Filipi 2 - En Taar Weru a nunuwu' é Tontemboan

En sina'u e mawawa' in owak kaputé i Kristus

¹ Kamu kasake' keter ampa'paan kamu meesao wo si Kristus. Wo kamu kinaiborano ampa'paan si Kristus mengaupus icamu. Kamu menonouo am paesaan ampa'paan pakaakinen i Roh Le'nas. Wo kamu ka'i meupu-upusano wo sé kakélé in tou wo awéan eng kaupusan a si esa wo sé walina.

² Anaé, émaano mai en atéku wutu-wutul mendam in arui, ang karapi iméma' in tana'i; menonou angé kamu ang karapi in esa até, esa upus, esa wewerot wo esa en angéan.

³ Tioo mengaéma' in sapa-sapake' sé asalo mangéré ing katoronaanke' in owak in esa, kuma'pa mengatirayo in owak in esa. Taan ituru'o eng kako'kosan in até asi esa wo si esa wo weroteno mangé sé tou walina en lébé loorai wo in owak in esa.

⁴ Maweroto mangé sapa sé loor torona é tou walina. Tioo asalo mawerot sapa sé loor torona in owak in esa.

⁵ Em peri miow musti meputé wo im peri i Kristus Yesus.

⁶ En ulitna si Yesus Kristus puté wo si Amang Kasuruan, taan eng kaputé-Na itu ra'ica nianggap-Na tanu in anu-Na si musti penanangen,

⁷ taan taré iwekar-Na waya sapake' sé ai Sia, wo mindo ing kadudukan si wawa' keli tanu ata wo mamuali tou.

⁸ An tutuw Sia mamuali tou, iwawa'-Na en owak-Na wo le'tek a si Amang Kasuruan akar imaté, wo akar imaté ang kayu salip.

⁹ Siituo e mangémai Sia iparangka-rangka' i Amang Kasuruan wo winéan ngaran an dangka' im pakasa i ngaran, ampa'paan Sia kumawasa oka am baya-waya,

¹⁰ wosama' pakasa sé an langit wo sé am bawo ing kayo'baan wo sé an darem ing kayo'baan kumundu oka e maapo' a si kawasa i ngaran i Yesus,

¹¹ wo séra im baya mangaku sapaoka si Yesus Kristus itu Kasuruan. Wo in taniitu, si Amang Kasuruan Amangta em parayo wo pasiriin.

Tatap tawoien eng kalowiranmu

¹² Poo-poow sé icaupusku! Kailekanku an tutuwku ang karapi miow, kamu tatap le'tek a yaku. Taniitu ka'i intarépé' an tutuwku mentayangan wo icamu, pangilekenku tatap tawoien angé ang karapi mauli-ulit eng kalowiran iow wo ang karapi wuta ing kaindé'an a si Amang Kasuruan, wo menonou angé kiit in sapa si patus émaan é tou sé linowir-Nao.

¹³ Kamu ro'na menonou tanu siitu ampa'paan si Amang Kasuruan in esao si matawoi an até miow, akar kamu ro'na menonou kiit ing kasalé'an-Na wo ro'na imaéma' sé icasalé'-Na.

¹⁴ Sapake' en émaan iow, émaano mangé en itu ang karapi i ra'ica mengi-ngimbulu wo tioo ka'i meindo-indoan roma',

¹⁵ wosama' kamu menonou ang karapi in até weresi wo ra'ica wana kaséaan. Wo in taniitu, ituru' miow sapaoka kamu toya-toyaang i Amang Kasuruan sé ra'ica wana kaséaan an uner é tou léwo' wo a sé tou icasélé'kow. Anaé icamu oka e mamuali sendot an unér éra kaputé sé sumesendot mengatélang an untep ing kayo'baan.

¹⁶ Ang karoro'an in itu turu'o miow ka'i ai séra en Taar si mawéé ing katouan. Wo in taniitu an tutuw i Kristus maai sa, yaku ro'na tumirayo ampa'paan pakasa sé pinaraméjianku a si tawoienku ra'ica mara'i-ra'i wo sé pinala'lé-la'léanku mai awéan en torona.

¹⁷ Tumo'tolke' mai asi kataré an tutuwku kumua in Abar Kaaruien ai camu, kamu mapercaya a si Apo' Yesus wo isumarakano ing katouan iow e maéma' ing kasalé'an-Na. Anaé, mandé ka'i aku ukumen patén ampa'paan in tawoienku e mengakua in Abar Kaaruien andumoro' i Yesus Kristus ai camu, en itu ra'ica sapa-sapa. Yaku kasake' kumua imakapulu'sama' a si Amang Kasuruan wo maaru-arui oka mewali-wali wo icamu.

¹⁸ Taniitu ka'i kamu maaru-aruio mangé in taniitu wo masalé-salé'o mewali-wali wo yaku.

Si Timotius wo si Epafroditus

¹⁹ Em paarapenku sa woo énannai i Apo' Yesus, icala'usku yutus angé si Timotius ai camu. Ampa'paan aku mendam oka in arui sa sia maréngomai sumawel wo maali mai in abar andumoro' icamu.

²⁰ Ra'ica wana tou tanu si Timotius, si esa até wo esa wewerot wo yaku. Sia wutu-wutul mawéé rékén ing katoronaan iow.

²¹ Sé tou walina asalo mangéré ing katoronaan éra in esa, em paérén éra ra'ica ing katoronaan i Yesus Kristus.

²² Taan kailekano miow eng kale'tekan i Timotius kinaujiano. Sia sumémbongo mai a yaku an tutuw imengua-ngua in Abar Kaaruien, tanu si esa toyaang masémbong a si amangna.

²³ Ampa'paano in itu siao em paarapenku en lala'us yutusku mangé ai camu sa kinailekankuo tambisa en lalanna im perkaraku.

²⁴ Wo percayanku sa woo énannai i Apo' Yesus yaku in esa ka'i makala'us oka mai ai camu.

²⁵ Wo anggapenku ka'i perlu yutus angé sumawel si Epafroditus ai camu si aicirim iow en sumelewir ing kaperluanku. Sia imamuali poow an esa paémanen wo katawoiku mengakua in Abar Kaaruien andumoro' i Yesus Kristus wo mewali-wali maraméji méma' in tawoien si airu'du' i Amang Kasuruan.

²⁶ Icasalé'ku sia yutus angé sumawel, ampa'paan icamu im baya lelonna keli wo en aténa ka'i mendam in susa ampa'paan pinalingao miow sapaoka sia sumakit.

²⁷ Wutul sia sumakit wo misi oka maté, taan si Amang Kasuruan tumuru'o ing kaupusan-Na ai sia akar imasama'. Taniitu ka'i si Amang Kasuruan tumuru'o mai ing kaupusan-Na a yaku akar eng kawenduan in atéku ra'io mengawe-ngawes.

²⁸ Siituo imangémai akar sia makala'us icirimku oka ai camu wosama' kamu arui ka'i en suméré sia, wo in taniitu aku ra'io maindé-indé' andumoro' in owakna.

²⁹ Anaé, sungkuleno mangé si Epafroditus itu ang karapi i wuta ing kaaruian ang karapi i ngaran i Casuruan tanu poow an esa paémanen, wo siriino mangé sé tou kaputé itu,

³⁰ ampa'paan si Epafroditus misio maté an tawoien maselewir in tawoien i Kristus. Aipetaruna en owakna en tumawang yaku tanu sawel iow ampa'paan kita mentayangan.