Kisah Para Rasul 10 - En Taar Weru a nunuwu' é Tontemboan

Si Petrus wo si Kornelius

¹ Ang Kaisarea awéan esa tuama, makangaran Kornelius. Sia perwira Romawi si kikiiten é sangaatus suraro. Ngaran ing kompi éra itu suraro Italia.

² Sia le'tek mengakiit ing kasalé'an i Amang Kasuruan. Sia wo sé pamaléna maapo' a si Amang Kasuruan. Sia mengatawang sé tou Yahudi lengéi wo ka'i sia tatap menomba-nombayang a si Amang Kasuruan.

³ Asi makasa, wona' jam tiga im bawaando an oras i masombayang, si Kornelius pinapaturu'an am baléna. Asi témpo itu, kaséréanna wutul si esa malaékat i Amang Kasuruan imai ai sia wo tumowa, “Kornelius!”

⁴ Téintengen i Kornelius si malaékat itu wo ang karapi in indé' icuana, “Awéan sapa réén é Tuang?” Isowat i malaékat itu ai sia, “Pakasa en sombayangmu liningao i Amang Kasuruan wo sé aitawangmu a sé tou lengéi sinéré-Nao wo ko tina'néi-Nao.

⁵ Intarépé', iru'du'o piraan tou e maangé an Yope en sumungkul si tou makangaran si Simon si pengatuulen ka'i im Petrus.

⁶ Sia lumosér am balé i esa tou an tembir im panté. E ngaran i tou itu ka'i Simon, wo en tawoienna mengabersi ing kulit é binatang pengaémaan barang-barang.”

⁷ An tutuw i malaékat itu tumela'u si Kornelius, wo towanna sé rua tou atana wo si esa suraro si mengakawal sia. Si suraro itu tou le'tek mengakiit ing kasalé'an i Amang Kasuruan.

⁸ Wo isisil i Kornelius pakasa em pinapaturu'an itu ai séra wo iru'du'na séra mangé an Yope.

⁹ Asi woondona mai, wona' katoora i yéndo, em bawayaan é telu tou itu matawio in Yope. Asi oras itu, si Petrus sumosor angé an dangka' im balé en sumombayang.

¹⁰ Am bitu sia maarem wo masalé' kuman. Ang karoro'an eng kakanen im patu'tulen, tumarépé'anke'mai sia pinapaturu'an.

¹¹ Kaséréanna en langit mawuka' wo tumumpamai tanu esa kaéng welar. Eng kaéng itu aitumpa mai an tana' imaké in tali aiwa'kes an epat ruuna ing kaéng itu.

¹² An untep ing kaéng itu awéan membam-balinaan binatang: awéan sé makakécéi epat, sé maloyon wo burung-burung.

¹³ Wo kalingaanna awéan suara makua, “Petrus, tumulungo. Indono sé binatang itu, pokolen wo kanenno.”

¹⁴ Taan isowat i Petrus, “Ra'ica é Kasuruan. Yaku ra'ipé' kawisa kuman sé binatang ra'ica toro kanen wo najis itu kiit in atoran an agama ami.”

¹⁵ Taan en suara itu kumua sumawel, “Sapa sé aicua i Amang Kasuruan ro'na kanen, ra'ica toro icuamu ra'ica toro kanen.”

¹⁶ En itu imamuali akar i makatelu wo eng kaéng itu makala'us icaangkai angé sumawel an langit.

¹⁷ Wo pemero-meroten i Petrus an untep in aténa sapa eng kaangéan in andumoro' im pinapaturu'an sé sinéréna itu. Ang karoro'an in itu, sé tou airu'du' i Kornelius aicateka'o am balé pakaloséran i Petrus, wo makatulungo an dior im papalen.

¹⁸ Wo towan éra si esa tou wo mamuéi, “Kami maéré-éré si esa tou makangaran Simon, si pengatuulen ka'i é tou im Petrus. Lumosér réén am bia'i sia?”

¹⁹ Ang karoro'an i Petrus memero-meroté' andumoro' im pinapaturu'an itu wo icua i Roh Le'nas ai sia, “Petrus, awéan telu tou maéré-éré ico.

²⁰ Anaé, tumulungo wo tumumpao mio' wo mangéo mewali-wali wo iséra. Tioo ko marua-rua wasa, ampa'paan Yakuo in esa e irumu'du' mai iséra.”

²¹ Kelinga in itu, si Petrus tumumpa mio'. An tutuwna meta'up wo sé telu tou itu, icuana, “Yakuo si paéré-érén iow. Sapa réén em basa miow mai am bia'i?”

²² Wo isowat éra, “Kami airu'du' mai i Kornelius si perwira é Romawi. Sia tou sama' wo maapo' a si Amang Kasuruan wo pasiri-siriin é tou Yahudi. Asi makasa, sia pinapaturu'an i malaékat i Amang Kasuruan wo rumu'du' e menot ico mangé am baléna wosama' sia ro'na luminga sapa en icua i tuang.”

²³ Wo pangileken i Petrus wosama' séra mento' am bitu. Mando mai, si Petrus tumu'tul wo mangé mewali-wali wo sé telu tou itu. Awéan ka'i piraan poow sé maéman an Yope sé icumiit wo sia.

²⁴ Asi woondona mai séra icateka'o ang Kaisarea. Am bitu si Kornelius mengento-ngento' iséra. Lini'usnao sé taranakna wo sé kara-karapina en luminga sapa en icua i Petrus.

²⁵ An tutuw i Petrus muntep, si Kornelius kumundu an dior i Petrus e méé in siri' ai sia.

²⁶ Taan timboian i Petrus eng kama i Kornelius wo wésoonna en tumulung wo kumua, “Tumulungo, yaku anio' kakélému in tou.”

²⁷ Kekawus in itu, séra in dua mepaar wo muntep am balé. Am bitu sérén i Petrus kelian tou imali'us.

²⁸ Wo icua i Petrus, “Kailekano miow eng kanaramen ami tou Yahudi, kami ra'ica toro mengkemuan wo sé tou ra'ica Yahudi tanu icamu, wo ka'i ra'ica toro mangé am balé miow ampa'paan pakasa en itu najis ai cami. Taan aicuao i Amang Kasuruan a yaku sapaoka ra'ica wana tou najis an dior-Na.

²⁹ Ampa'paan in ituo, an tutuw nienot iow aku mai am bia'i, ra'ica icélongku. Intarépé', wuéienku ai camu, kéitu réén kamu itumowa yaku mai am bia'i?”

³⁰ Wo isowat i Kornelius, “Asi epat ngando ilumangkoi, wona' asi jam tiga im bawaando tanu si oras anio', yaku masombayang am balé. Tumarépé'anke'mai awéan esa tou makatulung an diorku, eng karaina menéla-nélap.

³¹ Wo icuana a yaku, ‘Kornelius, pakasa en sombayangmu liningao i Amang Kasuruan wo en aitawangmu a sé tou lengéi tina'néi-Nao.

³² Anaé, ru'du'o tou mangé an Yope en sumungkul si Simon si patuulen ka'i Petrus. Sia lumosér am bale i Simon en tawoienna mengaweresi ing kuli'na é binatang en émaan barang-barang. Em baléna an tembir in ta'sic.’

³³ Ampa'paan in ituo makala'us ru'du'ku tou mangé sumungkul si tuang. Wo si tuang mayo am bia'i ang karapi in arui en até. Intarépé', kami im baya am bia'io an dior i Amang Kasuruan, lingan amipé' sapa en aiperénta-Na a si tuang.”

³⁴ Wo tumo'tolo si Petrus rumoma', “En ulitna intarépé'o kailekanku sa si Amang Kasuruan itu ra'ica mengasisir tou.

³⁵ Teriman-Na waya sé tou am pakasa im bangsa sé maapo' ai Sia wo sé mengaéma' im butul.

³⁶ Siituo en Taar aicua i Amang Kasuruan a sé tou Israel. Icua-Na en Abar Kaaruien andumoro' si Yesus Kristus si maali mai ing kaeluran ai séra e méma' in ubungan éra wo si Amang Kasuruan maloor. Si Yesus Kristuso si Casuruan é pakasa sé tou.

³⁷ Wo kailekan iow ka'i andumoro' im pakasa sé niéma' i Yesus tumo'tolai ang Galilea akar am pakasa in Yudea. En itu mamuali kekawus i Yohanes kumua a sé pakasa en tou sapaoka séra musti baptisen, tanu tuus imape'diso.

³⁸ Kailekan iow ka'i sapaoka si Amang Kasuruan imééo i Roh Le'nas wo eng kawasa-Na a si Yesus tou Nazaret, Sia mangé am bisa-wisa wo méma' sé loor wo sumama' pakasa in tou sé kinawasao i kikiiten é sétang ampa'paan si Amang Kasuruan mewali-wali wo Sia.

³⁹ Icamio sé ruru'du'an i Yesus sé mamuali sairi im pakasa sé niéma'-Na an Yerusalem wo am pakasa in tana' paento'an é tou Yahudi. Wo pinaté éra Sia wo aipaku éra Sia ang kayu salip.

⁴⁰ Wo asi endo katelu, Sia tinou sumawel i Amang Kasuruan wo émaan-Na Sia ro'na mapaturu' in owak-Na.

⁴¹ Ra'ica pakasa sé tou Yahudi e ro'na suméré Sia. Taan wayake' sé sairi sé sinisiro i Amang Kasuruan e ro'na suméré. Icamio sé sairi itu, sé icuman wo melep mewali-wali wo Sia, kekawus-Na tinou sumawel.

⁴² Wo ru'du'-Na kami kumua in Abar Kaaruien andumoro' i Yesus Kristus a sé pakasa im bangsa wo masairi sapaoka Sia si aitantuo i Amang Kasuruan e mai makim pakasa sé tou menonoué' wo sé tou imatéo.

⁴³ Indior, pakasa sé nabi isumangkumo kumua andumoro' Sia. Icua éra sa sé tou maéman ai Sia, makéré oka kaampungan ing kamesé-meséaan ampa'paano i ngaran-Na.”

⁴⁴ An tutuw i Petrus maroma'pé' wo tumumpa mai e Roh Le'nas a sé pakasa in tou sé makalinga in aicua i Petrus.

⁴⁵ Am bitu awéan ka'i sé tou sinunato sé maéman a si Yesus sé icumiitai si Petrus an Yope owo. Séra mangaya-ngaya'ka' an tutuw séra suméré si Amang Kasuruan tumambérai i Roh Le'nas a sé tou ra'ica Yahudi.

⁴⁶ Séra ka'i luminga sé tou itu maroma' a nunuwu' i roh wo ka'i marayo-rayo si Amang Kasuruan. Wo icua i Petrus,

⁴⁷ “Sinéréo miow in esa! Sé tou itu tumerimao i Roh Le'nas tanu cita tou Yahudi. Anaé, intarépé', ra'ica wana tou e ro'na méro iséra im baptisen maké in dano.”

⁴⁸ Wo iru'du' i Petrus séra baptisen ang karapi i ngaran Yesus Kristus. Kekawus in itu pangileken éra si Petrus mento' ang karapi éra mandé wayake' im pira ngando.