Ibrani 7 - En Taar Weru a nunuwu' é Tontemboan

Si Melkisedek e rumangka' mai wo si Abraham

¹ Si Melkisedek anio' kolano ang kota Salem wo imam i Amang Kasuruan Si Rumangka-rangka'. An tutuw i Abraham maréngo mai am paperangan icumala sé kolano, si Melkisedek en sumungkul wo ing kumamang isia.

² Wo iwéé i Abraham a si Melkisedek sangapepulu' asé im pakasa sé kinaandétan am paperangan. Eng kaangéan i ngaran i Melkisedek “kolano ra'ica marapit.” Wo sia “kolano ing kaeluran”, ampa'paan sia kolano ang kota Salem eng kaangéanna kaeluran.

³ En andumoro' i Melkisedek anio' ra'ica wana en sisisilen si séi si amang wo si inangna, wo si séi sé apo-apo'na, wo kawisa eng ketouna wo kawisa eng kepaténa. Anaé, sia kasake' mamuali imam akar ing kauré-uré, kaputé i Toyaang i Amang Kasuruan.

⁴ Anaé, ro'na kaséréanta am bia'i sapaoka si Melkisedek anio' tou penting keli akar si Abraham apo'ta iméé ai sia sangapepulu' asé sapake' sé kinaandétan am paperangan.

⁵ An ukum Torat aitantuo sapaoka sé imam taranak i Lewi en awéan kaloasan e mindo sangapepulu' asé pengakéréan é tou Israel, poow éra in esa, mandé ka'i séra taranak i Abraham.

⁶ Mandé ka'i si Melkisedek ra'ica taranak i Lewi, taan sia tumerima sangapepulu' asi Abraham wo kumamango sia, mandé ka'i si Abraham itumerimao in janji i Amang Kasuruan.

⁷ Ra'ica wana tou e ro'na sumangkal sapaoka si tou wawa' kinamang i tou si rumangka'mai.

⁸ Imam-imam sé mengaterima in sangapepulu', séra itu tou sé ro'na maté. Taan si Melkisedek si tumerima in sangapepulu', kasake' menonou tanu ing kasairian ang Kitap Le'nas.

⁹ Ro'nake' icua sapaoka sé imam Lewi sé awéan hak en tumerima in sangapepulu' asé tou Israel, séra ka'i tanuoka méé im sangapepulu' a si Melkisedek an tutuw i Abraham apo' éra méé sangapepulu' ai sia.

¹⁰ Mandé ka'i si Lewi ra'ipé' tumou asi témpo itu, taan ro'nao icuata sapaoka si Lewi an untepo in owak i Abraham apo'na an tutuw si Abraham sinungkul i Melkisedek.

Si Yesus Imam si rumangka'mai wo si Harun

¹¹ An tutuw é suku Lewi mamuali imam, si Amang Kasuruan méé mai in ukum Torat a sé tou Israel. Mandé ka'i sé imam taranak i Lewi mengaéma' in tawoien éra mengatuur an ukum Torat, taan em pakaselewir éra ra'ica ro'na méma' sé tou mamuali lekep an dior i Amang Kasuruan. Anaé, musti awéan imam walina kaputé i Melkisedek, wo ra'ica imam asé taranak i Lewi kaputé imam Harun.

¹² Sa en atoran mengaangkai imam roban, tantu pakasa en ukum Torat ka'i musti maroba.

¹³ Si imam si pepaaren am bia'i, siao si Apo' Yesus. Sia icauntep an suku walina wo ra'ipé' sumangkum ako awéan esa tou ka'i asé suku itu maselewir am pawetaan i raragés tanu imam.

¹⁴ Pakasa en tou makaileko sapaoka si Apo' Yesus itu taranak in suku Yehuda, wo si Musa ra'ica isumangkum ako tumuul i ngaran in suku itu tutuwna maroma' in andumoro' sé imam.

¹⁵ Wo en itu kaséréano wutul an tutuw mapaturu'o si esa tou imam walina kaputé i Melkisedek.

¹⁶ Si Imam walina itu mamualio Imam ra'ica mengatuur asé atoran in tou, taan Sia mamuali Imam ampa'paan makaanu ing kawasa ing katouan si ra'ica ro'na maka'pu.

¹⁷ Ampa'paan ang Kitap Le'nas awéan kasairian andumoro' Sia in tana'i, “Icoo si Imam akar ing kauré-uré, kaputé i Melkisedek.”

¹⁸ Anaé, intarépé' en ukum indior aicélongo ampa'paan en ukum itu ra'io wana kaketeran wo ra'io wana ka'i torona.

¹⁹ Ampa'paan en ukum Torat ra'ica ro'na méma' si séike' e mamuali lekep an dior i Amang Kasuruan. Taan intarépé' kita winéano mai i Amang Kasuruan arapan lébé loor, si méma' icita rumuru mangé ai Sia.

²⁰ An tutuw i Yesus mamuali Imam, Sia niangkai ang karapi in sumpa. Ra'ica wana sumpa tanu siitu an tutuw é taranak i Lewi niangkai mamuali imam.

²¹ Taan si Yesus niangkai i Amang Kasuruan mamuali Imam maké in sumpa. Si Amang Kasuruan icumua a si Yesus tanu si aipatic i Daud tana'i, “Si Casuruan isumumpa wo em pinusé'-Na ra'ica kawisa maroba, ‘Icoo Imam akar ing kauré-uré.’ ”

²² Ampa'paan an sumpa i Amang Kasuruan itu, si Yesuso e mamuali petaru asi perjanjian si lumoorai asi perjanjian indior si niéma' i Amang Kasuruan a sé apo-apo' é tou Israel.

²³ Indior sé imam kelian. Taan ampa'paan séra imaté akar ra'ica toro lumala'us in tawoien éra, anaé musti sawelan é imam walina.

²⁴ Taan si Yesus menonou akar ing kauré-uré, akar en tawoien-Na tanu Imam ra'ica kasawelan é tou walina.

²⁵ Ampa'paano in itu si Yesus makawoo lumowir ang karapi in lekep sé pakasa in tou sé aiwali-Na mangé a si Amang Kasuruan, ampa'paan si Yesus menonou akar ing kauré-uré si mekiupus a si Amang Kasuruan torona éra.

²⁶ Anaé, si Yesus ituo si Imam Wangko' si paperlunta. Sia itu le'nas, Sia ra'ica wana kaséaan wo ra'ica wana e ro'na méé kaséaan. Sia aitané asé tou sé iméma' ing kamesé-meséaan, wo niangkai angé asi tampa pasiri-siriin an sorga.

²⁷ Si Yesus ra'ica meputé wo sé imam wangko' walina, si susur in endo musti meméé-méé i raragés binatang pinokol torona ing kamesé-meséaan éra in esa wo ka'i torona ing kamesé-meséaan é tou éra. Sia iméé i raragés makasake' torona ing kauré-uré, an tutuw-Na irumagés in owak-Na in esa.

²⁸ Iciit in ukum Torat, si imam wangko' pengaangkaien asé tou biasa sé ra'ipé' lekep. Taan kekawus in ukum Torat, si Amang Kasuruan mangkai si Toyaang-Na maké in sumpa, wo si Toyaang-Na niéma'o mamuali Imam Wangko' si lekep akar ing kauré-uré.