Galatia 3 - En Taar Weru a nunuwu' é Tontemboan

Sé tou ro'na nianggap wutul an dior i Amang Kasuruan ampa'paan im paémanenna a si Yesus

¹ Éi tou Galatia sé bodok! Si séi réén e muwak icamu? Ra'ica réén aisisilkuo ai camu indior ang karapi i makakii-kiit andumoro' i Yesus Kristus si aisalipo?

² Sowateno mai em buwuéienku anio': Ampa'paan in sapa réén kamu tumerima i Roh Le'nas? Ampa'paan mengaéma' in ukum Torat kuma'pa luminga in Abar Kaaruien wo maéman a si Kristus?

³ Kéitu réén kamu imabodoko tanu siitu? Indior aito'tol iow eng katouan weru ang karapi im paakinen i Roh Le'nas, kéitu réén intarépé' kamu asalo mamangén ang kaketeran iow in esa?

⁴ Ra'ica réén wana en torona waya eng kamang sé tinerimao miow kekawus iow maéman a si Kristus? Yaku wutu-wutul mercaya sapaoka pakasa en itu ra'ica ra'i-ra'i taan tantu awéan en toronana ai camu.

⁵ Si Amang Kasuruan mééo mai i Roh Le'nas-Na ai camu ang karapi i mawuta-wuta, wo iméma'o ing kakaya'kaan an uner iow. Niéma' réén i Amang Kasuruan en itu ampa'paan kamu mengaéma' in ukum Torat? Tantu ra'ica. Taan ampa'paan kamu iluminga in Abar Kaaruien wo maéman a si Kristus.

⁶ Taniitu ka'i si Abraham. Ang Kitap Le'nas aipatic in tana'i, “Si Abraham maéman a si Amang Kasuruan, ampa'paano in itu sia nianggap wutul i Casuruan.”

⁷ Anaé, kailekan iow sapaoka pakasa en tou maéman a si Amang Kasuruan, séra ituo sé taranak i Abraham.

⁸ Ang Kitap Le'nas, ro'na kakailekanta sapaoka tumo'tolke' mai indior aitantuo i Amang Kasuruan sé tou ra'ica Yahudi anggapen-Na oka wutul an dior-Na sa séra maéman a si Kristus. En Abar Kaaruien itu aicuao i Amang Kasuruan indior a si Abraham an janji anio', “Pakasa im bangsa ang kayo'baan kamangen oka, ampa'paan ico.”

⁹ Kaputé si Amang Kasuruan indior kumamang si Abraham ampa'paan im paémanenna ai Sia, taniitu ka'i pakasa en tou maéman ai Sia intarépé' kamangen oka kaputé i Abraham.

¹⁰ Taan sé tou rumaméji mamuali wutul an dior i Amang Kasuruan ang karapi i mamangén asi mengaéma' in ukum Torat, séra itu kutuken oka tanu ukuman i Amang Kasuruan. Ampa'paan ang Kitap Le'nas aipatic in tana'i, “Si séi si ra'ica le'tek mengaéma' im pakasa in atoran ang kitap Torat, sia itu ukumen oka im patén i Amang Kasuruan.”

¹¹ Anaé, ra'ica wana tou mandé esake' sé nianggap wutul an dior i Amang Kasuruan ampa'paan mengaéma' in ukum Torat. Ampa'paan aipatic ang Kitap Le'nas, “Si tou nianggap wutul i Amang Kasuruan menonou oka ampa'paan im paémanenna.”

¹² Taan en ukum Torat ra'ica mengatuur am paémanen, taan mengatuur am pengaémaan asé im pakasa in atoran ang karapi i makakii-kiit. Si Amang Kasuruan icumua in tana'i, “Si tou mengaéma' in ukum Torat menonou oka ampa'paan mengaéma' in ukum Torat.”

¹³ Si Kristus itumu'buso icita asi kutuk in ukum Torat. Ampa'paan tutuw Sia aisalip, tinanggong-Nao eng kutuk itu sawel icita. Awéan en aipatic, “Si tou niukum im patén wo airantong ang kayu salip, sia itu kaputé i makéré in ukuman patén i Amang Kasuruan.”

¹⁴ Si Yesus Kristus pinatéo ang kayu salip wosama' eng kamang i Amang Kasuruan si aijanjio a si Abraham, iwéé a sé pakasa en tou sé maéman icauntep sé tou ra'ica Yahudi. Anaé, sa kita maéman a si Yesus si maté ang kayu salip, kita ro'na tumerima i Roh Le'nas si aijanjio i Amang Kasuruan indior.

En janji i Amang Kasuruan ra'ica toro batalen in ukum Torat

¹⁵ Poo-poow, wéanku oka esa paandéan asi kanaramen é tou ang katouan susur in endo. Sa awéan tou méma' esa perjanjian, wo em perjanjian itu pinusé'o, ra'io toro batalen kuma'pa awesan i esa tou sapake' a si perjanjian itu.

¹⁶ Taniitu ka'i wo im pakasa in janji i Amang Kasuruan si aicuao a si Abraham wo a si taranakna. An tutuw en janji-Na itu niéma', ra'ica aicua “a sé tarana-taranakmu” en tumuru' a sé tou keli, taan aicua “a si taranakmu” si tumuru' asi esa tou, Siao si Kristus.

¹⁷ Em peangé-angénku tana'i: En janji niéma' i Amang Kasuruan a si Abraham indior pinusé'o an tutuw en ukum Torat ra'ipé' wana. Ampa'paan en ukum Torat niéma' oka asi epat ngaatus telu ngapulu' ngata'un kekawusai in itu. Ampa'paano in itu en janji i Amang Kasuruan a si Abraham ra'ica toro batalen kuma'pa roban in ukum Torat.

¹⁸ Kailekanta sapaoka si Amang Kasuruan mééo mai ing kamang a si Abraham ampa'paan aijanji-Nao ai sia, wo pinercayao i Abraham en janji-Na. Taan sa taranak i Abraham musti maéma' in ukum Torat wosama' tumerima sapa sé aijanji i Amang Kasuruan a si Abraham, séra tumerima ing kamang itu ra'ica ampa'paan in janji-Na. Taan eng kamang itu tinerima i Abraham ampa'paan im paémanenna.

¹⁹ Aiwéé i Amang Kasuruan eng kamang ciit in janji-Na. Sa taniitu, kéitu réén Sia méé in ukum Torat itu? En ukum Torat itu aiwéé-Na wosama' ro'na kakailekan é tou eng kamesé-meséaan éra. Wo en ukum itu asalo mapaké akar maai si taranak i Abraham si aicua an janji-Na a si Abraham itu. En ukum itu aicua é malaékat a si Musa si makawali itu, wo icuana a sé tou Israel.

²⁰ En ukum Torat aicua a sé tou Israel maké esa tou e makawali. Taan an tutuw i Amang Kasuruan méma' in janji a si Abraham ra'ica maké si makawali. Ampa'paan Sia in esa e méma' in janji itu.

²¹ Si Amang Kasuruan in esa e méma' in janji-Na, sa taniitu, mensunduran réén en ukum Torat itu wo in janji-Na? Wutu-wutul ra'ica. Sa en ukum Torat méé ing katouan a sé tou, séra ro'na nianggap wutul an dior-Na ampa'paan mengaéma' in ukum Torat.

²² Taan ang Kitap Le'nas aipatic pakasa in tou ang kakawasaan ing kamesé-meséaan. Ampa'paano in itu wayake' sé tou maéman a si Yesus Kristus e ro'na tumerima in janji i Amang Kasuruan itu.

²³ Taan indior, ang karoro'an kita mengento-ngento'pé' si Kristus i maai, kita pakawa'kesené' in ukum Torat tanuoka sé tou pakakurungen an untep im bui. Kita pakawa'kesen in ukum Torat akar en témpona si Kristus maai. Wo icua oka i Amang Kasuruan kita ro'na tumerima ing katouan akar ing kauré-uré sa maéman a si Kristus.

²⁴ Anaé, en ukum Torat makaakin icita akar si Kristus maai. Wo kekawus i Kristus mai, kita ro'na nianggap wutul an dior i Amang Kasuruan ampa'paan maéman a si Kristus.

²⁵ Intarépé' si Kristus itu imayo wo kita ro'nao maéman ai Sia, ampa'paano in itu kita ra'io ka'i pakaakinen in ukum Torat.

²⁶ Kamu im baya imamualio toya-toyaang i Amang Kasuruan ampa'paan maéman a si Yesus Kristus.

²⁷ Kamu im baya imeesao wo si Kristus ampa'paan nibaptis ang karapi i ngaran-Na, anaé eng katouan iow meputéo wo ing katouan i Kristus.

²⁸ Anaé, pakasa in tou maéman a si Kristus ra'io wana em béda, mandé kai séra tou Yahudi kuma'pa tou ra'ica Yahudi, ata kuma'pa tou ra'io pakakawasan é tou walina, tuama kuma'pa wéwéné. Ampa'paan kamu im baya nianggap meputé an dior i Amang Kasuruan ampa'paano i Yesus Kristus.

²⁹ Wo sa kamu anu i Kristus, kamu ka'i taranak i Abraham wo teriman oka miow sapa si aijanjio i Amang Kasuruan a si Abraham.