Ibrani 8 - En Taar Weru a nunuwu' é Tontemboan

Si Yesus Imam Wangko' imaali mai im perjanjian si lumoorai

¹ Si penting keli asé im pakasa sé pepaarenta anio', sapaoka kita makaanu Imam Wangko' si ra'io cakua si makalukut ang kakan im palukutan pasiri-siriin i Amang Kasuruan si Mangko-wangko' an sorga.

² Sia maéma' in tawoien-Na tanu Imam Wangko' asi tampa le'nas, siituo si ténda aseli si winangun i Amang Kasuruan in esa ra'ica winangun é tou.

³ Susur imam wangko', aitantu e méé i raragés binatang pinokol wo raragés walina. Taniitu ka'i wo si Yesus Imam Wangko'ta, Sia musti makaanu sapa sé ro'na iragés.

⁴ Sa Sia ang kayo'baan, tantu Sia ra'ica mamuali imam, ampa'paan ang kayo'baan awéano sé imam mengawéé i raragés iciit in atoran an ukum Torat.

⁵ Séra mengaselewir tanu imam an ténda paapo'an en ulitna asalo mamuali patron wo bayangan asé sapa sé an sorga. Ampa'paan an tutuw i Musa masalé' mangun in ténda paapo'an, sia kinuanan i Amang Kasuruan in tana'i, “Musti émaanmu em pakasa iciit im patron si aituru'-Kuo ai co am bawo ing kuntung itu.”

⁶ Taan intarépé' si Yesus imakéréo tawoien tanu imam si lébé iparayo wo pasiriin wo in tawoien é imam indior. Ampa'paan Sia maali mai im perjanjian si lumoorai wo im perjanjian uré, ampa'paan si Amang Kasuruan ijumanjio andumoro' sé lébé loorai.

⁷ Sa woo em perjanjian kataré itu makaleke-lekep, tantu ra'io sangali ka'i émaan i Amang Kasuruan em perjanjian karua.

⁸ Taan indior sérén i Amang Kasuruan séra awéan kaséaan e ra'ica makiit in atoran asi perjanjian kataré, akar Sia kumua ai séra in tana'i, “Uli-ulit maai oka en témpona, émaan-Ku oka esa perjanjian weru ang karapi é tou Israel wo sé tou Yehuda.

⁹ Wo em perjanjian weru itu ra'ica meputé wo im perjanjian uré si niéma'-Ku a sé apo-apo' éra an tutuw éra paakinen-Ku kumesot an tana' Mesir. Séra ra'ica menonou makiit in atoran asi perjanjian si niéma'-Ku, ampa'paan in ituo séra ra'ica pandungen-Ku.

¹⁰ Taan intarépé', si anioo em perjanjian si émaan-Ku oka ang karapi é tou Israel, asé endo mengangai sa. Iweta'-Ku oka en ukum-ukum-Ku a ngaas éra, wo ipatic-Ku oka en itu an untep in até éra. Yaku mamuali oka Amang Kasuruan éra, wo séra mamuali oka tou-Ku.

¹¹ Wo séra ra'io sangali mensusuian wo sé kara-karapi kuma'pa sé poo-poow éra, wosama' makatuus si Casuruan. Ampa'paan séra im baya tumo'tol asé tou ra'ica penting akar a sé tou penting makatuus oka Yaku.

¹² Wo iwéé-Ku oka eng kaupusan-Ku ai séra ampa'paan ing kamesé-meséaan si niéma' éra wo ra'io ka'i ta'néien-Ku eng kamesé-meséaan éra.”

¹³ Anaé, ampa'paan si Amang Kasuruan makua in andumoro' in esa perjanjian weru, kaséréano wutul sapaoka em perjanjian kataré nianggap ra'io mapaké. Wo sapa si ra'io mapaké wo ilumangkoio makala'us oka maka'pu.