i Yesus a sé tou ra'ica Yahudi.

²¹ Wo eng kawasa i Casuruan mewali-wali wo iséra akar kelian tou ra'ica Yahudi maéman a si Yesus wo mape'dis.

²² Sapa waya e mamuali an Antiokhia, en abar itu kinalingaan é jamaat an Yerusalem. Kekawus in itu, sé jamaat a mangé mbitu rumu'du' si Barnabas mangé an Antiokhia.

²³ An tutuw i Barnabas icateka' a mangé mbitu, sérénna sé tou maéman am bitu tinambéranai ing kamang i Amang Kasuruan, wo sia wutu-wutul arui. Wo sina'uenna séra im baya wosama' uli-ulit ang karapi in lekep en até, le'tek a si Apo' Yesus.

²⁴ Si Barnabas itu tou sama', kinawasa i Roh Le'nas wo ka'i wutu-wutul maéman a si Casuruan. Ampa'paano in itu kelian tou sé iluminga in sina'una mamuali maéman a si Apo' Yesus.

²⁵ Kekawus in itu si Barnabas tumela'u in Antiokhia wo mangé an Tarsus e mangéré si Saulus.

²⁶ Wo sia meta'up wo si Saulus, kumawus in itu iwalina si Saulus an Antiokhia. Séra in dua mento' mewali-wali wo sé jamaat a mangé mbitu sangata'un eng kauréna. Séra ka'i mengasusui a sé tou keli andumoro' i Yesus. An Antiokhia anioo sé tou makiit in sususuien i Yesus kumataré-taré patuulen Krésten.

²⁷ Asi témpo itu, awéan piraan nabi an Yerusalem owo mai an Antiokhia.

²⁸ Esaan ai séra si makangaran Agabus pinaké i Roh Le'nas. Sia tumulung wo kumua, “Mai oka en témpona am pakasa ing kayo'baan tenan oka ing kaareman wangko'.” Wo eng kamamualian itu mamuali ka'i an jaman i Klaudius.

²⁹ Kumawus in itu, sé tou maéman an Antiokhia musé' en lumi'us roit patawang iwéé a sé poo-poow an esa paémanen an Yudea, iciit ing kawooan éra i esa wo si esa.

³⁰ Kumawusai séra sumuun roit, wo ru'du' éra si Barnabas wo si Saulus e maali in doit itu a sé penatua an Yudea.