Ibrani 9 - En Taar Weru a nunuwu' é Tontemboan

Em pakaapo' am perjanjian uré

¹ Asi perjanjian kataré si niéma' i Amang Kasuruan ang karapi é tou Israel, awéan atoran-atoran andumoro' i mengaapo' wo im paapo'an le'nas si niéma' in tou.

² Em pengaapo'an ituo en ténda paapo'an si niéma' mamuali rua kamar. Asi kamar kataré, awéan totombol patuliran in sosoloan wo méja ang karapi i roti iparagés. Eng kamar kataré itu pengatuulen Kamar Le'nas.

³ Asi kamar kataré itu awéan kaéng pengakawu' aiwérén em pauntepan asi kamar karua. Eng kamar karua itu pengatuulen Kamar Lume'na-le'nas.

⁴ An untep ing Kamar Lume'na-le'nas itu awéan patunuan ing kamenyan si niéma' a mas owo, wo awéan ka'i piti im perjanjian sinopuan waya i mas. An untep im piti perjanjian itu awéan belangan mas si pinumpunan ing kakanen si pengatuulen manna, awéan ka'i weka' i Harun si sumangkumo suméé, wo ka'i awéan rua lempar watu am bawo im batu itu pinatican sé sangapulu' perénta i Amang Kasuruan tanu tuus im perjanjian-Na wo sé tou Israel.

⁵ Am bawo ing kekelew im piti perjanjian itu awéan rua patong malaékat makatétéléw si patuulen kerup, tanu tuus sapaoka si Amang Kasuruan iparayo wo pasiriin awéan am bitu. En tétéléw é rua kerup itu makawélar icumungkung ing kekelew im piti, siituo en tampa i Amang Kasuruan mengawéé ing kaampungan ing kamesé-meséaan é tou. Taan intarépé' ra'ica wana témpo en sumisil lébé lambot andumoro' im pakasa in itu.

⁶ Tanu siituo en ténda paapo'an itu nielur. Susur in endo sé imam muntep asi Kamar kataré an ténda paapo'an mengaéma' in tawoien éra.

⁷ Taan asi kamar karua si pengatuulen Kamar Lume'na-lenas wayake' si imam wangko' e ro'na muntep am bitu wo makasake' ka'i an sangata'un. An tutuw muntep am bitu, sia musti maali in enda' é binatang em pesic asi kekelew im piti perjanjian itu ampa'paan ing kamesé-meséaanna in esa wo ka'i ing kamesé-meséaan é tou Israel si niéma' éra ra'ica aipetutu'.

⁸ Ang karapi in atoran itu, aituru'o i Roh Le'nas sapaoka ang kauré ing kamar kataré am bitupé', en lalan pauntepan asi Kamar Lume'na-le'nas ra'ipé' imawuka'.

⁹ En itu tanu andéan ai cita sé menonou asi oras anio': raragés binatang pinokol wo raragés walina si aiwéé a si Amang Kasuruan, ra'ica ro'na méma' in até weresi é tou mamuali lekep ampa'paan e méé im paragés itu.

¹⁰ Ampa'paan sé atoran asi ipakaapo' uré itu asalo andumoro' in owak in tou, tanumai atoran andumoro' ing kakanen, in elepen wo mengaweresi in owak, taan sé atoran itu ra'ica andumoro' in até in tou. Sé atoran itu pengapakén akarke' asi oras em perjanjian weru itu awéano.

Em pakaapo' am perjanjian weru

¹¹ Taan intarépé' si Kristus imayo tanu Imam Wangko si maali mai ai cita andumoro' sé loor sé awéano. Sia imuntepo asi ténda pengaapo'an si lébé loor wo en lébé lekep, ampa'paan en ténda itu ra'ica tanu in ténda si niéma' é tou ang kayo'baan.

¹² Si Kristus muntep asi Kamar Lume'na-le'nas an ténda pengaapo'an makasake' torona ing kauré-uré. An tutuw itu Sia ra'ica maali in enda' i mémbé' tuama kuma'pa in enda' i ana' i sapi, taan em pinaali-Na enda'-Na in esa en tumu'bus ing kamesé-meséaanta akar ing kauré-uré.

¹³ Iciit in atoran indior, en enda' i mémbé' tuama wo si sapi tuama wo ka'i awu tinunuan i ana' i sapi pengapesic a sé tou najis wosama' en owak éra maweresi.

¹⁴ Anaé, sa en enda' wo en awu é binatang itu ro'na meresi in tou, lébé-lébépé' ka'i en enda' i Kristus! En enda'-Na ro'na lume'nas in até weresita asi mengéma-ngéma' sé ra'ica wana en torona, wosama' kita ro'na maapo' a si Amang Kasuruan si menonou. Ampa'paan si Kristus imééo in owak-Na in esa a si Amang Kasuruan tanu raragés si makaleke-lekep, ampa'paano ing kawasa i Roh i Amang Kasuruan si menonou akar ing kauré-uré.

¹⁵ Ampa'paan in ituo, pinaalio mai i Kristus em perjanjian weru, wosama' sé tou sé tinowao i Amang Kasuruan makéré oka bagéan si akar ing kauré-uré asi janji-Na. Sé tou ro'na makéré im bagéan si akar ing kauré-uré ampa'paan si Kristus imatéo wo tumu'bus ing kamesé-meséaan sé pinengaéma' éra an tutuw im perjanjian kataré pengapakéné'.

¹⁶ Sa awéan surat wasiat, musti ka'i awéan tuus sapaoka si tou e méma' in surat wasiat itu imatéo.

¹⁷ Ampa'paan en surat wasiat itu ra'ica mapaké, sa si tou iméma' in surat wasiat itu menonoué'. En surat wasiat ro'nao mapaké, sa si tou iméma' in surat wasiat itu imatéo.

¹⁸ Tanu siituo ka'i em perjanjian kataré si niéma' i Amang Kasuruan wo sé tou Israel. Si perjanjian kataré itu ka'i ra'ica toro pakén sa ra'ica wana enda'.

¹⁹ Ampa'paan indior ipakakua mako i Musa pakasa sé perénta an ukum Torat a sé tou Israel, wo sia mindo in enda' i ana' i sapi wo enda' i mémbé' tuama wo pekemunna in dano. Sia mindo wuuk i domba réindang matu'a, iwa'kesna an hisop wo ito'to'na an enda' itu. Wo ipesicna ang kitap Torat wo a sé im pakasa é tou Israel.

²⁰ Ang karoro'an i Musa maéma' in itu, sia kumua, “Si enda' anio' mamuali tuus sapaoka em perjanjian i Amang Kasuruan wo icamu mapakéo. Em perjanjian anio' musti kiiten iow.”

²¹ Wo tumaniituo ka'i si Musa imesic in enda' itu an ténda paapo'an wo pakasa im pakakas pengapakén i maapo'.

²² Iciit in ukum Torat, misio pakasa im pakakas le'nasen in enda'. Wo sa ra'ica wana enda' e makatiti-titis, ra'ica wana kaampungan ing kamesé-meséaan é tou.

²³ Ampa'paan in itu en ténda paapo'an wo pakasa im pakakas sé pengapakén am bitu, musti le'nasen in enda' i binatang. Wo en ténda paapo'an wo em pakakas sé pengapakén ang kayo'baan tanuke' modél sapa sé an sorga. Anaé, sa en ténda ang kayo'baan musti le'nasen in enda' i binatang, ténda an sorga musti le'nasen i raragés si lumoorai wo in enda' i binatang.

²⁴ Si Kristus ra'ica imuntep ang Kamar Lume'na-le'nas ang kayo'baan si niéma' ing kama in tou si asalo bayangan a si patron aseli si an sorga. Taan Sia muntep an sorga, wo intarépé' Sia a mangé em bitu makasaru si Amang Kasuruan torona icita.

²⁵ Si Kristus ra'ica menguri-nguri mengaragés in owak-Na in esa, kaputé sé imam wangko' si susur in ta'un mauntep ang Kamar Lume'na-le'nas maali iparagés si ra'- ica enda'na in esa.

²⁶ Ampa'paan sa si Kristus menguri-nguri maragés in owak, tantu tumo'tolke' mai eng kayo'baan niéma' Sia musti menguri-ngurio masangkum ing kawenduan. Taan asi endo-endo ka'kapuan ing kayo'baan anio' Sia mai wayake' i makasa e rumagés in owak-Na in esa en tumu'bus ing kamesé-meséaan é tou.

²⁷ Kaputé in tou aitantuo mai i Amang Kasuruan wayake' i makasa maté wo kumawus in itu akimen.

²⁸ Taniituo ka'i si Kristus, si makaesake' imaté mamuali iparagés en tumu'bus ing kamesé-meséaan é tou. Kekawus in itu Sia maai karua, ra'io en tumu'bus ing kamesé-meséaan é tou keli, taan e méé ing kalowiran a sé tou sé maento-ento' Sia.