Filipi 4 - En Taar Weru a nunuwu' é Tontemboan

¹ Ampa'paano in itu, é poo-poow sé icaupusku wo sé pengalelonku, pangilekenku entééno mangé em paémanen iow a si Apo' Yesus tanu in tou si uli-ulit keter makatulung. Icamuo eng kaaruianku wo eng katirayoanku si tanu mahkotaku.

En sina'u ing ka'karan

² Euodia wo Sintikhe, yaku uli-ulit mekiupus ai camu, wosama' icamu maesao en até wo esa wewerot ampa'paan imeesa wo si Apo' Yesus.

³ Wo ico é Sunsugos karapiku si le'tek, pangilekenku wosama' tawangenmu sé rua wéwéné itu, ampa'paan séra imakepé-kepéo mai mewali-wali wo yaku makua in Abar Kaaruien andumoro' i Yesus Kristus. Séra matawoi mewali-wali wo si Klemens wo sé karapiku walina an esa tawoien. Pakasa e ngaran é tou sé masémbong a yaku anio' aipatic ang Kitap Katowan ampa'paan séra menonou oka akar ing kauré-uré.

⁴ Maaru-aruio mangé ampa'paan kamu meesao wo si Apo' Yesus! Makasapé' icuaku, maaru-aruio mangé!

⁵ Iwayao mio' eng kasamaan in atému kakailekan é pakasa in tou. Si Apo' Yesus ra'io uré maai sumawel.

⁶ Tioo maindé-indé' andumoro' in sapa-sapake' mangé, taan icuao mangé eng kasalé'anmu an sombayangmu a si Amang Kasuruan am pakasa ing kaadaan wo mekiupus ang karapi ing kumua makapulu'sama' ai Sia.

⁷ Pekiupusenku eng kaeluran i Amang Kasuruan si lumébé mai asé pakasa ing kaangéan é tou, tuméir oka in até wo im bewerot iow sé meesao wo si Kristus Yesus.

⁸ Anaé, é poo-poow, icuaku mangé ai camu, pakasa sé paanggapen wutul i Amang Kasuruan, pakasa e rarayo wo in sisiri', pakasa sé ra'ica marapit, pakasa sé le'nas, pakasa sé loor, pakasa sé manam pengalingan, pakasa sé patus paangkaian im bawangko' wo patus iparayo, weroteno mangé sumama-sama' en itu.

⁹ Émaano mangé waya sé pinekisusuio miow wo sé tinerimao miow wo sé liningao miow wo sé sinéréo miow a yaku. Wo in taniitu, si Casuruan palemboian ing kaeluran mewali-wali oka wo icamu.

Makapulu'sama' em béwéé é jamaat

¹⁰ Yaku arui keli a si Casuruan, ampa'paan aituru'o miow sumawel e mawéé rékén a yaku, akar icumirimo mai ing kaperluanku. Wutul indioré'wo icamu mawéé rékén a yaku, taan icamu ra'ica wana témpo en tumawang yaku.

¹¹ En icuaku anio' ra'ica ampa'paan ing kaperluanku ra'ipé' maawes, ampa'paan aku manaramo menonou asi sapake' si awéan a yaku.

¹² Kailekanku tambisa menonou ang kalengéian wo makailek ka'i tambisa menonou ang kalébéan. Ang kaadaan in sapake', wesu kuma'pa maarem, ang kalébéan kuma'pa ang kakurangan, pakasa en itu pinendamkuo mai.

¹³ Ang kaadaan in sapake' eng kinasangkumanku, susa kuma'pa arui, kawooanku i muléng ampa'paan i Kristus si cumeter yaku.

¹⁴ Mandé ka'i in taniitu, yaku tinawa- ngo miow an tutuwku ang kawenduan intarépé'. Wo sapa sé niéma' miow itu loor.

¹⁵ Poo-poowku tou Filipi, an tutuwku in tumela'u icamu a Makedonia wo aku tumo'tolo kumua in Abar Kaaruien andumoro' i Yesus Kristus an tampa walina, ra'ica wana jamaat mandé in esake' e méé in tatawang a yaku, wayake' icamu.

¹⁶ Wo an tutuwku an Tesalonika icamu lébéo imakasa icumirim mai im patawang ing kaperluanku.

¹⁷ Icuaku en itu ai camu ra'ica ampa'paan yaku maarap ka'i im patawang iow. Taan en icasalé'ku, kamu tumerima ing kamang lumepe-lepet asi Casuruan ampa'paan kamu sumuuno ing kasiyaan an sorga.

¹⁸ Pakasa eng kaperluanku kinakiitano, wo sé awéan a yaku ilumébéo asi paperlunku. Ampa'paan yaku tumerimao im patawang iow itu asi Epafroditus owo. En doit aiwéé miow itu meputé im paragés mawou manam si icasalé' i Amang Kasuruan si patus ai Sia.

¹⁹ Si Casuruanku oka e mawesai im pakasa sé paperlun iow iciit ing kasiyaan-Na si ra'ica maka'pu, ampa'paan kamu meesao wo si Kristus Yesus.

²⁰ Mayoo kita rumayo wo sumiri' si Amang Kasuruan, Amangta akar ing kauré-uré! Ulit.

En siri' ing ka'karan

²¹ Icuao mio' en siri'ku a si esa wo si esa tou le'nas sé meesao wo si Kristus Yesus. Sé poo-poow an esa paémanen sé mewali-wali wo yaku am bia'i méé mai ka'i in siri' ai camu.

²² Pakasa in tou le'nas am bia'i, lébé-lébé ka'i séra sé an istana i Kaisar méé mai in siri' ai camu.

²³ Yaku sumombayang wosama' en upus tatambér i Apo' Yesus Kristus mewali-wali wo i roh miow!