Ibrani 10 - En Taar Weru a nunuwu' é Tontemboan

Si Kristus méé in owak-Na tanu raragés si uli-ulit lekep

¹ En atoran-atoran ang kitap Torat itu, asaloke' im bayangan andumoro' sé loor si maai sa, ra'ica modél aseli asé loor itu. Sa kumiit sé atoran itu, sé tou sé mai maapo' a si Amang Kasuruan, séra musti meméé-méé raragés meputé susur in ta'un. Taan e raragés binatang pinokol sé airagés éra itu, ra'ica kawisa méma' iséra makaleke-lekep an dior i Amang Kasuruan.

² Sa woo sé tou maapo' a si Amang Kasuruan uli-ulit wineresio ang kamesé-meséaan torona ing kauré-uré, séra ra'io ka'i mendam ing kamesé-meséaan. Wo in taniitu séra ra'io sangali ka'i rumagés binatang pinokol.

³ Taan sé binatang pinokol sé ipengawéé éra a si Amang Kasuruan susur in ta'un, en itu asalo méma' iséra makata'néi ing kamesé-meséaan éra.

⁴ Ampa'paan en enda' i sapi tuama wo en enda' i mémbé' tuama uli-ulit ra'ica ro'na misi ing kamesé-meséaan é tou.

⁵ Ampa'paan in itu tutuw si Kristus mai ang kayo'baan anio', Icua-Na in tana'i, “Si Amang Kasuruan ra'ica masalé' sé binatang pinokol wo i raragés, taan aitu'tulo i Amang Kasuruan en owak-Ku e iragés.

⁶ Si Amang Kasuruan ra'ica masalé' sé binatang pinokol tinunu wo sé raragés torona ing kaampungan ing kamesé-meséaan.

⁷ Wo icua-Ku, ‘Si anioo Aku, é Amang Kasuruan! Yaku imai e méma' ing kasalé'an-Mu, tanu si aipatic andumoro' Yaku ang Kitap Le'nas.’ ”

⁸ Si aicua i Kristus kataré-taré an dangka' in tana'i, “Si Amang Kasuruan ra'ica masalé' sé raragés binatang pinokol wo i raragés walina, wo sé binatang pinokol tinunu wo sé binatang pinokol torona ing kaampungan ing kamesé-meséaan.” Mandé ka'i sé raragés itu airagés makiit in atoran an ukum Torat.

⁹ Kekawus in itu icua i Kristus in tana'i, “Si anioo Aku, é Amang Kasuruan! Yaku mai e méma' ing kasalé'an-Mu.” Wo in taniitu, ra'io pakén i Kristus sé iparagés indior, wo sawelan-Na rumagés in owak-Na in esa.

¹⁰ Ampa'paan ing kasalé'an i Amang Kasuruan tanu siitu, kita line'naso torona ing kauré-uré an tutuw i Yesus Kristus rumagés in owak-Na wayake' i makasa.

¹¹ Indior si esa wo si esa imam mengaéma' in tawoienna susur in endo wo menguri-nguri mengawéé binatang pinokol si meputé a si Amang Kasuruan. Wo em iparagés pawéé éra itu, ra'ica toro misi ing kamesé-meséaan é tou.

¹² Taan si Kristus si Imam Wangko'ta méé in owak-Na pinaté makasake' torona ing kaampungan ing kamesé-meséaan akar ing kauré-uré. Kumawus in itu Sia lumukut ang kakan i Amang Kasuruan.

¹³ Wo intarépé' si Kristus maento-ento' oka in orasna pakasa sé kaséké'-Na émaan mamuali paléakan ing kécéi-Na.

¹⁴ Anaé, ang karapi in esake' iparagés, linekepo i Kristus torona ing kauré-uré sé tou sé line'nas-Nao.

¹⁵ Wo e Roh Le'nas ka'i mengasairi andumoro' in itu ai cita. Ang Kitap Le'nas aipatic in tana'i,

¹⁶ “Si Amang Kasuruan kumua: ‘Si anioo em perjanjian weru si émaan-Ku oka ang karapi éra asé endo-endo mengangai. Iweta'-Ku oka en ukum-ukum-Ku an untep in até éra, wo ipatic-Ku en itu a ngaas éra.’

¹⁷ Ra'io pena'né-na'néien-Ku ka'i eng kamesé-meséaan wo eng kaléwo-léwo'an sé niéma' éra.”

¹⁸ Anaé, sa eng kamesé-meséaan wo eng kaléwo-léwo'an niampungano, tantu ra'io sangali ka'i méé binatang pinokol en tumu'bus ing kamesé-meséaan.

Mayoo rumuru a si Amang Kasuruan

¹⁹ Anaé é poo-poow, ampa'paano in enda' i Yesus, kita intarépé' ra'io maindé' muntep ang kamar Lume'na-le'nas.

²⁰ Ampa'paan si Yesus imuka'o in lalan weru, wosama' kita ro'na menonou akar ing kauré-uré. En lalan itu lumewet asi kaéng ipakawu' maangé asi Kamar Lume'na-le'nas, wo owak i Yesuso in esa si kaéng ipakawu' itu.

²¹ Wo kita intarépé' makaanuo Imam Wangko' si tinokéan en tumu'tul im Balé i Amang Kasuruan.

²² Ampa'paan in itu mayoo kita rumuru mangé a si Amang Kasuruan ang karapi in lekep en até wo uli-ulit maéman ai Sia. Ampa'paan en atéta wineresio in enda' i Kristus akar male'nas asi kaléwo'anta, wo en owakta tanuoka winu'asano in dano weresi.

²³ Mayoo timboianta mauli-ulit em paémanen itu, tioo marua-rua wasa. Ampa'paan si Amang Kasuruan le'tek asi sapa sé aijanji-Na.

²⁴ Wo mayoo kita mensén-séréan esa wo sé walina wosama' kita ro'na méé kaincayaan e mengaupus sé kakélé tou wo mengaéma' andumoro' sé loor.

²⁵ Tioo kita tumayang am pengali'usan i mengaapo', tanu ing kanaramen im paémaan é piraan tou. Taan mayoo taré kita mare'de-re'dem mengali'us mewali-wali i maapo' wosama' membém-béan angé ing kaketeran am paémanen, ampa'paan kailekanta en endo si Apo' Yesus maai sumawel makatawio.

²⁶ Ampa'paan sa kita makaileko in sususuien wutul asi Amang Kasuruan wo kita metutu'ke' taré mengéma-ngéma' ing kamesé-meséaan, ra'io wana ka'i raragés binatang pinokol em patu'bus ing kamesé-meséaan,

²⁷ taan asalo oka maento-ento' in ukuman si kaindéén oka mai ang karapi in api mengembu-ngembung si ra'io icakua en tumunu oka pakasa in tou sé masundur si Amang Kasuruan.

²⁸ Indior, sa awéan tou kumélong in ukum si aiwéé i Musa, wo kineter ka'i ing kasairian é rua kuma'pa telu tou, si tou itu ukumen im patén, wo sia ra'io wana ka'i kaampungan.

²⁹ Anaé, ro'nao kawerotanta tambisa eng kauter in ukuman a sé tou sé maepes im beren asi Toyaang i Amang Kasuruan wo maanggap ra'ica wana wééna en enda' perjanjian si ro'na meresi ing kamesé-meséaan éra, wo sé mengaroros i Roh e mawéé in upus tatambér ai cita.

³⁰ Ampa'paan katuusanta si Amang Kasuruan si cumua in tana'i, “Yakuo en awéan hak en sumuli' ing kaléwo'an. Yaku in esa oka en sumuli'.” Wo ka'i awéan aipatic in tana'i, “Si Casuruan oka e makim sé tou-Na.”

³¹ Kaindéén keli sa kita makéré ukuman asi Amang Kasuruan si menonou.

³² Taan ta'néieno mangé si oras ilumangkoio, an tutuw kataré-taré en até miow tinélangai in sendot i Amang Kasuruan e makatuus asi Kristus. An tutuw itu kamu meta'up ing keli kawenduan taan kamu makawoo tumang am paémanen iow.

³³ Makakeli-keli kamu i paroros wo paokoien an dior é tou keli. Wo makakeli-keli ka'i kamu kumiit mendam ing kawenduan ang karapi é poo-poow an esa paémanen.

³⁴ Mémang kamu kumiito mendam ing kawenduan é tou sé pakabuin. Wo an tutuw pakasa ing kasiyaan iow niandét, kamu maaru-aruike' ampa'paan kailekan iow sapaoka kamu in esa makaanu ing kasiyaan si lumoorai wo tumang akar ing kauré-uré.

³⁵ Ampa'paan in itu, tioo ipaweka-wekar em paémanen iow a si Kristus, ampa'paan kéréan oka miow en laasa wangko' asi Amang Kasuruan.

³⁶ Anaé, intarépé' kamu musti malese-lesen sa meta'up ing kawenduan, wosama' kaémaan iow eng kasalé'an i Amang Kasuruan. Wo in taniitu kamu ro'na tumerima sapa sé aijanji-Na.

³⁷ Ampa'paan awéan aipatic ang Kitap Le'nas in tana'i, “Ra'io uré Sia si maai itu maayo, wo ra'io mauré-uré.

³⁸ Sé tou nianggap-Ku wutul menonou oka ampa'paan im paémanen éra a Yaku. Taan sa awéan en an uner éra si tumela'uo Yaku, ra'ica icasalé'-Ku.”

³⁹ Kita anio' ra'ica sé tou sé tumela'uo si Casuruan wo patén, taan kita anio' sé tou maéman a si Casuruan wo sé makéré ing kalowiran.