Ibrani 4 - En Taar Weru a nunuwu' é Tontemboan

Endo ipaena' tinu'tulo i Amang Kasuruan

¹ Aijanji i Amang Kasuruan sapaoka sé tou maéman muntep oka an tampa pengaenaan e mena' mewali-wali wo Sia. Wo en janji itu awéané' akar intarépé'. Ampa'paan in ituo mareti-retio mangé oréoka awéan esaan ai camu ra'ica muntep asi tampa pengaenaan itu.

² Ampa'paan en Abar Kaaruien itu ipakua-kuao ai cita, meputé sé aicuao a sé apo-apo'ta indior. En abar sé lininga é apo-apo'ta itu ra'ica wana torona ai séra, ampa'paan ra'ica percayan éra.

³ Taan wayake' icita sé maéman e ro'na muntep asi tampa pengaenaan e mena' mewali-wali wo si Amang Kasuruan. Wo andumoro' sé tou walina aicua i Amang Kasuruan tana'i, “Ang karapi in e'bow isumpa-Ku, ‘séra ra'ica toro muntep asi tampa pengaenaan e mena' mewali-wali wo Yaku.’ ” Si Amang Kasuruan icumua in taniitu, mandé en ulitna en tampa pengaenaan itu tinu'tulo tumo'tolke' mai eng kayo'baan anio' niéma'-Na.

⁴ Kailekanta en tampa pengaenaan itu aitu'tulo, ampa'paan ang Kitap Le'nas icumua andumoro' si endo kapitu tana'i, “Asi endo kapitu si Amang Kasuruan mena'o am pakasa in tawoien-Na.”

⁵ Wo awéan ka'i en aicua i Amang Kasuruan in tana'i, “Séra ra'ica toro muntep an tampa pengaenaan e mena' mewali-wali wo Yaku.”

⁶ Anaé, en tampa pengaenaan itu makawuka'pé' torona é tou wo séra awéané' témpo mangé muntep am bitu. Taan sé apo-apo'ta tou Israel sé kinuanano in Abar Kaaruien itu, séra ra'ica toro muntep asi tampa pengaenaan itu ampa'paan séra ra'ica le'tek a si Amang Kasuruan.

⁷ Ampa'paan in ituo si Amang Kasuruan itumantuo ka'i esa endo walina e méé témpo a sé tou muntep asi tampa pengaenaan itu. Si endo ituo “si endo anio'.” Kekawus i maatus ngata'un si Daud imatic i nunuwu' i Amang Kasuruan andumoro' si endo anio', “Asi endo anio', sa kamu luminga in suara i Amang Kasuruan, tioo ipaketé-keté en até.”

⁸ Indior si Yosua imakawalio sé tou Israel muntep an tana' Kanaan, taan en itu ra'ica puté sia makawali séra an tampa pengaenaan e mena' mewali-wali wo si Amang Kasuruan. Sa séra wutu-wutul aiwalio i Yosua an tampa pengaenaan itu, tantu si Amang Kasuruan ra'io ka'i kumua en andumoro' in esa endo walina.

⁹ Anaé, sé tou i Amang Kasuruan, séra awéané' esa endo ipaena' mewali-wali wo si Amang Kasuruan, tanu mento' matawoi asi endo Sabat.

¹⁰ Ampa'paan si séike' si muntepo an tampa pengaenaan e mena' mewali-wali wo si Amang Kasuruan, sia imena'o am pakasa in tawoienna, kaputé si Amang Kasuruan imena'o' an tawoien-Na.

¹¹ Ampa'paan in ituo mayoo kita rumaméji muntep an tampa pengaenaan-Na itu wosama' ra'ica wana mandé esake' ai cita si ra'ica icauntep kaputé é apo-apo'ta sé ra'ica le'tek.

¹² En Taar i Amang Kasuruan itu menonou wo makakawasa. Wo en Taar itu ilumébé mai ing katelew in sa'bel rua telewa, ro'na tumopok rarem keli akar tumané i mu'kur wo e roh, wunak wo wuku-wuku in du'i, wo ro'na kailekan-Na waya sé an untep im bewerot wo im paaté-atén é tou.

¹³ Ra'ica wana mandé esake' mahluk en icaenep am beren i Amang Kasuruan. Sapa-sapake' makawuka-wuka' wo kaséré-séréan an dior-Na, wo ai Siake' kita méé im panowaten asé im pakasa sé niéma'ta.

Si Yesus Imam Wangko' si parayo-rayo wo pasiri-siriin

¹⁴ Kita intarépé' makaanuo Imam si Mangko-wangko' si mangéo muntep an sorga wo an dioro i Amang Kasuruan en tumawang icita. Sia ituo si Yesus, Toyaang i Amang Kasuruan. Ampa'paan in ituo mayoo kita mauli-ulit tumimboi im paémanenta a si Yesus meputé im paémanen si pengaakunta.

¹⁵ Ampa'paan si Imam Wangko'ta itu ra'ica imam wangko' sé ra'ica ro'na kumiit mendam ing kalembianta. Ampa'paan sinangkum-Nao mai waya em pangepé'an an tutuw Sia ang kayo'baan, meputé sé pasangkumenta intarépé'. Taan Sia ra'ica kawisa mako méma' ing kamesé-meséaan.

¹⁶ Ampa'paan in ituo, mayoo kita ang karapi in da'ica wana eng kaindé'an sumaru im palukutan pasiri-siriin i Casuruan si maturu' in upus tatambér. Wo in taniitu, kawisake' kita mapatawang, tantu wéé-Na oka mai eng kaupusan wo tumambérai in upus en itumawang icita.