Galatia 2 - En Taar Weru a nunuwu' é Tontemboan

Si Paulus pinangaku tanu ruru'du'an é ruru'du'an an Yerusalem

¹ Kekawusai in sangapulu' epat ngata'un lumangkoi, yaku mangé sumawel an Yerusalem ang karapi i Barnabas, wo si Titus iwaliku ka'i.

² Yaku mangé an Yerusalem ampa'paan si Amang Kasuruan icumuao a yaku e musti maangé. Wo an tutuwku a mangé mbitu, yaku meta'up wuntulke' a sé tou sé nianggap pasiriin an jamaat. Wo ipepaarku a sé kikiiten an jamaat itu en Abar Kaaruien andumoro' i Yesus Kristus sé ipakua-kuakuo a sé tou ra'ica Yahudi, wosama' kakailekan é kikiiten sapaoka en tawoienku wutu-wutul mééo im buéna. Wo in taniitu em paraméjianku mengakua in Abar Kaaruien itu a sé tou ra'ica Yahudi indior wo intarépé' ra'ica mara'i-ra'i.

³ Wo sé aipepaarku tinerima éra. Si Titus si mewali-wali wo yaku, mandé sia tou Yunani taan ra'ica linesé' é tou Yahudi sé am bitu in sunaten.

⁴ Awéan sé tou tanuoka woo maémano a si Yesus Kristus taan séra towo. Icasalé' éra pakasa sé tuama sunaten. Séra muntep ang karapi i maene- enep an jamaat en tumi'tir sa awéan tou sé ra'io ka'i mengakiit in ukum Torat ampa'paan maéman a si Yesus Kristus. Icasalé' éra wosama' sé tou maéman kasake' pakawa'kesen in ukum Torat wo kinawasa in ukum itu.

⁵ Taan ra'ica kiniitan ami eng kasalé'an éra en andumoro' in sunat mandé makasake'. Ampa'paan icasalé' ami timboien sumama-sama' en sususuien wutul asi Abar Kaaruien andumoro' i Kristus, akar kamu an jamaat Galatia kasake' mercaya sapa sé aisusuio ami. Anaé, kamu sé maémano a si Yesus ra'io sangali kumiit in sususuien andumoro' in sunat.

⁶ Wo sé tou sé nianggap pasiri-siriin itu ra'ica mawes sapa-sapa an Abar Kaaruien si aicuakuo. (Em butulna sa aku, séra tou sé pasiriin kuma'pa ra'ica pasiriin ra'ica pandungenku. Wo si Amang Kasuruan wutu-wutul ra'ica masisir in tou.)

⁷ Eng kasiwakana pangakun éra sapaoka si Amang Kasuruan imééo in tawoien a yaku eng kumua in Abar Kaaruien a sé tou ra'ica Yahudi, meputé Sia imééo in tawoien a si Petrus eng kumua in Abar Kaaruien a sé tou Yahudi.

⁸ Ampa'paan Sia si mééo ing kaketeran a si Petrus e mamuali ruru'du'an eng kumua in Abar Kaaruien andumoro' i Yesus a sé tou Yahudi, Sia ka'i e mééo ing kaketeran a yaku mamuali ruru'du'an eng kumua in Abar Kaaruien a sé tou ra'ica Yahudi.

⁹ Si Yakobus, si Kefas, si Yohanes sé nianggap kikiiten kumataré-taré an jamaat an Yerusalem, an tutuw éra isuméré in upus aitambér i Amang Kasuruan a yaku, séra membéan ing kama a yaku wo si Barnabas tanu tuus séra imeesao wo icami. Wo séra wo icami mengkakiitano sapaoka kami melala'us tumawoi torona é tou ra'- ica Yahudi wo séra in telu kasake' tumawoi torona é tou Yahudi.

¹⁰ Wo séra asalo tumaar ai cami wosama' kasake' in tumawang sé tou lengéi. En itu uli-ulit icasalé'ku émaan.

Si Kefas sinundur i Paulus

¹¹ Taan an tutuw i Kefas mai an Antiokhia, sia sinundurku ampa'paan e niéma'na suméa'.

¹² Kelian sé tou ra'ica Yahudi maento' ang kota itu. Wo tanu si anioo e mamuali a mangé mbitu: Si Kefas, mandé ka'i sia tou Yahudi, taan sia manaramo mengakan mewali-wali wo sé tou ra'ica Yahudi sé ra'ica sinunat, wo en itu nianggap ra'ica patus a sé tou Yahudi. An tutuw é piraan tou Yahudi an Yerusalem owo sé ayutus i Yakobus mai am bitu, si Kefas ra'io kiim ka'i mewali-wali wo sé tou ra'ica Yahudi sé ra'ica sinunat itu. Ampa'paan icaindé'na sé piraan tou Yahudi sé ayutus i Yakobus, sé masalé' pakasa sé tou maéman, mandé ka'i tou ra'- ica Yahudi, musti sunaten.

¹³ Sé tou Yahudi walina an Antiokhia, tutuw éra suméré sé tou Yahudi mai an Yerusalem owo, séra ka'i kumiit ing kapunekan i Kefas, séra ra'io kiim ka'i kuman mewali-wali wo sé tou ra'ica Yahudi itu. Taniitu ka'i wo si Barnabas kinatawéran éra wo mekiit ing kapunekan éra.

¹⁴ An tutuwku suméré im peri éra itu ra'io mensomaan wo in sususuien in Abar Kaaruien andumoro' i Yesus Kristus wo an dior é tou keli cuaku a si Kefas, “Ico tou Yahudi, taan ko menonou kaputé é tou ra'ica Yahudi wo ra'ica menonou tanu tou Yahudi. Sa taniitu, kéitu réén ko masalé' lumesé' sé tou ra'ica Yahudi menonou kaputé é tou Yahudi?”

Pakasa sé tou nianggap wutul ampa'paan maéman a si Kristus

¹⁵ Yaku Paulus wo si Kefas, kiit ing ketou ami tou Yahudi. Kami anio' ra'ica sé tou iméma' ing kamesé-meséaan, tanu sé tou ra'ica Yahudi sé ra'ipé' makatuus si Amang Kasuruan.

¹⁶ Taan, kailekan ami ra'ica wana tou mandé esake' si nianggap wutul an dior-Na ampa'paan mengaéma' in ukum Torat. Sé tou nianggap wutul an dior-Na ampa'paan maéman a si Yesus Kristus. Anaé, kami in tou Yahudi ka'i maémano a si Yesus Kristus wosama' kami nianggap wutul an dior i Amang Kasuruan ampa'paan im paémanen, ra'ica ampa'paan i mengaéma' in ukum Torat. Ampa'paan ra'ica wana tou mandé esake' si nianggap wutul i Amang Kasuruan ampa'paan mengaéma' in ukum Torat.

¹⁷ Taan sa kami tou Yahudi masalé' nianggap wutul an dior i Amang Kasuruan ampa'paan maéman a si Kristus wo kami kinakéréan é tou mengaéma' ing kamesé-meséaan ampa'paan ra'ica mengaéma' in ukum Torat, sapa eng kaangéan si Kristus itu ata ing kamesé-meséaan? Tantu ra'ica!

¹⁸ Ampa'paan aku ra'io ka'i menonou mengakiit in ukum Torat. Wo sa aku maréng sumawel kumiit in ukum Torat, eng kaangéanna yaku in esa e méma' yaku tou ang kamesé-meséaan ampa'paan aku ra'io ka'i mengakiit in ukum Torat.

¹⁹ Ampa'paan aku tanu si tou imatéo asi ukum Torat wosama' aku menonou torona i Amang Kasuruan. Yaku aisalipo mewali-wali wo si Kristus.

²⁰ Intarépé' ang katouanku, ra'io ka'i yaku e menonou, taan si Kristuso si menonou a yaku. Eng katouanku ang kayo'baan anio' katouan si aituuro am paémanen a si Toyaang i Amang Kasuruan si mengaupuso yaku wo isumarakan in owak-Na toronaku.

²¹ Ra'ica icélongku en upus aitambér i Amang Kasuruan. Ampa'paan sa awéan tou sé nianggap wutul an dior-Na ampa'paan makiit in ukum Torat, tantu em papaté i Kristus ra'ica wana en torona.