Ibrani 6 - En Taar Weru a nunuwu' é Tontemboan

¹ Ampa'paan in ituo, mayoo tela'uta em patuuran in sususuien en andumoro' i Kristus wo melala'uso in sususuien si rumangka'mai wosama' em paémanenta makaketer. Tioo penguri-ngurin em patuuran in sususuien itu, tanumai sususuien in andumoro' i mape'dis mengéma-ngéma' in léwo', wo sususuien in andumoro' tumambisa maéman a si Amang Kasuruan,

² kuma'pa sususuien in andumoro' im baptisan, sususuien in andumoro' i maro ing kama am bawo in do'kos, sususuien in andumoro' sé tou imaté tumou sumawel, wo sususuien in andumoro' in ukuman akar ing kauré-uré.

³ Sa énan i Amang Kasuruan, lala'ustao asi sususuien e rumangka'mai.

⁴ Ampa'paan sé tou isumangkumo maéman a si Kristus wo sé menonouo an sendot i Amang Kasuruan, imepé'o mai ing kama-kamang-Na, wo sumangkumo kinawasa i Roh Le'nas,

⁵ wo sumangkumo makailek sapaoka en Taar i Amang Kasuruan itu loor wo sumangkumo mepé' mai ing kawasa i Amang Kasuruan si kawasa ang kayo'baan weru sa,

⁶ taan sa séra ra'io ka'i maéman a si Kristus, séra ra'io kawisa kaakinan e mape'dis ang kamesé-meséaan éra. Ampa'paan séra in esa tanu isumalipo sumawel si Toyaang i Amang Kasuruan wo ka'i suméroo Sia an dior é tou keli.

⁷ Kita in tou ayandé kaputé in tana'. En tana' mase'sep rano in uran si tatap matumpamai am bawona, en tana' itu pengatowan ing kelian tinanem si mengawéé wuéna a sé menganguma, wo en tana' itu kamangen i Amang Kasuruan.

⁸ Taan, sa en tana' itu asalo pengatowan ing kuung wo rukut tutunéan, en tana' itu ra'ica wana torona. Wo en tana' itu matawio icutuk i Amang Kasuruan, ang kasomoianna pakatunu-tunun.

⁹ Poo-poow sé icaupusku, mandé ka'i repeto eng kepokéi ami ai camu, percayan ami sapaoka kamu tou sé ra'ica tumela'u si Yesus. Kailekan ami sapaoka niéma'o miow sé andumoro' in loor si patus pengaémaan é tou sé linowiro i Amang Kasuruan.

¹⁰ Ampa'paan si Amang Kasuruan itu ra'ica marapit, ra'ica ilupa-Na sapa sé tinawoio miow torona Sia. Wo ra'ica ilupa-Na ka'i eng kaupusan ipaturu' miow ai Sia an tutuw iow matawang sé tou le'nas indior akar intarépé'.

¹¹ Icasalé' ami keli sa kamu esa wo si esa mainca-incaya' akar ing kaka'puan ing katouan wosama' kéréan iow sapa em paara-arapen iow itu.

¹² Wo in taniitu kamu ra'ica mangenger. Taan en casalé' ami wosama' kamu mengaandé mangé a sé tou sé tumerima in janji i Amang Kasuruan ampa'paano im paémanen wo ing katalesenan éra imaento-ento' mai in janji-Na itu.

Sapa sé aijanji i Amang Kasuruan tantu émaan-Na

¹³ Si Abraham mamuali paandéanta. An tutuw in jumanji a si Abraham, si Amang Kasuruan sumumpa ang karapi i ngaran-Na in esa ampa'paan ra'ica wana tou en lumébémai wo Sia.

¹⁴ Icua-Na a si Abraham in tana'i, “Uli-ulit ko kamangen-Ku oka ing kumeli-keli, wo émaan-Ku oka sé taranakmu makeli ka'i.”

¹⁵ Si Abraham talesen keli mangento-ngento' in janji itu mamuali, wo in taniitu kinéréanna sapa si aijanjio i Amang Kasuruan ai sia.

¹⁶ Sa si tou sumumpa, sia sumumpa tumuul i ngaran i tou si lumébémai wo sia, wo en sumpa itu eng kumeter in janji aicuana itu, wo en sumpa itu kuma'pu im pakasa ing kaperéndéran.

¹⁷ Si Amang Kasuruan kumeter in janji-Na a sé tou ang karapi in sumpa wosama' séra sé tumerima in janji-Na itu ro'na mercaya sapaoka Sia ra'ica rumoba im pawasa-wasan-Na.

¹⁸ Anaé, si Amang Kasuruan imééo in janji wo in sumpa-Na. Sé rua itu ra'ica kawisa maroba, ampa'paan si Amang Kasuruan ra'ica kawisa tumowo. Ampa'paan in ituo, kita sé mengaéré in loindongen i Amang Kasuruan, makéré ing kaincayaan keter e mauli-ulit tumimboi im paarapen si an diorta.

¹⁹ Em paarapenta itu ayandé tanu in jangkar keter wo aman torona i mu'kurta. Em paarapen itu makawali icita lumangkoi angé ing kaéng pengakawu', am pauntepan asi Kamar Lume'na-le'nas an sorga.

²⁰ Wo si Yesus imuntepo am bitu rumior angé ai cita, an tutuw-Na mamuali Imam Wangko' akar ing kauré-uré kaputé i Melkisedek indior.