Ibrani 12 - En Taar Weru a nunuwu' é Tontemboan

En sina'u wosama' lume'te-le'tek am paémanen

¹ Tumo'tolke' mai indior, keli en tou sé imamuali sairi im paémanen éra torona icita. Kita pakali'ciren é tou keli itu tanuoka ing kambung makali'cir icita. Ampa'paan in ituo mayoo tiya'ta waya em pamuléngen wo ing kamesé-meséaan si makaléngkété' ai cita, wo kasake' talesen am pekowaan si pakasarunta.

² Am papekowaan anio', mayoo kiitenta ang karapi im beren si asalo makatéinteng angé a si Yesus, ampa'paan Siao si maakin im paémanenta a si Amang Kasuruan wo si makawali im paémanenta makaleke-lekep. Sia talesen pengaokoien akar maté ang kayu salip, ra'ica pandungen-Na em pengaroros ampa'paan kailekan-Na sapaoka makasangkum ako im pakasa in itu awéan kaaruian si aitu'tulo ai Sia. Intarépé' Sia makalukut ang kakan im palukutan pasiri-siriin i Amang Kasuruan.

³ Pena'né-na'néien angé si Yesus, si le'tek muléng ing kawenduan uter an tutuw Sia paokoien é tou ang kamesé-meséaan. Wo in taniitu kamu ra'ica mateké' en até wo ra'ica katalaan im paarapen.

⁴ Ampa'paan kamu ra'ipé' sumangkum ako masundur ing kamesé-meséaan akar tumiis en enda' kaputé in sinangkumai i Yesus.

⁵ Wo ra'ica toro ilupa miow en sina'u ang Kitap Le'nas si aicua ai camu, tanuoka si amang masina'u a sé toyaangna in tana'i, “Toyaang-Ku, ra'ica toro paepesen im beren em pasusui i Amang Kasuruan, wo ra'ica toro mateké' en até sa ko tegoren-Na.

⁶ Ampa'paan si tou ipaupu-upus i Casuruan tepian-Na wo si tou si niaku-Na tanu toyaang samboken-Na.”

⁷ Anaé, sa kamu tepian i Amang Kasuruan, kamu musti malese-lesen ampa'paan kamu ang karoro'an paémaan-Na tanu toyaang-Na. Ampa'paan ra'ica wana mandé esake' toyaang si ra'ica sumangkum tinepian i amangna.

⁸ Pakasa in tou sumangkumo tinepian i amangna. Taan sa kamu ra'ica tinepian tantu kamu ra'ica toyaang sah, wo wutu-wutul ra'ica toyaangna.

⁹ Kita awéan amang ang kayo'baan. Kita patepianna wo sia pasiriinta. Wopé'taré si Amang Kasuruan, Amangta an sorga, Amang é pakasa é roh. Kita musti lume'te-le'tek angé ai Sia wosama' kita ro'na menonou akar ing kauré-uré.

¹⁰ Sé amangta ang kayo'baan mengatepi icita ang karoro'anke' iciit sapa sé paanggapen éra loor. Taan si Amang Kasuruan mengatepi icita torona ing kalooranta in esa wosama' kita ro'na male'nas kaputé Sia le'nas.

¹¹ Wutul, an tutuw kita tinepian, en atéta ra'ica mendam in arui asaloke' mendam in susa. Taan an tutuw in tinepian in taniitu kita maroba oka, akar em perita maloor wo eng katouanta maelur.

¹² Ampa'paan in ituo, ketereno mangé eng kama sé lembi wo eng kundu sé mage'ger.

¹³ Wo maya'o mangé an lalan rondor wosama' sé kénto' ra'ica ka'i cawiles taan ro'na masama'.

¹⁴ Rumaméjio menonou meelu-eluran ang karapi é pakasa in tou, wo rumaméji ka'i menonou le'nas. Ampa'paan sa si tou ra'ica menonou le'nas, sia ra'ica suméré si Amang Kasuruan sa.

¹⁵ Mareti-retio mangé oréoka awéan esaan ai camu kumélong in upus aitambér i Amang Kasuruan. Ampa'paan sa awéan tou tanu siitu, sia mamuali tanu in tinanem racung an uner iow akar méma' ing kasusaan wo en racungna luméwo' sé tou keli.

¹⁶ Matéi-téiro mangé wosama' ra'ica wana esaan ai camu sé mengaéma' andumoro' sé sundal wo ra'io masiri' si Amang Kasuruan meputé wo si Esau, si mangkér in hakna tanu toyaang luluna ampa'paan in esa piring kakanen.

¹⁷ Wo kakailekano iow, si Esau masalé' tumerima sumawel ing kamang asi amangna tanu toyaang luluna, taan sia aicélongke'. Ampa'paan sia ra'io wana témpo ka'i e mutul ing kaséaanna itu, mandé pangérénna ang karapi imaamé'.

Tioo ipakélong en Taar i Amang Kasuruan

¹⁸ Intarépé' kamu sé tumerima im perjanjian weru ra'ica puté wo sé tou Israel sé tumerima im perjanjian uré. Indior sé tou Israel imangé asi esa kuntung si ro'na isuun, siituo eng kuntung Sinai. Séra maindé' keli ampa'paan tumarépé'anke'mai awéan kambung en lumémpeno in sendot i yéndo, wo mariréimbengo, wo awéan séléndu', wo awéan api mengembu-ngembung.

¹⁹ Wo lingan éra en téngéna in terompét wo en suara i Amang Kasuruan. An tutuw éra luminga in suara itu séra maindé' keli akar pangileken éra a si Musa wosama' si Amang Kasuruan ra'io ka'i rumoma' ai séra.

²⁰ Ampa'paan séra ra'ica makatang luminga im perénta anio', “Pakasa sé lumisu ing kuntung anio' tou kuma'pa binatang, musti wangkilen im batu akar imaté.”

²¹ Kaindéén keli sapa sé sinéré é tou Israel akar cua i Musa, “Yaku maindé' keli wo gume'ger!”

²² Taan kamu mayo asi Tolaina in Sion, si Yerusalem an sorga si kota paento'an i Amang Kasuruan si menonou wo sé mariwu-riwu malaékat sé mali'us i masalé-salé'.

²³ Kamu imayo ka'i am paumungan é toyaang luluna i Amang Kasuruan, e ngaran éra aipatico an sorga. Wo kamu meta'up ka'i wo si Amang Kasuruan, si maakim waya sé tou, wo meta'up ka'i wo sé roh é tou sé nianggap wutul i Amang Kasuruan, sé niéma'o makaleke-lekep.

²⁴ Wo kamu mai meta'up ka'i wo si Yesus, si maali mai im perjanjian weru i Amang Kasuruan a sé tou. Wo mai ka'i asi enda' im perjanjian weru si makatiti-titis e méé ing kaampungan ing kamesé-meséaan a sé tou. Sa taniitu en enda' i Yesus en lébé awéan wééna wo in enda' i Habel, ampa'paan en enda' i Habel si makatiti-titis asaloke' in sumuli' im pinanganat i Kain.

²⁵ Ampa'paan in ituo, sa si Amang Kasuruan maroma' ai camu tioo ipakélong. Indior sé tou Israel ra'ica mengalinga in taar i Amang Kasuruan sé ipakua i Musa ai séra ang kayo'baan, akar séra makéré in ukuman. Wopé'taré icita anio', sa kita ra'ica mengalinga in taar-Na si an sorga owo, tantu kita ra'ica icaséip an ukuman.

²⁶ An tutuw si Amang Kasuruan maroma' a sé tou Israel ang kuntung Sinai, en suara-Na mengaéro' ing kayo'baan. Taan intarépé' Sia jumanji, “Makasapé' ka'i ipangéro'-Ku oka eng kayo'baan wo ka'i en langit.”

²⁷ Si nunuwu' “makasapé'” eng kaangéanna pakasa sé niéma'-Na asi cayo'baan anio' ipangéro' oka wo materi, wosama' sapa sé ra'ica toro ipaéro' siituo sé matela'u.

²⁸ Anaé, kita mamualio tou ang kakolanoan si ra'ica toro yéro', ampa'paano in itu mayoo kita kumua makapulu'sama' a si Amang Kasuruan, wo maapo' mangé ai Sia ang karapi in siri' wo wuta ing kaindé'an iciit en casalé'-Na.

²⁹ Ampa'paan si Amang Kasuruan si paapo'anta itu, Sia tanuoka in api mengatunu im baya-waya.