Ibrani 13 - En Taar Weru a nunuwu' é Tontemboan

Eng katouan si maarui in até i Amang Kasuruan

¹ Poo-poow, meupu-upusano mangé tanu mepoow an esa paémanen.

² Tioo marua-rua até en tumerima si séike' en lumosér am balé miow mandé ka'i ra'ipé' katuusan iow. Ampa'paan ang karapi méma' in taniitu, awéan sé piraan tou indior ra'ica kinailekan éra itumerimao sé malaékat am balé éra.

³ Ta'néieno mangé sé kakélé miow sé an untep im bui, tanuoka kamu ka'i pakabuin mewali-wali wo iséra. Wo ta'néien ka'i sé kakélé miow paokoien, tanuoka kamu ka'i paokoien mewali-wali wo iséra.

⁴ Pakasa in tou musti sumiri' ing kawéng wo sé mempenanaan musti le'tek esa wo si esa. Ukumen oka i Amang Kasuruan sé tou sundal wo sé tou mabersina.

⁵ Tioo kamu mamuali ata in doit, taan sapa sé awéano ai camu atoren sumama-sama' en itu aweso ai camu. Ampa'paan si Casuruan icumuao, “Ico ra'ica kawisa iwekar-Ku, wo ico ra'ica kawisa itela'u-Ku.”

⁶ Ampa'paano in itu, icita ra'ica maindé' makua, “Si Amang Kasuruan oka en tumawang yaku, yaku ra'ica maindé'. Ra'ica wana tou e ro'na méma' in sapa-sapa a yaku.”

⁷ Ta'néien angé sé kikiiten iow sé icumuao in Taar i Amang Kasuruan ai camu. Séréno sumama-sama' tambisa eng katouan éra akar séra maté, wo andéano mangé em paémanen éra.

⁸ Si Yesus Kristus kasake' puté, indior, intarépé' wo akar ing kauré-uré.

⁹ Tioo kamu isélé'kow in sususuien sé membam-balinaan sé ra'ica meputé wo in sususuien i Kristus. Lébé loor en até miow keteren ampa'paan kamu asalo makawangén asi upus aitambér i Amang Kasuruan. Sé atoran andumoro' ing kakanen, mandé kiiten iow, en itu ra'ica méé katoronaan ai camu.

¹⁰ Kita awéano paragésan e méé i raragés a si Amang Kasuruan. Taan sé imam é tou Israel sé maselewir an ténda paapo'an ra'ica toro kuman i raragés si aiweta' am bawo im paragésan itu.

¹¹ Ampa'paan en enda' é binatang pinokol sé airagés tanu iparagés torona ing kaampungan ing kamesé-meséaan, paalin i imam wangko' ang Kamar Lume'na-le'nas, wo en owak i binatang itu pakatunu-tunun ang kesot in ténda akar mamuali awu.

¹² Siituo imangémai si Yesus mawendu wo imaté ang kesot im papalen wangker ing kota Yerusalem e meresi ing kamesé-meséaan é tou ang karapi in enda'-Na in esa.

¹³ Ampa'paano in itu, mayoo kita mangé meta'up wo Sia ang kesot in ténda, wo mendam im paséro' é tou kaputé si pinendam-Na.

¹⁴ Ampa'paan ang kayo'baan anio' ra'ica wana kota ento'anta akar ing kauré-uré, kita maento-ento' ing kota ento'anta si maai oka sa.

¹⁵ Anaé, ampa'paano si Yesus Kristuso, mayoo kita mengua-ngua i rarayo wo in sisiri' a si Amang Kasuruan ang karapi im ba'ba'ta e méé makapulu'sama'. En itu tanu cita méé raragés binatang pinokol ai Sia.

¹⁶ Tioo ilupa miow mengaéma' in loor wo mengatawang sé tou sé perlu tawangen. Siituo e raragés en icasalé' i Amang Kasuruan.

¹⁷ Pelinga-lingano mangé sé kikiiten iow wo émaano mangé sapa sé aiperénta éra. Ampa'paan séra mengatéir i mu'kur iow tanu sé tou e musti méé im panowaten. Sa kamu mengalinga-linga ai séra tanu siitu, séra ro'na méma' in tawoien ang karapi in arui en até. Taan sa kamu ra'ica mengalinga ai séra, séra masusa en até wo en itu ra'ica maali ing kauntungan ai camu.

¹⁸ Ipenomba-nombayango mangé kami. Ampa'paan percayan ami en até ami uli-ulit weresi, ampa'paan am baya-waya kami masalé' mengéma-ngéma' sapa sé loor.

¹⁹ Wo pekiupusenku ai camu, isombayang angé aku wosama' rior maréngai ai camu.

En sombayang wo kumusi' in surat

²⁰ Si Yesus Apo'ta tinou sumawel i Amang Kasuruan am papaté. An tutuw Sia imaté en enda'-Na makatiti-titis wo en enda'-Na itu iméma' im perjanjian weru mapaké akar ing kauré-uré. Anaé, Sia mamuali Gembala Wangko' torona icita. Ampa'paano in itu pekiupusenku a si Amang Kasuruan si palemboian ing kaeluran torona miow,

²¹ en tumu'tul im pakasa sé loor si paperlun iow e méma' sapa sé icasalé'-Na. Wo pekiupusenku ka'i wosama' si Amang Kasuruan matawoi an untep in atéta akar kita ro'na méma' sapa sé icasalé'-Na ampa'paano i Yesus Kristus. A si Yesus Kristuske' em pakasa i rarayo wo in sisiri' akar ing kauré-uré. Ulit.

²² Poo-poow, pekiupusenku ai camu wéanio' rékén sumama-sama' sé aisina'uku si aipatic an surat anio', ampa'paan ra'ica talos lambot.

²³ Icasalé'ku kailekan iow sapaoka si Timotius poowta aicesoto am bui. Sa sia icateka'o am bia'io, kami in dua makala'us mewali-wali oka maangé ai camu.

²⁴ Icua mio' en siri' ami a sé kikiiten iow wo a sé pakasa sé tou le'nas. Sé poo-poow maéman an Itali am bia'i ka'i, icumirim in siri' ai camu.

²⁵ Pekiupusenku wosama' en upus aitambér i Amang Kasuruan mewali-wali wo icamu im baya.