Ibrani 1 - En Taar Weru a nunuwu' é Tontemboan

Si Amang Kasuruan maroma' a sé tou mengapaké si Toyaang-Na

¹ Indior, penguri-ngurin i Amang Kasuruan maroma' a sé apo-apo'ta mengapaké sé nabi ang karapi i membam-balinaan en carana.

² Taan asé endo kaka'puan ing kayo'baan anio', si Amang Kasuruan maroma' ai cita mengapaké si Toyaang-Na in esa. Wo ampa'paano i Toyaang-Na anio', eng kayo'baan wo pakasa sé an untepna émaan i Amang Kasuruan. Wo aitantu-Nao sapaoka si Toyaang-Na awéan kaloasan makaanu im pakasa sé niéma'-Na itu.

³ Asi Toyaang-Na ituo ro'na kaséréanta e rarayo wo in sisiri' i Amang Kasuruan, Siao em paséréan im peri wo ing kawasa i Amang Kasuruan in esa, Siao ka'i e makatéir im pakasa sé ang kayo'baan ang karapi in Taar-Na si wuta ing kawasa. Wo Siao ka'i e meresi ing kamesé-meséaan é tou, kekawus in itu Sia mangé an sorga wo lumukut ang kakan i Amang Kasuruan si Makakawasa, asi tampa irumangka-rangka'.

Si Toyaang i Amang Kasuruan e rumangka' mai wo sé malaékat

⁴ Si Toyaang itu ilumukuto ang kakan i Amang Kasuruan, anaé si Toyaang-Na itu en irumangka' mai wo sé malaékat, wo e ngaran si aiwéé i Amang Kasuruan ai Sia lébé pasiri-siriin wo i ngaran é malaékat.

⁵ Ampa'paan ra'ica kawisa mako si Amang Kasuruan kumua a sé malaékat, meputé si aicua-Na a si Toyaang-Na tana'i, “Icoo si Toyaang-Ku asi endo anio' Aku imamualio Amang-Mu.” Wo ra'ica kawisa mako ka'i Sia kumua a sé malaékat in tana'i, “Yaku mamuali oka Amang-Na wo Sia mamuali oka Toyaang-Ku.”

⁶ Taan, an tutuw si Amang Kasuruan imutusai si Toyaang-Na luluna mai ang kayo'baan anio', icua-Na in tana'i, “Pakasa sé malaékat i Amang Kasuruan musti kumuru en sumiri' Sia.”

⁷ Taan en andumoro' é malaékat, si Amang Kasuruan icumua in tana'i, “Émaan i Amang Kasuruan sé malaékat-Na mamuali reges, wo sé malaékat mengaselewir ai Sia mamuali embung in api.”

⁸ Taan andumoro' i Toyaang itu, icua i Amang Kasuruan tana'i, “Ico ituo si Amang Kasuruan. Asi palukutan-Mu, Ico merénta oka a sé tou-Mu akar ing kauré-uré. Wo Ico merénta oka a sé tou-Mu ang kakolanoan-Mu ang karapi in da'ica marapit.

⁹ Ico masalé' sé ra'ica marapit, wo maréé sé mengaéma' in léwo' Siituo imangémai si Amang Kasuruan, Amang Kasuruan-Mu, isumisiro Ico, wo iméma'o Ico maaru-arui lébé arui wo sé kara-karapi-Mu.”

¹⁰ Aicua ka'i i Amang Kasuruan a si Toyaang-Na tana'i, “Ico itu Kasuruan, eng kataré-taré Icoo si itumulir im pandasi ing kayo'baan, wo kama-Mu in esa ka'i e méma' in langit.

¹¹ Eng kayo'baan wo pakasa sé an untepna maka'pu oka, taan Ico kasake' awéan, wo pakasa en itu malaléi oka meputé ing karai.

¹² Pakasa en itu gulungen-Mu oka tanuoka magulung ing karai, wo sawelan-Mu oka séra meputé sumawel ing karai. Taan Ico kasake' puté, awéan melala'us akar ing kauré-uré.”

¹³ Wo si Amang Kasuruan ra'ica kawisa mako kumua a sé malaékat meputé si aicua-Na a si Toyaang-Na, “Lumukuto mai asi tampa pasiri-siriin ang kakan-Ku, akar sé kaséké'-Mu iweta'-Ku am palara ing kécéi-Mu.”

¹⁴ Sa taniitu, si séi réén sé malaékat itu? Séra sé roh mengaéma' sapa sé airu'du' i Amang Kasuruan, sé ayutus-Na en tumawang sé tou sé makéré oka ing kalowiran.